លោកអាសាដចោទបារាំងពីបទគាំទ្រភេរវនិយម បារាំងឆ្លើយបកវិញភ្លាមៗយ៉ាងចាស់ដៃ
នៅក្នុងប្រទេសស៊ីរី លោកប្រធានាធិបតីអាសាដបានចោទបារាំងត្រង់ៗពីបទបានគាំទ្រភេរវនិយម និងយល់ឃើញថា ទីក្រុងប៉ារីសគ្មានសិទ្ធិអ្វីដើម្បីនិយាយពីសន្តិភាពនៅស៊ីរីទេ។ លោកអាសាដបានបន្ថែមដោយឌឺដងដាក់បារាំងថា អ្នកដែលបានគាំទ្រភេរវនិយមគ្មានសិទ្ធិនិយាយពីរឿងសន្តិភាព និងថែមទាំងគ្មានសិទ្ធិលូកដៃចូលក្នុងកិច្ចការផ្ទៃក្នុងរបស់ស៊ីរីទៀតផង។ ការថ្លែងរបស់លោកអាសាដរបៀបនេះបានធ្វើឡើង បន្ទាប់ពីទីក្រុងប៉ារីសបានចោទទីក្រុងដាម៉ាស់ពីបទធ្វើឲ្យបរាជ័យនៅក្នុងកិច្ចចរចាសន្តិភាពស្តីពីស៊ីរីរៀបចំក្នុងទីក្រុងហ្សឺណែវថ្មីៗនេះ។ ទោះជាយ៉ាងនេះក្តី ពាក្យសម្តីរបស់លោកអាសាដដូចនេះបានធ្វើឲ្យរដ្ឋាភិបាលបារាំងក្តៅស្លឹកត្រចៀកដោយលោកប្រមុខការទូត Jean-Yves Le Drian បានបញ្ចេញប្រតិកម្មតបវិញខ្លាំងៗ និងរម្លឹកពីតួនាទីរបស់បារាំងក្នុងដំណើរស្វែងរកសន្តិភាពឲ្យស៊ីរី។
ចុះផ្សាយនៅថ្ងៃ៖
ស្តាប់ - ០១:០៧
« លោកបាស្ហា អាល់ អាសាដហាក់មិនបានស្ថិតក្នុងស្ថានការណ៍ដើម្បីអាចបញ្ជាក់ពីការសម្រេចចិត្តក្នុងរឿងនយោបាយឡើយ ព្រោះលោកកំពុងពឹងពាក់លើប្រទេសរុស្ស៊ី និងប្រទេសអ៊ីរ៉ង់។ បន្ទាប់មក នៅពេលដែលយើងជាអ្នកទី១ ដែលបានរំដោះស៊ីរីឲ្យរួចពីកណ្តាប់ពួកជីហាតអង្គការរដ្ឋអ៊ីស្លាម យើងមិនត្រូវការទទួលមេរៀនពីនរណាម្នាក់ ហើយក៏មិនត្រូវការផ្តល់មេរៀនឲ្យនរណាម្នាក់ដែរ។
ចុងក្រោយ នៅនៅពេលដែលនរណាម្នាក់បានចំណាយពេលដើម្បីសម្លាប់រង្គាលពលរដ្ឋខ្លួនឯង អ្នកនោះតែងតែបិទមាត់ ដោយមិនសូវនិយាយអ្វីទាំងអស់។ អ្វីដែលច្បាស់គឺថាតាំងពីអើយមកម្ល៉េះ បារាំងបានចូលរួមជាមួយកម្លាំងសម្ព័ន្ធមិត្តនៅក្នុងយុទ្ធនាការប្រឆាំងនឹងអង្គការរដ្ឋអ៊ីស្លាម។
នៅថ្ងៃនេះ គឺកម្លាំងសម្ព័ន្ធមិត្តដែលបានទទួលជោគជ័យទល់នឹងអង្គការរដ្ឋអ៊ីស្លាម ហើយនៅពេលនេះ អង្គការរដ្ឋអ៊ីស្លាមនៅមិនទាន់ទទួលបរាជ័យទាំងស្រុងទេ។ ដូច្នេះ គេត្រូវតែបន្តយុទ្ធនាការតទៅមុខទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ