អំពីចលនាប្រឆាំង នៅរុស្ស៊ី ក្រោយ ឃាតកម្មលើមេម្នាក់របស់គេ មួយសប្តាហ៍មុន
ចុះផ្សាយនៅថ្ងៃ៖
ស្តាប់ - ០៥:២៦
សំនួរដែលចោទសួរ គឺថា តើបក្សប្រឆាំងនៅរុស្ស៊ី បាក់ស្បាតទៅហើយ ឬមួយ ក៏នៅ តែប្តេជ្ញាតស៊ូ ដដែល? កាលពីយប់ថ្ងៃសុក្រ ទី ២៧ កុម្ភៈ គឺមួយសប្តាហ៍ គត់ ដែលនៅចំកណ្តាលរដ្ឋធានីរុស្ស៊ី នៅចម្ងាយតែ ២០០ម៉ែត្រប៉ុណ្ណោះពីកំពែង វិមានក្រេមឡាំង ជនឧក្រិដ្ឋដៃដល់ បានបាញ់យ៉ាង ព្រហើន ផ្តាច់ជីវិត រូបមេបក្សប្រឆាំងដ៏ល្បីម្នាក់ នៅរុស្ស៊ី គឺលោក បូរិស ញ៉េមសូវ។
គួរនិយាយថា សោកនាដកម្មនេះ បន្តស្ថិតនៅ ក្នុងការយកចិត្តទុកដាក់របស់ មជ្ឈដ្ឋានអ្នកនយោបាយ ទាំងខាងបក្សប្រឆាំង ទាំងខាងបក្សកាន់អំណាច។ ប្រាកដណាស់ ដែលមតិរបស់គេ គឺផ្ទុយគ្នាស្រឡះ។ ក្នុងវេទិកាពិភាក្សា ដែលផ្សាយបន្តផ្ទាល់ តាម ទូរទស្សន៍ ខាងបក្សប្រឆាំងចោទរដ្ឋអំណាចថា ប្រើឃាតកម្មនេះសម្រាប់ បង្កើតជាបរិយាកាសបំភិតបំភ័យ ក្នុងប្រទេស ដើម្បីនៅទីបំផុត បង្ក្រាបចលនាប្រឆាំង។ ចំណែក ការចោទប្រកាន់ពីខាង ពួកអ្នកនយោបាយនៃបក្សកាន់អំណាច បន្លឺឡើង ក្នុងន័យថា ឧក្រិដ្ឋកម្ម ដ៏កំសាកនេះ ចាត់ចែងឡើង ដោយមានចារកិច្ចបស្ចិមលោក ស្ថិតនៅពីក្រោយ ដើម្បីភ្លាមនោះ ប្រើជា លេសទម្លាក់ទោស លើរូបពូទីនតែម្តង ថា ជាមេដឹកនាំមិនអាចទ្រាំបាននឹងមតិទិតៀន។
ជាទឡ្ហីករណ៍ ទូរទស្សន៍រដ្ឋរុស្ស៊ី បញ្ចាំងហើយ បញ្ចាំងទៀត រូបភាពជាករណីមិនធ្លាប់មានដូច ដែលឯកអគ្គរដ្ឋទូតស.រ.អា. និង ឯកអគ្គរដ្ឋទូត ទាំង២៨ ប្រទេសនៃសហភាពអឺរ៉ុប នាំគ្នាដាក់បាច់ផ្កា នៅ ត្រង់កន្លែងឃាតកម្មរូបលោក បូរិស ញ៉េមសូ ។ ទូរទស្សន៍ ក៏បញ្ចាំងឲ្យឃើញ ប្រតិកម្មរស់រវើក បញ្ចេញមុនគេ ក្នុងចំណោមមេដឹកនាំបស្ចិមលោក គឺដោយលោកប្រធានាធិបតីអាមេរិកាំង បារ៉ាក់ អូបាម៉ា ទាំងចោទជាសំនួរ ដោយងឿងឆ្ងល់ តើការយកចិត្តទុកដាក់បែបនេះ បង្កប់ដោយ គោលដៅយ៉ាងណាដែរ? ទន្ទឹមនេះ ប្រព័ន្ធផ្សព្វផ្សាយរុស្ស៊ី លើកយកមកសូត្រ គឺចំណងជើង ព្រោងព្រាត របស់កាសែត បស្ចិមលោក ដែលថា “ ឃាតកម្មលើ រូបមេប្រឆាំងទល់នឹងរបបពូទីន ប្រព្រឹត្ត គឺ នៅជាប់នឹងកំពែងវិមានក្រេមឡាំងតែម្តង។
ថ្លែងថ្ងៃពុធ ទី៤មីនា ក្នុងសម័យប្រជុំថ្នាក់ដឹកនាំក្រសួងមហាផ្ទៃ គឺមួយថ្ងៃ ក្រោយពីមានប្រព្រឹត្ត ទៅ ពិធីបញ្ចុះសពលោក បូរិស ញ៉េមសូវ លោកប្រធានាធិបតី ពូទីន បានទាមទារយ៉ាងកំហិត ពីក្រសួងមហាផ្ទៃឲ្យសំអាតប្រទេសរុស្ស៊ី ពី ក្តីអាម៉ាស់ និង ពីសោកនាដកម្ម ដែលនាំឲ្យសង្គម ផ្អើលឆោឡោ បែបយ៉ាង ឃាតកម្ម យ៉ាងគម្រក់ លើរូបអ្នកនយោបាយ បូរិស ញ៉េមសូវ។ តាម ប្រសាសន៍លោកពូទីន ជាការចាំបាច់ សម្រាប់ក្រសួងមហាផ្ទៃដែលត្រូវចាត់វិធានការយ៉ាងណា កុំបណ្តោយឲ្យមានឧក្រិដ្ឋកម្មប្រភេទបែបនេះ នៅចំកណ្តាលបេះដូងរដ្ឋធានីទៀតឡើយ ដែល ចំហាយវា នាំឲ្យប៉ះពាល់ ដល់មុខមាត់ប្រទេសជាតិ។
តើពួកមេប្រឆាំង នៅរុស្ស៊ី ជានរណា។ គេជាមនុស្សដែលបស្ចិមលោកនិយម។ បុគ្គលពួកគេ តែងស្វាគមដោយស្ថានទូត បណ្តាប្រទេសលោកខាងលិច ជាពិសេស ដោយស្ថានទូតអាមេរិក ដែលគេត្រូវអញ្ជើញឲ្យមានវត្តមាន ក្នុងពិធីនេះ ឬនោះ។ អាជ្ញាធររុស្ស៊ី ដៀមដាមឲ្យពួកគេថា ចេញ ចូលស្ថានទូតលោកខាងលិច គឺដើម្បីទទួល លុយ ដំបូន្មាន និង អនុសាសន៍ សម្រាប់ ដំណើរការ ដោយចាត់ទុកពួកគេជា រនុកក្នុង របស់បស្ចិមលោក។ ប៉ុន្តែ សកម្មភាពពួកគេ ពិតជាស្ថិតនៅ ក្រោមក្រសែភ្នែក ស្ថាប័នសន្តិសុខរុស្ស៊ី។ ពួកប្រឆាំងនេះ គឺពួកដែលនៅក្រៅ ប្រព័ន្ធអំណាច ដោយគេគ្មានអាសនៈប្រចាំ ក្នុងសភាឌូម៉ាទេ។
តាមតួលេខក្រសួងយុត្តិធម៌ បច្ចុប្បន្ន នៅរុស្ស៊ី មានគណបក្សនយោបាយចំនួន ៧៧ បានទទួល ការចុះឈ្មោះ ជាផ្លូវការ ក្នុងបញ្ជីក្រសួងនេះ ដើម្បីធ្វើសកម្មភាព។ ពីក្នុងនោះ មានតែ ៤ គណបក្ស ប៉ុណ្ណោះ ដែលក្នុងការបោះឆ្នោត ចេះដណ្តើមបានអាសនៈ នៅរដ្ឋសភា។ គណបក្ស នៅរុស្ស៊ី អាចត្រូវបែងចែក ជាគណបក្សស្តាំ សេរីនិយម កណ្តាលនិយម ឆ្វេង ឆ្វេងជ្រុល កុម្មុយនិស្ត ជាតិនិយម ជាតិនិយមផុតលេខ គណបក្សពលករ គណបក្សប្រឆាំងអំពើពុករលួយ។ល។ ចំណែកពាក្យថា សេរីនិយម ឬ ប្រជាធិបតេយ្យ គឺ អាស្រ័យ នឹងគេបំពាក់វា បន្ថែមពីលើ។
ដើម្បីបង្កើតជាគណបក្ស បើជំនាន់លោក ពូទីន ជាប្រធានាធិបតី ពីរអាណត្តិដំបូង គឺត្រូវមាន សមាជិកយ៉ាងហោច ណាស់ ៤០.០០០នាក់ នោះក្នុង ចន្លោះពីឆ្នាំ២០០៨ ដល់២០១២ ពេលដែល តួនាទីកំពូលនេះ បំពេញដោយលោក មេដវេដេវ ស្របនឹងគំនិតផ្តួចផ្តើមរបស់គាត់ សភាឌូម៉ា បានបន្ថយចំនួននេះ ឲ្យចុះអស់៨០ដង មកនៅត្រឹម ៥០០នាក់ប៉ុណ្ណោះ។ ជាការកត់សម្គាល់ សម្ព័ន្ធ “គណបក្សសាធារណរដ្ឋរុស្ស៊ី និង គណបក្សសេរីភាពប្រជាជន “ ហៅថា RPR-PARNAS ដែលធ្លាប់មានលោក បូរិស ញ៉េមសូវ ជាសហប្រធាន គឺមានសមាជិកជាង ១សែន៤ពាន់នាក់។ បក្សប្រឆាំងដ៏ល្បីមួយទៀតឈ្មោះ ប្រទេសរុស្ស៊ីមុខមាត់ផ្សេង មានសមាជិក ៥ម៉ឺន២ពាន់នាក់។
ពិតជាបក្សប្រឆាំងទាំងពីរនេះ ដែលតែងនាំមុខ រលកតវ៉ា បាតុកម្ម ក្បួនយាត្រាពួកអ្នកជំទាស់ ក្រោមពាក្យស្លោកទាមទារ ពីលោកប្រធានាធិបតីពូទីន ឲ្យលាចេញពីមុខតំណែង ក្រោមលេស ថា “អំណាចពូទីន បំបិទសេរីភាព”, “អំណាចពូទីន ជា អំណាច ផ្តាច់ការ”។ ពួកគេបានប្រកាស ទៅហើយ អំពីគម្រោងធ្វើ ក្បួនយាត្រាជាថ្មី ក្នុងខែមេសាខាងមុខ។
ជាការកត់សម្គាល់ ក្នុងខែកុម្ភៈកន្លងទៅ ពេលដែល នៅអ៊ុយក្រែនគម្រប់បាន១ឆ្នាំ ខួបនៃ បដិបត្តន៍មានពណ៌ ហៅថា បដិវត្តន៍ម៉ៃដាន់ នៅរុស្ស៊ី មានបង្កើតឡើងទៅហើយ ជា ចលនា ក្រោមឈ្មោះថា ប្រឆាំងម៉ៃដាន់ ដែលតាំងគោលដៅ កំចាត់មិនឲ្យមានការដណ្តើមយកអំណាច ដោយវិធីហិង្សា បោកកញ្ជ្រោក តាមចិញ្ចើមថ្នល់ ឬ តាមទីលាន ដូចនៅអ៊ុយក្រែនឡើយ។ ដ្បិត តាមយោបល់ចលនានេះ បដិវត្តន៍មានពណ៌ មុខជានាំមកនូវ អស្ថិរភាពដល់ប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ