ជំនួបកំពូលត្រីភាគី រុស្ស៊ី-តួកគី-អ៊ីរ៉ង់ នៅក្រុងរុស្ស៊ី Sotchi ដើម្បីរៀបរយសន្តិភាពនៅស៊ីរី
ចុះផ្សាយនៅថ្ងៃ៖
ស្តាប់
ថ្ងៃ២២វិច្ឆិកានេះ លោកប្រធានាធិបតីរុស្ស៊ី Vladimir Poutine ទទួលជួប ប្រធានាធិបតីតួកគី លោក Recep Erdogan និង ប្រធានាធិបតីអ៊ីរ៉ង់ លោក Hassan Rohani នៅក្រុងរមណីយដ្ឋានរុស្ស៊ី Sotchi ដើម្បីរៀបរយដំណោះស្រាយឲ្យជម្លោះក្នុងប្រទេសស៊ីរី សម្រាប់អំឡុងពេលវែងឆ្ងាយទៅមុខ កាល ដែលនៅសល់ប៉ុន្មានថ្ងៃទៀត ដល់ពេលប្រព្រឹត្តទៅមួយវគ្គថ្មីទៀត កិច្ចចរចា នៅក្រុងហ្ស៊ឺណែវ ស្តីអំពី អនាគតប្រទេសនេះ។ ចៅហ្វាយវិមានក្រេមឡាំង ដែលជាបង្អែកដ៏មាំនៃរបបលោក ប្រធានាធិបតី បាស្ហារ អាល-អាសាដ មានបំណងរៀបចំប្រទេសស៊ីរី សម្រាប់យុគ ក្រោយពីសង្គ្រាមចប់ទៅ នៅទីនោះ នៅចំគ្រាដែលរបបនេះ មានការគាំទ្រពីកងទ័ពរុស្ស៊ី ចេះដណ្តើមបានមកវិញនូវដែនដីមួយភាគធំ នៃប្រទេសស៊ីរីពីដៃពួកឧទ្ទាម និង ពួកជីហាដនៃអង្គការភេរវនិយម”រដ្ឋអ៊ីស្លាម”។ ឯភាគីប្រឆាំងស៊ីរី បានរួមប្រជុំថ្ងៃនេះ នៅក្រុង Ryad ដើម្បីតាក់តែង ឡើងជាគោលជំហររួមដែលត្រូវប្រកាន់យក សម្រាប់ទៅ ចរចា ក្រុងហ្ស៊ឺណែវ នៅថ្ងៃ ២៨ វិច្ឆិកាខាងមុខ ដែលនឹងប្រព្រឹត្តទៅ ក្រោមការឧបត្ថម្ភនៃប្រេសិតវិសាមញ្ញអសបខាងបញ្ហាស៊ីរី លោក Mistura។
នៅថ្ងៃនេះ រុស្ស៊ីបានដឹកនាំបើកជំនួបកំពូលមួយថ្មីទៀត នៅទីក្រុងមាត់សមុទ្ទរបស់រុស្ស៊ី ហៅថា អង្គសមាជនៃកិច្ចសន្ទនាអន្តរស៊ីរី ដែលរុស្ស៊ីបានបំផុសត្រៀមរៀបចំតាំងពីខែតុលាមកម្ល៉េះ។ នៅក្នុងឱកាសថ្លែងបើកជំនួបកំពូលត្រីភាគី លោកពូទីន បានបង្ហាញសុទិដ្ឋិនិយម និងពន្លឺនៃក្តីសង្ឃឹមថាគេអាចមានសំណាងច្រើននឹងបិទបញ្ចប់វិបត្តិនៅស៊ីរីបាន។ តែលោកពូទីន បានទទូចឱ្យគ្រប់ភាគីទាំងអស់ព្រមធ្វើសម្បទានរៀងខ្លួនៗ។
កាលពីបីថ្ងៃមុន ពីប្រទេសតួកគី ប្រមុខការទូតនៃ៣ប្រទេសនេះ (រុស្ស៊ី អ៊ីរ៉ង់ តួកគី) បានព្រមព្រៀងគ្នាលើស្ទើរគ្រប់ចំណុចគន្លឹះៗ និងបានសម្របយោបល់គ្នារួចហើយស្តីអំពីអនុសាសន៍ សម្រាប់មកយកអនុម័តនៅអង្គសមាជនេះ។ រុស្ស៊ីនិងអ៊ីរ៉ង់ ជាសម្ព័ន្ធមិត្តគាំទ្ររបបលោកអាសាដ ចំណែកតួកគីជាអ្នកគាំទ្រភាគីប្រឆាំង ធ្លាប់បានធ្វើការរួមគ្នានិងដឹកនាំប្រជុំដោះស្រាយវិបត្តិស៊ីរីម្តងរួចហើយ ដោយបានរកឃើញកិច្ចព្រមព្រៀងមួយ បង្កើតតំបន់គ្មានការប្រយុទ្ធបួនកន្លែង។ បើតាមប្រទេសទាំងបី ស្ថានការណ៍ប្រទេសស៊ីរី បានឈានដល់ដំណាក់កាលស្វែងរកដំណោះស្រាយតាមផ្លូវនយោបាយ ហើយសង្កេតឃើញ មានការធ្លាក់ចុះនៃកំរិតហិង្សាតានតឹងលើសមរភូមិ និងបាននាំភាគីបក្សដិបក្សឱ្យចូលតុចរចា។
សម្រាប់ជំនួបនៅថ្ងៃនេះទៀត ខាងកងអគ្គសេនាធិការរបស់កងទ័ពរុស្ស៊ី តួគគី អ៊ីរ៉ង់ បានព្រមព្រៀងគ្នារួចទៅហើយលើវិធានការ សម្រាប់បង្កើនកំរិតការសម្របសម្រួលកម្លាំងគ្នា នៅត្រង់តំបន់សន្តិសុខស៊ីរី ព្រមទាំងបានតាក់តែងជំហានជាក់លាក់ឆ្ពោះទៅកម្ទេចពួកអង្គការរដ្ឋអ៊ីសា្លម ដែលនៅសេសសល់។
ទន្ទឹមនឹងកិច្ចខិតខំប្រឹងប្រែងរៀបចំជំនួបប្រជុំត្រីភាគីនេះ លោកពូទីនក៏បានទទួលជួបលោក អាសាដ និងបានជជែកពិភាក្សាជាមួយលោក ដូណាល់ ត្រាំទៀត។ គូភាគីទាំងពីរ បានឯកភាពគោរពនូវអធិបតេយ្យ ឯករាជ្យ និងបូរណភាពដែនដីស៊ីរី ព្រមទាំងកម្ចាត់កម្ចាយពួកអង្គការរដ្ឋអ៊ីស្លាម ភេរវនិយមឱ្យដល់ឬសគល់។
ទាក់ទងនឹងជោគវាសនា លោកប្រធានាធិបតី បាស្ហារ អាល់ អាសាដ ម៉ូស្គូយល់ថាជាបុព្វសិទ្ធិរបស់ប្រជាពលរដ្ឋស៊ីរី ដោយគ្មានការអារកាត់និងជ្រៀតជ្រែកពីក្រៅ។
ពីមុនមករាល់គ្រប់គំនិតផ្តួចផ្តើមរកសន្តិភាពស៊ីរី តែងត្រូវជាប់គាំង ត្រង់ជោគវាសនាលោក អាសាដនេះឯង ប៉ុន្តែសង្គ្រាមស៊ីរី ដែលបានសម្លាប់ជីវិតមនុស្សអស់ជាង៣៣ម៉ឺននាក់ បានដើរមកដល់របត់ថ្មី ៖ ពួកអង្គការរដ្ឋអ៊ីស្លាមបរាជ័យផ្ទួនៗនិងស្ទើរតែទាំងស្រុង ភាគីប្រឆាំងស៊ីរីបន្តបែងខ្ញែក កំពុងជួបប្រជុំគ្នានៅទីក្រុងរីយ៉ាដ ដើម្បីរកតំណាងរួម និងសក្តិសម សម្រាប់ចូលទៅចរចានៅសប្តាហ៍ក្រោយ ឯខាងរដ្ឋាភិបាលស៊ីរី ហាក់ដូចជាមានប្រៀបជាងគេ មានរចនាសម្ព័ន្ធរឹងមាំជាងគ្នា ក្នុងធានារ៉ាប់រងសន្តិសុខនិងសុវត្ថិភាពប្រទេស គួរឱ្យទុកចិត្ត។ យោធារបស់រដ្ឋាភិបាលស៊ីរី បានទទួលជោគជ័យលើសមរភូមិច្រើនដែលអាចមានទឹកមាត់កាន់តែប្រៃ លើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ