មេដឹកនាំរុស្ស៊ីនិងអ៊ុយក្រែន ទាមទារដូចគ្នា ឲ្យដោះលែងអ្នកទោសរបស់ម្ខាងៗ
ជាលទ្ធផលនៃការសន្ទនាគ្នាតាមទូរសព្ទ ថ្ងៃសៅរ៍ទី ៩ មិថុនា ប្រធានាធិបតីរុស្ស៊ី និង អ៊ុយក្រែន បានព្រមព្រៀងគ្នា ឲ្យតំណាងខាងបញ្ហាសិទ្ធិមនុស្សរបស់ប្រទេសទាំងពីរ តាក់តែងឡើងជា បញ្ជីឈ្មោះ ពួកអ្នកទោសជាប់នៅតាមពន្ធនាគារម្ខាងៗ ហើយទៅសួរសុខទុក្ខទណ្ឌិតទាំងនោះរៀងៗខ្លួន- ដំណឹងនេះ ប្រកាសដោយអង្គភាពព័ត៌មានវិមានក្រេមឡាំង ដែលលំអិតថា កិច្ចសន្ទនានេះ បានប្រព្រឹត្តទៅ តាមគំនិត ផ្តួចផ្តើម ពីខាង ក្រុងគៀវ។ ប៉ុន្តែ រឿងដោះដូរអ្នកទោសផ្ទាល់ ស្ថិតនៅក្នុងការទាមទារនៅឡើយ។
ចុះផ្សាយនៅថ្ងៃ៖
ស្របនឹងសេចក្តីជូនដំណឹង ពេលសន្ទនាតាមទូរសព្ទនោះ លោកប្រធានាធិបតី វ៉្លាឌីមៀរ ពូទីន បានគូសបញ្ជាក់ពីភាពចាំបាច់ ត្រូវដោះលែងដោយឥតបង្អែរបង្អង់ឡើយ គ្រប់តែអ្នកកាសែតរុស្ស៊ី ចាប់ឃុំឃាំងនៅអ៊ុយក្រែន។
សម្រាប់ម៉ូស្គូ លេចធ្លោជាងគេ ក្នុងបញ្ជីអ្នកកាសែតចាប់ឃុំឃាំងនោះ គឺនិពន្ធនាយកនៃការិយាល័យ ទីភ្នាក់ងារព័ត៌មានរុស្ស៊ី RIA Novosti ដែលត្រូវបានតុលាការអ៊ុយក្រែន កាត់ទោសកាលពីថ្ងៃ ១៧ ឧសភា ឃុំខ្លួន ២ខែសិន គឺ លោក Kyrylo Vyshinski មានសញ្ជតិពីរ អ៊ុយក្រែនផង រុស្ស៊ីផង ហើយជាប់ចោទ តាមបទ “ក្បត់ជាតិ” អាចជាប់គុកដល់ ១៥ ឆ្នាំ ដោយមកពីផ្សាយព័ត៌មានអំពី រុស្ស៊ី ដែលក្រុងគៀវចាត់ទុក ជាសត្រូវរបស់អ៊ុយក្រែន។
សម្រាប់ភាគីអ៊ុយក្រែន លេចធ្លោជាងគេក្នុងបញ្ជីទណ្ឌិតខ្លួននៅរុស្ស៊ី គឺ អ្នកថតកុនលោក Oleg Sentsov កាត់ទោសកាលពីខែសីហាឆ្នាំ២០១៥ ឲ្យជាប់គុក ២០ឆ្នាំ តាមបទ “ភេរវនិយម”និង “រត់ពន្ធអាវុធ” ហើយសព្វថ្ងៃ ជាប់ក្នុងពន្ធនាគារនៅតំបន់ឧត្តររុស្ស៊ី មានធាតុអាកាសត្រជាក់។ ពេលសន្ទនាតាមទូរសព្ទជាមួយលោកពូទីន លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានសំដែងនូវក្តីព្រួយកង្វល់មែនទែន ចំពោះអាការៈសុខភាពជនរួមឈាមនោះ ដែលអស់ ៣សប្តាហ៍មកហើយធ្វើកូដកម្មមិនព្រមទទួលអាហារ លុះទាល់តែ តាមសំដីមេធាវីគាត់ ឥឡូវធ្លាក់ខ្លួនស្លេកស្លាំង និងស្គមមែនទែន រហូតដល់ជ្រុះធ្មេញខ្លះទៅផង។ គាត់ជាអ្នកស្រុកគ្រីមេ ដែលប្រឆាំងខ្លាំងបំផុតនឹងការភ្ជាប់យកទឹកដីនេះដោយរុស្ស៊ី កាលពីខែមិនាឆ្នាំ ២០១៤។
នៅមានទណ្ឌិតអ៊ុយក្រែនដ៏ល្បីម្នាក់ទៀត គឺអ្នកកាសែតឈ្មោះ Roman Soutchtchenko កាលពីដើមខែ មិថុនានេះ ត្រូវបានតុលាការរុស្ស៊ី កាត់ទោសឲ្យជាប់ក្នុងជំរំកែខ្លួនវិន័យតឹង សម្រាប់រយៈពេល ១២ ឆ្នាំ តាមបទចារកិច្ចប្រឆាំងរុស្ស៊ី ។ រូបគាត់ត្រូវម៉ូស្គូ មន្ទិលថាជាវរសេនីយឯកនៃដេប៉ារតឺម៉ង់ឈ្លបការណ៍អ៊ុយក្រែន។ ប៉ុន្តែ គាត់ច្រានចោល រាល់ការចោទប្រកាន់ទាំងនេះ។
កាលពីឆ្នាំ ២០១៦ ធ្លាប់មានប្រព្រឹត្តទៅ ការដោះដូរយោធារុស្ស៊ី ២ នាក់ ទល់នឹងអតីតអ្នកបើកយន្ដហោះចំបាំងអ៊ុយក្រែន លោកស្រី Nadia Savtchenko ។
បើក្រុងគៀវបង្ហើបឲ្យដឹងថា ខ្លួនត្រៀមដោះដូរពលរដ្ឋរុស្ស៊ី ២៣ នាក់ ដែលជាប់គុកនៅអ៊ុយក្រែន តាមបទ “ចារកិច្ច” ទល់នឹងពួកអ្នកទោសអ៊ុយក្រែន ដែលជាប់នៅរុស្ស៊ីនោះ លោកពូទីនក្នុងថ្ងៃព្រហស្បតិ៍កន្លងទៅ បានថ្លែងថា “គាត់នៅមិនទាន់គិតអំពីការដោះដូរ អ្នកទោសអ៊ុយក្រែន Oleg Sentsov ទល់នឹងរូបលោក Kyrylo Vyshinski ទេ ពីព្រោះករណីជនពីរនាក់នេះ គឺខុសគ្នាស្រឡះ មិនអាចប្រៀបផ្ទឹមគ្នាសោះឡើយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ