ម៉ូស្គូអំពាវនាវបស្ចិមលោកឲ្យ " ជញ្ជឹងគិតអំពីផលវិបាក “ នៃការគម្រាមវាយប្រហារទៅលើស៊ីរី
ថ្ងៃព្រហស្បតិ៍ម្សិលមិញ រុស្ស៊ីអំពាវនាវបស្ចិមលោកឲ្យ "ជញ្ជឹងគិតយ៉ាងមធ្យ័តអំពីផលវិបាក” នៃ”ការគម្រាម” របស់ពួកគេវាយប្រហារ ទៅលើស៊ីរី ដើម្បីសងសឹក របបក្រុងដាម៉ាស ដែលត្រូវគេចោទថា បានប្រើអាវុធគីមី ប្រឆាំងបណ្តាជនស៊ីវិល។ រុស្ស៊ីអំពាវនាវនេះ គឺទាំងអះអាងថាម៉ូស្គូ មិនប្រាថ្នាឃើញ ស្ថានការណ៍តានតឹង ជុំវិញស៊ីរី កាន់តែធ្ងន់ធ្ងរ ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ថ្លែងក្នុងសន្និសីទសារព័តិ៍មាន ថ្ងៃព្រហស្បត៏ ១២ មេសា អ្នកនាំពាក្យផ្លូវការ នៃក្រសួងការបរទេស រុស្ស៊ី លោកស្រី Maria Zakharova លើកឡើងជាអាទ៏ ៖ យើងសូមអំពាវនាវគ្រប់តែសមាជិក នៃសហគមន៍ អន្តរជាតិ ជញ្ជឹងគិតឲ្យបានមធ្យ័តមែនទែន អំពីផលវិបាកដែលអាចកើតមាន បណ្តាលមកពី ការចោទ ប្រកាន់ ការគម្រាម និង សកម្មភាពគ្រោងធ្វើបែបនេះ ទល់នឹង រដ្ឋាភិបាលស៊ីរី ។ លោកស្រី បន្ថែមថា គ្មាន នរណាបានបំពាក់ទៅលើ ពួកអ្នកដឹកនាំបស្ចិមលោក នូរសិទ្ធិឲ្យដើរតួ ជាមេអាងយ៉ាងលើពិភពលោក ដោយក្នុងពេលជាមួយគ្នា ជា អ្នកធ្វើអង្កេតផង ជារដ្ឋអាជ្ញាផង ជាចៅក្រមផង និង ជាពេជ្ឈឃាតផង។ អ្នកការទូតរុស្ស៊ី គូសបញ្ជាក់តមកទៀត ៖ គោលជំហរម៉ូស្គូ គឺ ច្បាស់ក្រឡែត និងជាក់លាក់ ក្នុងន័យថា យើងមិនចង់ ឲ្យស្ថានការណ៍ស្រុតចុះធ្ងន់ធ្ងរ ទៅទៀតឡើយ។
លោកស្រីតំណាងឲ្យការទូតរុស្ស៊ី បានសំដែងសេចក្តីសង្ឃឹមថា នៅតាមរដ្ឋធានីប្រទេសខាងលិច គេ” ពិតជា ប្រកបដោយ គតិបណ្ឌិតគ្រប់គ្រាន់ សម្រាប់វិលត្រឡប់ ទៅស្ថិតនៅក្នុងក្របខ័ណ្ឌច្បាប់ ហើយដោះស្រាយ ដោយរួមគ្នាបញ្ហាដែលមាន ដូចដែលប្រមើលដោយធម្មនុញ្ញ អង្គការសហប្រជាជាតិ។ អ្នកនាំពាក្យក្រសួង ការបរទេសរុស្ស៊ី សង្កត់ធ្ងន់ថា ៖ ម៉ូស្គូមិនប្រាថ្នាឃើញ ស្ថានការណ៍កាន់តែកើនកំដៅឡើយ ប៉ុន្តែ ម៉ូស្គូ ក៏ មិនអាចទ្រាំទ្រ បានឡើយ នឹង ពាក្យចោទប្រកាន់ដែលធាតុពិតរបស់វា គឺជា សំដីកុហកសុទ្ធសាធ។
បស្ចិមលោក នាំមុខដោយ សរអា បានកំញើញវាយប្រហារ ទៅលើរបបក្រុងដាម៉ាស ក្នុងប៉ុន្មានម៉ោង ឫ ប៉ុន្មានថ្ងៃចំពោះមុខ ដើម្បីសងសឹករបបនេះ ដែលត្រូវពួកគេចោទ ថា បានប្រើអាវុធគិមី កាលពីដើមខែ មេសា ទៅលើបណ្តាជនស៊ីវិល នៃក្រុង Douma កាន់កាប់ដោយពួកឧទ្ទាម។
រុស្ស៊ី ពីចំណែកខ្លួន បានបរិហារការចោទប្រកាន់នេះ ដែលត្រូវបស្ចិមលោកប្រឌិតជា”លេស” សម្រាប់ វាត ប្រតិបត្តិការយោធាទល់នឹង របបក្រុងដាម៉ាស ទាំងព្រមានថា រុស្ស៊ីនឹងបាញ់កំទេចរាល់តែមីស៊ីលណា ដែល វាយប្រហារទៅលើស៊ីរី ជាសម្ព័ន្ធមិត្តខ្លួន។
របបលោកប្រធានាធិបតីស៊ីរី បាស្ហារ អាល់ អាសាដ រួមជាមួយបណ្តាសម្ព័ន្ធមិត្ត រុស្ស៊ី និង អ៊ីរ៉ង់ បាន បដិសេធដាច់អហង្ការ ការប្រើដោយស៊ីរី នូវអាវុគីមីស្អីណាក្នុងក្រុង Douma នោះ ប៉ុន្តែ សរអា នៅតែ អះអាង ថា របបលោកអាសាដ បានប្រើអាវុធបែបនេះមែន ម៉្លោះហើយបានជា ក្រុងវ៉ាស៊ីនតោន នៅតែ គម្រាម វាយសងសឹករបបនេះ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ