អៀរឡង់បោះឆ្នោតប្រជាមតិគាំទ្រសិទ្ធិរម្លូតកូន
អៀរឡង់ជាអ្នកប្រកាន់សាសនាកាតូលិកខ្លាំងបំផុត និងមានរដ្ឋធម្មនុញ្ញ ហាមឃាត់តាំងពីជាងមួយសតវត្សរ៍មកហើយមិនឱ្យស្ត្រីរម្លូតកូន ! ប៉ុន្តែនៅថ្ងៃសុក្រទី ២៥ឧសភា ម្សិលមិញ បណ្តាជនអៀរឡង់ បានផ្តាច់ខ្លួនពីទម្លាប់ចាស់ ដោយបានបោះឆ្នោតយល់ព្រម តាមរយៈប្រជាមតិ ផ្តល់សិទ្ធិដល់ស្រ្តី ក្នុងការសម្រេចរម្លូតកូន ក្នុងសំឡេងគាំទ្រ ជាង៦៦,៤%។ នេះបើតាមលទ្ធផលជាផ្លូវការប្រកាសនៅរសៀលថ្ងៃសៅរ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
កាលពីឆ្នាំ១៩៩៥ ពលរដ្ឋអៀរឡង់៥០,៣% បានធ្វើប្រជាមតិព្រមឱ្យមានច្បាប់លះលែងប្តីប្រពន្ធ។ ជាង៦២% បានបោះឆ្នោតគាំទ្រអាពាហ៍ពិពាហ៍អ្នកស្រលាញ់ភេទដូចគ្នា នៅឆ្នាំ២០១៥ ហើយនៅថ្ងៃសុក្រទី ២៥ឧសភា ២០១៨នេះ អ្នកជនបទ ឬអ្នកក្រុង ក្មេងឬចាស់ ស្រីឬប្រុស ... អៀរឡង់ទាំងមូល បានឆ្លើយថា “ព្រម” ឱ្យស្ត្រីមានសិទ្ធិរម្លូតកូន នៅក្នុងប្រជាមតិជាប្រវត្តិសាស្ត្រ ដែលបញ្ជាក់អំពីដំណើរវិវឌ្ឍន៍របស់អៀរឡង់ ផ្តាច់ខ្លួនទម្លាប់ចំណាស់មួយសតវត្សរ៍ និងអំពីការធ្លាក់ឥទ្ធិពលរបស់វិហារកាតូលិក។
ក្រោយសង្គ្រាមស៊ិវិលឆ្នាំ១៩២០មក វិហារកាតូលិកអៀរឡង់ មានអំណាចខ្លាំងណាស់នៅក្នុងប្រទេស ព្រោះជាអ្នកបានជួយរំដោះអៀរឡង់ពីអាណានិគមអង់គ្លេស។ អំណាចរបស់វិហារកាតូលិក មានឥទ្ធិពលខ្លាំងរហូតដល់ឆ្នាំ១៩៨៣ សម្រេចធ្វើវិសោធនកម្មរដ្ឋធម្មនុញ្ញ ហាមឃាត់មិនឱ្យមានការរម្លូតកូនទេ បើទោះបីជាស្ត្រីមានកូនដោយការចាប់រំលោភ ឬកូនមានលូតលាស់ខុសប្រក្រតីយ៉ាងណាក៏ដោយ។ ការរម្លូតកូនអាចនឹងត្រូវផ្តន្ទាទោសជាប់ពន្ធនាគារអស់មួយជីវិត នៅរវាងពីឆ្នាំ១៨៦១ដល់ឆ្នាំ២០១៣ និងបន្ថយមកត្រឹម១៤ឆ្នាំ ចាប់ពីឆ្នាំ២០១៣មក។
ថ្វីបើពេលនេះ ពលរដ្ឋអៀរឡង់ជាង៨៧% កាន់សាសនាកាតូលិកមែន ប៉ុន្តែវិហារកាតូលិក បានបាត់បង់ឥទ្ធិពលរបស់ខ្លួនបន្តិចម្តងៗ ដោយហេតុតែរឿងអាស្រូវ សង្ឃកាតូលិកស្រលាញ់ក្មេងផង រឿងអាស្រូវសង្ឃកាតូលិកគេចចំណេញលក់ទារកកាលពីឆ្នាំ១៩៥០ផង រឿងអាស្រូវរកឃើញផ្នូរកប់ខ្មោចទារកកាលពីឆ្នាំ២០១៤ផង។ នៅក្នុងពេលឃោសនាប្រជាមតិនេះ វិហារកាតូលិកមិនសូវចេញមុខចេញមាត់ឡើយ។
នាយករដ្ឋមន្ត្រីអៀរឡង់ បានបញ្ចេញប្រតិកម្មអបអរយ៉ាងខ្លាំងចំពោះលទ្ធផលនៃប្រជាមតិម្សិលមិញ ដោយចាត់ទុកថា អៀរឡង់កំពុងបើកទំព័រប្រវត្តិសាស្ត្រថ្មី ! អៀរឡង់នឹងក្លាយជាប្រទេសមានសប្បុរធម៌ និងគួរឱ្យគោរពជាងមុន។ នេះជាទស្សនៈរបស់រដ្ឋមន្ត្រីក្រសួងសុខាភិបាល។ ជាមួយលទ្ធផលដ៏អស្ចារ្យថ្ងៃនេះ អៀរឡង់នឹងអនុម័តច្បាប់រម្លូតកូនបានក្នុងពេលឆាប់ៗ។ បើតាមគម្រោងច្បាប់របស់រដ្ឋាភិបាល ការរម្លូតកូនអាចនឹងប្រព្រឹត្តទៅដោយគ្មានទាមទារមូលហេតុចំពោះអាយុគ៌ភ ១២សប្តាហ៍ដំបូង -រហូតដល់២៤សប្តាហ៍ ប្រសិនបើមានហានិភ័យដល់អាយុជីវិតម្តាយ និងក្នុងករណីទារកក្នុងផ្ទៃមានភាពមិនប្រក្រតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ