អ្នកកាសែតដែលគេសម្លាប់នៅអាហ្វ្រិកកណ្តាល កំពុងស៊ើបអង្កេតលើក្រុមហ៊ុនដែលស្និទ្ធនឹងក្រេមឡាំង
ចុះផ្សាយនៅថ្ងៃ៖
ស្តាប់ - ០៥:៥៥
គ្មានតម្លាភាព ខ្លាំងពូកែ និងជួនកាល មិនអាចត្រួតត្រាបាន ក្រុមហ៊ុន Wagner តែងការពារផលប្រយោជន៍វិមានក្រេមឡាំង ហើយ ការពារនេះ គឺនៅលើសមរភូមិផ្ទាល់ ជាបឋម នៅស៊ីរី។ ក្រុមហ៊ុនWagnerនេះ ត្រូវបានអ្នកកាសែតរុស្ស៊ី ៣ នាក់ ធ្វើអង្កេត លុះទាល់តែត្រូវគេលួចបាញ់សម្លាប់ នៅសាធារណរដ្ឋអាហ្វ្រិកកណ្តាល។
អ្នកយកការណ៍អំពីសង្គ្រាម លោក Orkhan Djemal អ្នកចងក្រង ខ្សែភាពយន្តឯកសារ លោក Alexandre Rastorgouiev ហើយនិងអ្នកកាន់កាមេរ៉ា ថត លោក Kirill Radtchenko បានគ្រោង ”ថតរូបភាពអំពីសកម្មភាព ក្រុមហ៊ុនយោធាឯកជន Wagner នៅសាធារណរដ្ឋអាហ្វ្រិកកណ្តាល - ការនេះ ពន្យល់បំភ្លឺដោយ មជ្ឈមណ្ឌលគ្រប់គ្រងការស៊ើបអង្កេត ជាគម្រោងបង្កើតឡើង ដោយ អតីតមហាសេដ្ឋីរុស្ស៊ី លោក Mikhail Khodorkovski ដែលក្លាយជាគូប្រឆាំងនឹងក្រេមឡាំង និងសព្វថ្ងៃកំពុងរស់នៅក្នុងស្ថានភាពនិរទេស ហើយដែលអ្នក កាសែតទាំង ៣ នាក់នោះ បានសហការ ជាមួយ។
-ពី អ៊ុយក្រែន រហូតដល់ ស៊ីរី
ក្រុមហ៊ុន Wagner ត្រូវបានបង្កើតឡើង ដោយអតីតនាយទាហាន នៃ ស្ថាប័នឈ្លបការណ៍រុស្ស៊ី GRU លោក Dmitri Outkine ដែលបានស្ថិតនៅ ក្នុងក្រុមពួកទាហានស៊ីឈ្នួល ស្រករទី១ បញ្ជូនទៅ ស៊ីរី ក្នុងឆ្នាំ ២០១៣។
តាមប្រព័ន្ធផ្សព្វផ្សាយ និងស្ថាប័នសម្ងាត់អ៊ុយក្រែន ចាប់ពីខែមិថុនាឆ្នាំ២០១៤ លោក Dmitri Outkine បាន ចូលរួមក្នុងយុទ្ធនាការ នៅតំបន់បះបោរខាងកើត ប្រទេសនេះ ដោយច្បាំង នៅខាងពួកផ្តាច់ទឹកដីរុស្ស៊ីនិយម។ នៅតំបន់នេះ រុស្ស៊ី មិនដែលទទួលស្គាល់ទេ វត្តមានយោធារបស់ខ្លួន ទាំងច្រានចោលការចោទប្រកាន់ ពី ខាង ក្រុងគៀវ និង បស្ចិមលោក។
ជាពិសេស នៅស៊ីរី ក្រុមហ៊ុន Wagner បានសកម្ម នៅទន្ទឹមនឹងកងទ័ពរុស្ស៊ីតែម្តង។ កងទ័ពដែលបាន អន្តរាគម នៅទីនោះតាំងពីខែកញ្ញាឆ្នាំ ២០១៥ ដោយគាំទ្ររបបលោកប្រធានាធិបតី Bachar al-Assad និង ដោយ ដើរតួចម្បង ក្នុងប្រតិបត្តិការកងកម្លាំងរុស្ស៊ី នៅប៉ែកខាងកើតស៊ីរី រំដោះបានមកវិញ បុរីបេតិកភណ្ឌ ពិភពលោក ក្រុង Palmyre។
ក្រុមហ៊ុន Wagner ធ្លាក់ខ្លួនជាប់ ក្នុងរង្វង់រឿងអាស្រូវ នៅខែកុម្ភៈ ពេលដែលក្រុងវ៉ាស៊ីនតោន បានប្រកាស ថាបានសម្លាប់ យ៉ាងហោចណាស់អស់ ១០០ នាក់ ពួកអ្នកច្បាំង នៅខាងរបបនោះ ក្នុងតំបន់ Deir Ezzor ជាចម្លើយតបនឹងការវាយប្រហារ ទៅលើសេនាធិការដ្ឋាន ពួកយុទ្ធជនគួដ និងអារ៉ាប់ស៊ីរី ដែលគាំទ្រដោយ សរអា។
ពេលនោះ ម៉ូស្គូ បានទទួលស្គាល់ថា មានស្លាប់អស់ ៥ នាក់ និង របួស”រាប់សិបនាក់” ក្នុងចំណោមអ្នកច្បាំង ដែលស្ថិតនៅស៊ីរី ទៅតាម ”គំនិតផ្តួចផ្តើមរបស់ពួកគេផ្ទាល់” ប៉ុន្តែ ស្របនឹងតុល្យាការខ្លះ ចំនួនអ្នកស្លាប់ គឺដល់ទៅ ជាង ២០០ នាក់ឯណោះ ក្រោយពីមាន កំណត់អត្តសញ្ញាណពួកសមាជិកក្រុម Wagner។
ទស្សនាវដ្តី Republic យោងទៅលើប្រភពសន្តិសុខរុស្ស៊ី បានឲ្យដឹងថា មានទាហានស៊ីឈ្នួល ២.៥០០ នាក់ ច្បាំងនៅស៊ីរី ក្នុងខែមីនាឆ្នាំ២០១៦ ដែលពីក្នុងនោះ អ្នកច្បាំងមែនពិត គឺ ១.៦០០ នាក់ ប្រើប្រាស់ ថវិកា ៣៥០ លានដុល្លារ តាំងពីមានចាប់ផ្តើមប្រតិបត្តិការមក។
-ចំណងល្អក់កករ ជាមួយក្រេមឡាំង
នៅខែធ្នូ ឆ្នាំ ២០១៦ លោក Dmitri Outkine ត្រូវបានទទួលជួបក្នុងវិមានក្រេមឡាំង បញ្ចាំងឲ្យឃើញតាម ទូរទស្សន៍ ក្នុងពិធីបំពាក់ឋានន្តរស័ក្តិ ជា “ វីរបុរស” ជូនបណ្តាយុទ្ធជនដែលបានច្បាំង នៅស៊ីរី។ ថ្ងៃនោះឯង គាត់បានឈរថតរូប ជាមួយលោក ប្រធានាធិបតី វ៉្លាឌីមៀរ ពូទីន។
អ្នកផ្តល់លុយដល់ក្រុមហ៊ុននោះ គឺ សេដ្ឋីឈ្មោះ Evgueni Prigojine អ្នករកស៊ី ដែលជំនិតនឹងលោកពូទីន ហើយ មានបាន ដោយធ្វើជាថៅកែ បណ្តាញភោជនីយដ្ឋាន ដែលចុះ កុងត្រាច្រើនឥតគណនា ជាមួយ ខុទ្ទកាល័យប្រធានាធិបតីរុស្ស៊ី។ ឈ្មោះសេដ្ឋីនេះ ត្រូវបានក្រសួងយុត្តិធម៌អាមេរិកាំង ចោទថាជា ដើមហេតុ នៃ ការបង្ហោះសារតាមអ៊ិនធ័ណេត ជួយឲ្យលោក ដូណាល់ ត្រាំ ឈ្នោះឆ្នោត ក្នុងឆ្នាំ ២០១៦។
ប៉ុន្តែតាមពួកអ្នកជំនាញ ដោយមកពីភាពតានតឹងជាមួយកងទ័ពរុស្ស៊ី នៅលើសមរភូមិស៊ីរី និង មកពី ការប្រជែងគ្នាដើម្បីឥទ្ធិពលក្រុងម៉ូស្គូ ក្រុមហ៊ុន Wagner ក្នុងឆ្នាំ ២០១៦ បានបាត់បង់ជំនឿទុកចិត្ត ពីក្រសួងការពារជាតិរុស្ស៊ី ដែលតែងបានផ្គត់ផ្គង់ ដោយរីករាយ ទៅឲ្យក្រមហ៊ុននោះ ជាអាវុធ និងសម្ភារៈ។
មកពីមូលហេតុនេះ បានជា ក្រុមហ៊ុន Wagner ស្វែងរក ការចុះកុងត្រាផ្សេងៗ ជាអាទិ៍ ជាមួយ របបនៅស៊ីរី ដើម្បីតាំងឡើងវិញ ការត្រួតត្រាលើបណ្តាញអណ្តូងប្រេង នៅស៊ីរី គ្រាន់នឹងទទួលបានប្រយោជន៍ ភាគមួយនៃ “មាសខ្មៅ”នោះ ។
-ឧបករណ៍ជាអាថ៏កំបាំង នៅ ប្រទេសអាហ្វ្រិកកណ្តាល
ម៉ូស្គូ ត្រូវបានរំដោះឲ្យរួចពន្ធ ពីការលក់អាវុធទៅឲ្យរដ្ឋាភិបាលអាហ្វ្រិកកណ្តាល ។ ចាប់ពីដើមឆ្នាំ ២០១៨ មក រុស្ស៊ី ក៏បានដាក់ឲ្យប្រចាំការ នៅអាហ្វ្រិកកណ្តាល គឺ ពួកគ្រូបង្វឹកយោធា បានបញ្ជូន អាវុធទៅបំពាក់ កងទ័ពជាតិប្រទេសនោះ និង ធានាសន្តិសុខដល់លោកប្រធានាធិបតី Faustin –Archange Touadéra ដែលមាន យោធាជាតិរុស្ស៊ី ធ្វើជា ទីប្រឹក្សាសន្តិសុខ របស់គាត់។
ម៉ូស្គូ បានបញ្ជាក់ កាលពីខែមីនា អំពីការបញ្ជូន នាយទាហាន ៥ នាក់ និង “ គ្រូបង្វឹកយោធា” ១៧០ នាក់ ដើម្បីជួយបង្កើតឲ្យបានជា កងទ័ពអាហ្វ្រិកកណ្តាល។ ចំណែកក្រុមអង្កេតឈ្មោះ Conflict Intelligence Team ហៅកាត់ថា CIT បានប្រមាណអំពី ឃ្លាខាងលើ ថា” អាចប្រហែលជា របាំង នៃ កងវរសេនាធំ របស់ ក្រុមហ៊ុន Wagner”។
តាមអ្នកជំនាញយោធារុស្ស៊ី លោក Pavel Feiguenhauer “ ប្រទេសរុស្ស៊ី គ្មានផលប្រយោជន៍ភូមិសាស្ត្រ-នយោបាយ នៅអាហ្វ្រិកកណ្តាលទេ ខុសពីនៅស៊ីរី “ ចំណែក “ក្រុមហ៊ុន Wagner ច្បាស់ជាស្វែងរកប្រាក់ ចំណូល គឺនៅ អាហ្វ្រិកកណ្តាល តែម្តង”។ គាត់ពន្យល់ថា ៖នៅអាហ្វ្រិក ពួកទាហានស៊ីឈ្នួល រកចំណូល បានក្រាស់ក្រែល ជាងនៅតំបន់ខាងកើតអ៊ុយក្រែន ដោយនៅទីនោះ គេត្រូវការមែនទែនទាហានស៊ីឈ្នួល។ ដូច្នេះ មានមនុស្សជាច្រើន នៅរុស្ស៊ី ត្រៀមទៅស្វែងរកប្រាក់ចំណូល នៅអាហ្វ្រិក។ ប៉ុន្តែ “បើគ្មានភ្លើងខៀវពី ក្រេមឡាំងទេ ក្រុមហ៊ុន Wagner មិនដាច់ចិត្តទៅទីនោះឡើយ”។
បើជាផ្លូវការ កម្មវិធី រុស្ស៊ី តម្រង់ទៅ ពង្រឹងកងទ័ពអាហ្វ្រិកកណ្តាល ដែលស្ថិតក្នុង ស្ថានភាពយ៉ាប់យ៉ឺន នោះ ម៉ូស្គូ ក្នុងពេលជាមួយគ្នា ក៏ ប្រាថ្នាបង្កើនឥទ្ធិពលខ្លួនក្នុ ងប្រទេសនោះឯង ជាទីដែលសម្បូណ៍ដោយ ធនធានធម្មជាតិ បែបយ៉ាង មាស ពេជ្រ ឈើព្រៃ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ