ប្រធានាធិបតីតួកគីលោកអ៊ែរដូហ្កានដំឡើងសម្លេងដាក់ទីប្រឹក្សាសន្តិសុខជាតិអាមេរិកលោកចន បុលតុន
នៅក្នុងប្រទេសតួកគី លោកប្រធានាធិបតីអ៊ែរដូហ្កានបានបញ្ចេញកំហឹងប្រឆាំងនឹងទីប្រឹក្សាសន្តិសុខជាតិអាមេរិកលោកចន បុលតុន។ លោកបុលតុនដែលបានទៅតួកគីដើម្បីនិយាយជាមួយលោកអ៊ែរដូហ្កានពីគម្រោងដកទ័ពអាមេរិកចេញពីប្រទសេស៊ីរី។ តែទីបំផុត លោកចន បុលតុនបានចាកចេញពីទឹកដីតួកគីនៅរសៀលថ្ងៃអង្គារ ទី៨ មករាដោយមិនបានជួបលោកអ៊ែរដូហ្កាន និងថែមទាំងបានបញ្ឆេះកំហឹងប្រធានាធិបតីតួកគីរូបនេះទៀតផង។ តើលោកអ៊ែរដូហ្កានក្តៅក្រហាយនឹងលោកបុលតុនលើរឿងអ្វី ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ភាពចម្រូងចម្រាសរវាងតួកគី និងសហរដ្ឋអាមេរិក គឺទាក់ទងនឹងកងកម្លាំងគួដឌីស្ថាននៅស៊ីរី។ សម្រាប់ទីក្រុងវ៉ាស៊ីនតោន និងប្រទេសបស្ចិមលោកមួយចំនួន ពួកគួដឌីស្ថានស៊ីរីជាដៃគូនៅក្នុងយុទ្ធនាការប្រឆាំងនឹងពួកជីហាតអង្គការរដ្ឋអ៊ីស្លាមនៅទឹកដីស៊ីរី។ តែសម្រាប់ទីក្រុងអង់ការ៉ាវិញ កម្លាំងប្រដាប់អាវុធគួដឌីស្ថានស៊ីរីជាចលនាភេរវនិយមដែលត្រូវកម្ទេចចោល។ អស់ជាច្រើនសប្តាហ៍កន្លងមក តួកគីបានគំរាមបើកការវាយប្រហារទ្រង់ទ្រាយធំលើទីតាំងរបស់កម្លាំងគួដឌីស្ថានស៊ីរីនៅប៉ែកខាងជើងស៊ីរី។ មុននឹងទៅដល់តួកគីក្នុងថ្ងៃចន្ទ និងចាកចេញវិញនៅរសៀលថ្ងៃអង្គារ ទី៨ មករា ទីប្រឹក្សាសន្តិសុខជាតិអាមេរិកលោកចន បុលតុនបានទៅបំពេញទស្សនកិច្ចក្នុងប្រទេសអ៊ីស្រាអែល។
នៅទីនោះ លោកចន បុលតុនបានថ្លែងច្បាស់ៗពីគម្រោងដកទ័ពអាមេរិកចេញពីទឹកដីស៊ីរីដែលលោកដូណាល់ ត្រាំបានប្រកាសកាលពីខែធ្នូឆ្នាំ ២០១៨។ តែលោកបុលតុនបានភ្ជាប់រឿងដកទ័ពអាមេរិកពីស៊ីរីនេះទៅនឹងលក្ខខណ្ឌមួយដោយទាមទារឲ្យតួកគីកុំឲ្យវាយប្រហារលើកម្លាំងប្រដាប់អាវុធគួដឌីស្ថានស៊ីរី។ លក្ខខណ្ឌមួយនេះត្រូវបានលោកចន បុលតុនលើកទៅនិយាយផ្ទាល់ជាមួយលោកអ៊ីប្រាហ៊ីម កាលីន អ្នកនាំពាក្យប្រធានាធិបតីតួកគី។ « សម្តីរបៀបនេះរបស់លោកចន បុលតុនមិនអាចឲ្យយើងទទួលយកបានទេ ហើយវាពិតជារឿងដែលមិនអាចទៅរួចឡើយ » នេះជាការថ្លែងរបស់លោកអ៊ែរដូហ្កាននៅចំពោះមុខសមាជិកសភានៃគណបក្ស AKP ក្នុងថ្ងៃអង្គារ ទី៨ មករា។
មនុស្សខ្លាំងតួកគីរូបនេះដដែលបានយល់ឃើញថា លោកបុលតុនបានប្រព្រឹត្តកំហុសឆ្គងមួយធ្ងន់ធ្ងរ និងបានបញ្ជាក់ជាថ្មីថា ពួកគួដឌីស្ថានស៊ីរី និងពួកជីហាតអង្គការរដ្ឋអ៊ីស្លាមសុទ្ធសឹងជាពួកភេរវជនដែលតួកគីត្រូវចាត់ការកម្ទេច។ តាមកាសែតគាំទ្ររដ្ឋាភិបាលតួកគី លោកអ៊ែរដូហ្កានបានបដិសេធមិនទទួលជួបលោកបុលតុន។ តែអ្នកនាំពាក្យប្រធានាធិបតីតួកគីលោកកាលីនបានបញ្ជាក់ថា គម្រោងជំនួបរវាងលោកអ៊ែរដូហ្កាន និងលោកបុលតុនមិនមានចែងនៅក្នុងកម្មវិធីនៃទស្សនកិច្ចរបស់លោកបុលតុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ