អាហ្វហ្គានីស្ថានប្រកាសលុបចោលបទឈប់បាញ់ជាមួយពួកឧទ្ទាមតាលីបង់
នៅថ្ងៃសៅរ៍ ទី៣០មិថុនានេះ លោកប្រធានាធិបតីអាហ្វហ្គានីស្ថាន បានសម្រេចលុបចោលកិច្ចព្រមព្រៀងឈប់បាញ់ជាមួយក្រុមតាលីបង់។ គឺជាកិច្ចព្រមព្រៀងសន្តិភាពដែលលោកបានស្នើឡើងដោយខ្លួនឯង និងដែលទើបតែធ្វើបានជាង២សប្តាហ៍ប៉ុណ្ណោះ។
ចុះផ្សាយនៅថ្ងៃ៖
«ចប់ហើយបទឈប់បាញ់! កម្លាំងទ័ពទាហាន និងក្រុមសន្តិសុខអាហ្វហ្គានីស្ថាន ត្រូវអនុញ្ញាតឲ្យកាន់កាំភ្លើងធ្វើប្រតិបត្តិការសឹករបស់ខ្លួនឡើងវិញ»។ នេះគឺជាសម្តីរបស់លោកប្រមុខរដ្ឋអាហ្វហ្គានីស្ថាន Ashraf Ghani ដែលបានប្រកាសនៅចំពោះមុខអ្នកកាសែត ក្នុងទីក្រុងកាប៊ូល។ ការប្រកាសយ៉ាងដូច្នេះ គឺស្មើនឹងការលុបចោលកិច្ចព្រមព្រៀងឈប់បាញ់គ្នា ដែលបង្កការភ្ញាក់ផ្អើលមែនទែន។ ភ្ញាក់ផ្អើលដ្បិតថា លោក Ashraf Ghani បានប្រកាសស្នើកុំឲ្យបាញ់គ្នា កាលពីដើមខែនេះ គឺស្នើធ្វើឡើងដោយម្នាក់ឯង ហើយនៅពេលនេះ លោកសម្រេចលុបចោលវិញ ក៏ធ្វើតែម្នាក់ឯងដែរ។
កាលពីពេលដែលលោកប្រមុខរដ្ឋអាហ្វហ្គានីស្ថានស្នើសុំឲ្យមានកិច្ចព្រមព្រៀងសន្តិភាពជាមួយពួកតាលីបង់ គឺបានធ្វើឲ្យប្រជាពលរដ្ឋនិងសហគមន៍អន្តរជាតិ អបអរសារទយ៉ាងខ្លាំង។ សេចក្តីស្នើឲ្យឈប់បាញ់គ្នានោះ គឺមិនត្រឹមតែឈប់បំផ្ទុះជាមួយពួកតាលីបង់ប៉ុណ្ណោះទេ គឺឈប់ឲ្យមានភេរវកម្មពីពួកអង្គការរដ្ឋអ៊ីស្លាមដែរ។ សំណើសន្តិភាពនេះ គឺត្រូវគេរំពឹងថា អាចនឹងបិទបញ្ចប់ជម្លោះប្រដាប់អាវុធ និងអំពើភេរវកម្មនៅក្នុងប្រទេស ដែលអូសបន្លាយប្រមាណ៤០ឆ្នាំមកហើយ។
គួរបញ្ជាក់ថា បើទោះបីជាប្រមុខរដ្ឋាភិបាលអាហ្វហ្កានីស្ថាន បានប្រកាសឲ្យធ្វើសង្រ្គាមឡើងវិញ ជាមួយពួកឧទ្ទាមមែន ប៉ុន្តែលោកក៏មិនភ្លេចទាមទារឲ្យមានការចរចាសន្តិភាពជាមួយ គូសត្រូវដែរ។ តែយ៉ាងណាក៏ដោយ អ្នកតាមដានស្ថានការណ៍នៅអាហ្វហ្គានីស្ថាន កត់សម្គាល់ថា រាល់សេចក្តីស្នើឲ្យមានកិច្ចចរចាសន្តិភាពរវាងគ្នា គឺតែងតែត្រូវពួកឧទ្ទាមតាលីបង់បដិសេធច្រានចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ