អាវុធគីមី៖ហេតុអ្វីបានជាពិភពលោកត្រូវពង្រឹងអំណាចរបស់អង្គការដើម្បីហាមឃាត់អាវុធគីមី?
ចុះផ្សាយនៅថ្ងៃ៖
ស្តាប់ - ០៤:០៩
ចាប់ពីថ្ងៃអង្គារ ទី២៦ដល់ថ្ងៃពុធ ទី២៧ មិថុនា អង្គការដើម្បីហាមឃាត់អាវុធគីមីហៅកាត់ជាភាសាបារាំងថា OIAC បើកជំនួបកំពូលនៅក្នុងទីក្រុងឡាអេ ប្រទេសហូឡង់។ នៅក្នុងជំនួបកំពូលចូលរួមដោយសមាជិកទាំង ១៩៣ប្រទេសត្រូវពិភាក្សាលើសំណើរបស់ប្រទេសអង់គ្លេសក្នុងបន្ថែមសិទ្ធិអំណាចឲ្យស្ថាប័នអន្តរជាតិមួយនេះ។ គឺជាសិទ្ធិអំណាចក្នុងការវែកមុខ និងកំណត់អ្នកដែលបានប្រើអាវុធគីមីនៅក្នុងការវាយប្រហារនានា។ តែនៅក្នុងបរិបទនៃការប្រឈមមុខដាក់គ្នាខ្លាំងរវាងរស្ស៊ី និងបស្ចិមលោកស្តីពីវិបត្តិស៊ីរី ជំនួបកំពូលរបស់ OIAC ពេលនេះអាចនឹងមានភាពតានតឹងខ្លាំង។ ហេតុអ្វីបានជាអាវុធគីមីកំពុងបន្តចោទជាបញ្ហា និងថា ហេតុអ្វីបានជាត្រូវបន្ថែមសិទ្ធិអំណាចឲ្យអង្គការអន្តរជាតិមួយនេះ?
រឿងរ៉ាវទាក់ទងនឹងអាវុធគីមីបានលេចឮខ្ចរខ្ចាយ និងបានធ្វើឲ្យពិភពលោករន្ធត់ចិត្តខ្លាំង បន្ទាប់ពីអាវុធដ៏សាហាវគ្មានរូបរាងច្បាស់លាស់មួយនេះត្រូវបានគេយកទៅប្រើសម្លាប់មនុស្សគ្មានរើសមុខនៅលើសមរភូមិក្នុងជម្លោះប្រទេសអ៊ីរ៉ាក់ និងស៊ីរី។ ថ្មីៗចុងក្រោយនេះទៀត គឺការប្រើអាវុធគីមីបំពុលអតីតចារបុរសរុស្ស៊ី ព្រមទាំងកូនស្រីក្នុងទីក្រុងឡុងដ៏ ប្រទេសអង់គ្លេស និងសម្លាប់លោកគីម ជុងណាមដែលជាបងប្រុសម្តាយទីទៃរបស់មេដឹកនាំកូរ៉េខាងជើងលោកគីម ជុងអ៊ុននៅព្រលានយន្តហោះក្នុងទីក្រុងគូឡាឡាំពួរ ប្រទេសម៉ាឡេស៊ី។ តាមពិតទៅ រឿងអាស្រូវទាក់ទងនឹងអាវុធគីមីបានកើតមានតាំងពីសម័យសង្រ្គាមលោកលើកទី១ មកម្ល៉េះ ពោលមិនមែនទើបតែលេចឡើងនៅលើសមរភូមិនៃជម្លោះផ្ទែក្នុងស៊ីរី ឬអ៊ីរ៉ាក់សព្វថ្ងៃនេះទេ។
ពិតណាស់ថា ការបង្កើតឲ្យមានអង្គការដើម្បីហាមឃាត់អាវុធគីមីហៅកាត់ជាភាសាបារាំង OIAC ក្នុងឆ្នាំ ១៩៩៧ គឺដើម្បីកម្ទេចអាវុធគីមីនៅក្នុងប្រទេសសមាជិកទាំង ១៩៣ប្រទេស។ ចំនួនស្តុកអាវុធគីមីប្រមាណជា ៩៦% ក្នុងលោកត្រូវបានបំផ្លាញចោលក្រោមការតាមដានឃ្លាំមើលពីអង្គការអន្តរជាតិមួយនេះ។ តែបញ្ហានៅត្រង់ថាមកដល់សព្វថ្ងៃ វត្តមាន និងការប្រើអាវុធគីមីនៅបន្តមាន ហើយអង្គការអន្តរជាតិមួយនេះត្រូវបានទទួលការចោទប្រកាន់ពីភាពយឺតយ៉ាវ និងភាពអសកម្មរបស់ខ្លួន។ ម្យ៉ាងទៀត និងទោះបីជាមានរូបភាពកូនក្មេងស្លាប់ និងបានរងរបួសដោយអាវុធគីមីយ៉ាងរន្ធត់នៅក្នុងប្រទេសស៊ីរីក៏ដោយ ក៏សហគមន៍អន្តរជាតិហាក់ពិបាកចាត់វិធានការចាស់ដៃលើអ្នកដែលបានប្រើអាវុធគីមី ពិសេសនៅក្នុងបរិបទនៃភាពចម្រូងចម្រាសរវាងក្រុមប្រទេសបស្ចិមលោក និងប្រទេសរុស្ស៊ីដែលគាំទ្ររបបស៊ីរីរបស់លោកប្រធានាធិបតីអាសាដ។
ប្រទេសអង់គ្លេសបានយល់ឃើញថា មានតែការផ្តល់សិទ្ធិអំណាចបន្ថែមឲ្យអង្គការ OIAC ទេទើបគេអាចទប់ស្កាត់ការប្រើប្រាស់អាវុធគីមីឲ្យមានប្រសិទ្ធិភាពជាងនេះ។ សិទ្ធិអំណាចដែលទីក្រុងឡុងដ៏ចង់និយាយនោះ គឺសិទ្ធិក្នុងការកំណត់អត្តសញ្ញាណអ្នកទទួលខុសត្រូវខាងប្រើអាវុធគីមី។ សំណើរបស់ប្រទេសអង់គ្លេសនេះនឹងត្រូវដាក់ឲ្យសមាជិកទាំង ១៨៩ប្រទេសរបស់អង្គការ OIAC ពិនិត្យ និងអនុម័តនៅក្នុងកិច្ចប្រជុំក្នុងទីក្រុងឡាអេ ប្រទេសហូឡង់។ លោកប្រមុខការទូតអង់គ្លេសបូរីស ចនសុនបានថ្លែងថា អ្វីដែលអង្គការ OIAC ផ្តើមធ្វើមុនគេ គឺទម្លាក់ការទទួលខុសត្រូវលើការវាយប្រហារអាវុធគីមីនៅក្នុងប្រទេសស៊ីរី។ តាមលោកចនសុន អង្គការ OIAC ជាស្ថាប័នជំនាញតែមួយគត់ក្នុងការសិក្សាវែកមុខអ្នកដែលនៅពីក្រោយការវាយប្រហារនៅស៊ីរីនោះ។
តាមការគ្រោងទុក កិច្ចប្រជុំរបស់អង្គការដើម្បីហាមឃាត់អាវុធគីមីនឹងប្រព្រឹត្តទៅរយៈពេល ២ថ្ងៃពីថ្ងៃអង្គារដល់ថ្ងៃពុធ ទី២៧ មិថុនា តែនៅក្នុងបរិបទនៃភាពតានតឹងរវាងប្រទេសរុស្ស៊ី និងក្រុមប្រទេសលោកខាងលិច កិច្ចប្រជុំនេះអាចនឹងពន្យារពេលដល់ថ្ងៃព្រហស្បតិ៍ ទី២៨ មិថុនា ហើយដើម្បីអាចអនុម័តលើសំណើរបស់ប្រទេសអង់គ្លេសបាន លុះត្រាតែមានសម្លេងបោះឆ្នោតគាំទ្រចំនួន ២ភាគ៣ នៅក្នុងសម្លេងទាំង ១៩៣ប្រទេសសមាជិក។ គេនៅមិនទាន់ដឹងថា តើកិច្ចប្រជុំអាចនឹងរកបានកុងសង់ស៊ុសរួមមួយឬអត់ទេ អ្វីដែលគេដឹង រុស្ស៊ីបានចេញមុខរិះគន់ ទិតៀនកិច្ចប្រជុំមួយនេះដោយបានចង្អុលចំមុខប្រទេសអង់គ្លេសដែលជាអ្នកផ្តួចផ្តើមគំនិតថាមានបំណងបំផុសបំផុលឲ្យមានការប្រឆាំងរុស្ស៊ី និងស៊ីរី។
យ៉ាងណាក៏ដោយ នាយកអង្គការ OIAC លោកអាម៉េត យូហ្ស៊ុមគូបានថ្លែងទទួលស្គាល់ថា កង្វះយន្តការណ៍កំណត់អត្តសញ្ញាណអ្នកប្រើអាវុធគីមីជាឧបសគ្គចម្បងនៅក្នុងយុទ្ធនាការទប់ស្កាត់ការបន្តប្រើប្រាស់អាវុធគីមី។ ទន្ទឹមគ្នានេះ លោកយូហ្ស៊ុមគូមិនញញើតព្រមានប្រឆាំងនឹងភាពអសកម្ម និងភាពព្រងើយកន្តើយរបស់សហគមន៍អន្តរជាតិនៅក្នុងបញ្ហានេះដោយបញ្ជាក់ថា វប្បធម៌និទណ្ឌភាពមិនអាចបន្តកើតមាននៅជុំវិញការប្រើប្រាស់អាវុធគីមីបានទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ