មេបក្សប្រឆាំងរុស្ស៊ី Boris Nemtsov ត្រូវគេបាញ់សម្លាប់នៅកណ្តាលក្រុងម៉ូស្គូ
លោក Boris Nemtsov អតីតទេសរដ្ឋមន្រ្តីរុស្ស៊ី និងជាអ្នកនយោបាយដែលតែងតែរិះគន់ នយោបាយផ្តាច់ការរបស់លោកពូទីន ត្រូវបានជនមិនស្គាល់មុខ បាញ់សម្លាប់ នៅកណ្តាលក្រុងម៉ូស្គូ ក្នុងវេលាយប់ថ្ងៃសុក្រ ទី ២៧ កុម្ភៈ។ ឃាតកម្មដ៏សាហាវនេះ កើតឡើងចំពេលដែលបរិយាកាសនយោបាយនៅរុស្ស៊ី មានភាពអួរអាប់ ជុំវិញបញ្ហានៅអ៊ុយក្រែន។ លោក Boris Nemtsov ធ្លាប់បានអំពាវនាវ ឲ្យប្រជាជនងើបក្រោកឈរឡើង ធ្វើការប្រឆាំងនឹងអំណាចផ្តាច់ការរបស់ពូទីន ព្រមទាំងទាមទារឲ្យរដ្ឋាភិបាលរបស់ ពូទីន បញ្ឈប់ការឈ្លានពាន ទៅលើអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:៤៣
លោក Boris Nemtsov ជាមេដឹកនាំក្រុមអ្នកនយោបាយប្រឆាំង នៅរុស្ស៊ី។ ប៉ុន្តែមិនមែនគ្រាន់តែប្រឆាំងធម្មតាទេ គឺលោក Boris Nemtsov នេះ បានប្រឆាំងយ៉ាងពេញមុខតែម្តង។ ក្នុងចំណោមអ្នកនយោបាយរុស្ស៊ី មានតែគាត់ម្នាក់គត់ ដែលហ៊ាននិយាយរិះគន់ចំៗ ទៅលើលោកប្រធានាធិបតីពូទីន។ ឧទាហរណ៍ ទាក់ទិនទៅនឹង អំពើពុករលួយ ស៊ីរូង នៅក្នុងចំណោមមន្រ្តីធំៗ របស់រដ្ឋាភិបាលលោក ពូទីន ហើយជាពិសេស គឺនយោបាយផ្តាច់ការ មហិច្ឆិតាឈ្លានពានប្រទេសជិតខាង របស់លោក ពូទីនតែម្តង។
នរណាជាឃាតករ?
កាលពី ២សប្តាហ៍មុននេះ លោក Boris Nemtsov ធ្លាប់បានប្រាប់អ្នកកាសែត ក្នុងបទសម្ភាសន៍មួយថា លោក មានការព្រួយបារម្ភ ថា គេអាចនឹងមានគម្រោង ធ្វើឃាតលោក ដោយសារតែសកម្មភាពប្រឆាំង រិះគន់របស់លោក។ ដូចការដែលគាត់ បារម្ភមែន នៅយប់ថ្ងៃសុក្រ ម៉ោងប្រមាណជា ១១-៤០នាទីយប់ នៅកណ្តាលក្រុងម៉ូស្គូ ក្បែរវិមានក្រឹមឡាំងតែម្តង ឃាតករបានមកបាញ់សម្លាប់គាត់ ក្នុងពេលដែលគាត់ កំពុងដើរឆ្លងស្ពានមួយ។
សេចក្តីរាយការណ៍របស់ កែវ ឆាយា ពីក្រុង ម៉ូស្គូ
រឿងចៃដន្យវាមិនអាចទៅរួចនោះទេ។ ហេតុផលនយោបាយ គឺជាចំណុចតែមួយគត់ ដែលគេយល់ថាវាជាកម្មវត្ថុរបស់ឃាតកម្ម ដ៏គួរឲ្យរន្ធត់នេះ។ លោកពូទីន ខ្លួនគាត់ផ្ទាល់ បានទទួលស្គាល់ថា នេះជាឃាតកម្មស៊ីឈ្នួល ដោយមាននរណាម្នាក់ ជួលឃាតករឲ្យសម្លាប់ ដើម្បីដាក់បន្ទុក ទៅលើរដ្ឋាភិបាលរុស្ស៊ី។ សំណួរគេសួរគ្រប់មាត់ ថានរណាជាអ្នកនៅពីក្រោយឃាតកម្មនេះ? រដ្ឋាភិបាលរបស់លោក ពូទីន រឺមួយក្រុមឧទ្ទាម ផ្តាច់ទឹកដីនៅអ៊ុយក្រែន?
លោក Boris Nemtsov ត្រៀមបញ្ចេញឯកសារ បញ្ជាក់អំពីសកម្មភាពឈ្លានពានរបស់ពូទីនលើអ៊ុយក្រែន៖
តាមការបញ្ជាក់ អំពីអ្នកនយោបាយប្រឆាំងម្នាក់ទៀតថា លោក Boris Nemtsov កំពុងត្រៀមចេញរបាយការណ៍មួយ ជាសាធារណៈ។ របាយការណ៍នេះ នឹងបង្ហាញអំពីសក្ខីកម្ម និងភស្តុតាងផ្សេងៗ មិនអាចប្រកែកបាន ដែលបញ្ជាក់ថា រដ្ឋាភិបាលរបស់លោក ពូទីន ពិតជាបានរៀបចំគម្រោង វាយដណ្តើមយកទឹកដីអ៊ុយក្រែន ប្រាដកមែន។
អ្វីដែល សំខាន់នោះ គឺ ៣ម៉ោង មុនពេលដែល លោក Boris Nemtsov ត្រូវគេសម្លាប់ នៅល្ងាចថ្ងៃសុក្រ ម៉ោងប្រហែលជា៨ល្ងាច គាត់បានផ្តល់បទសម្ភាសន៍ តាមវិទ្យុរុស្ស៊ីមួយ។ តាមរយៈបទសម្ភាសន៍នោះ គាត់បានអំពាវនាវ ឲ្យប្រជាជនរុស្ស៊ី នាំគ្នាចេញធ្វើបាតុកម្ម ឲ្យបានច្រើនលានអ្នក ដើម្បីទាមទារឲ្យរុស្ស៊ី ឈប់បញ្ជូនទ័ព ទៅឈ្លានពានអ៊ុយក្រែនតទៅទៀត។ ក្បួនបាតកម្មនេះ ត្រូវបានក្រុមការងារលោក រៀបចំជាច្រើនខែមកហើយ ហើយតាមការគ្រោងទុក នឹងត្រូវប្រព្រឹត្តិទៅ នៅថ្ងៃអាទិត្យ ទី១មិនា នេះ។
សម្តីលោក Nemtsov ៣ម៉ោងមុនពេលគេធ្វើឃាត
ក្នុងបទសម្ភាសន៍នេះ លោកបានរិះគន់ ពីការធ្វើទារុណកម្ម ទៅលើតំណាងរាស្ត្រ និងជាអ្នកបើកយន្តហោះស្រីម្នាក់ ជនជាតិអ៊ុយក្រែន ឈ្មោះ Nadia Savtchenko ដែលត្រូវអាជ្ញាធររុស្ស៊ី ចាប់ដាក់ឃុំ។ អស់រយៈពេលប៉ុន្មានថ្ងៃមកហើយ ដែលលោកស្រី បានអង្អត់បាយខ្លួនឯង ដើម្បីទាមទារឲ្យរុស្ស៊ី ដោះលែងគាត់ និង បញ្ឈប់រាល់អំពើឈ្លានពាន ទៅលើប្រទេសគាត់។
លោក Boris Nemtsov ជាអ្នកនយោបាយប្រឆាំងដ៏ក្លាហាន៖
សេចក្តីក្លាហាន ហ៊ានរិះគន់ដោយចំហរ ទៅលើនយោបាយរបស់លោកពូទីន ជាពិសេស ទៅលើការប្រើកម្លាំងទ័ព ឈ្លានពានអ៊ុយក្រែន បានធ្វើឲ្យលោក Boris Nemtsov បាត់បង់ជីវិត។លោក Boris Nemtsovជាសកម្មជននយោបាយ ដែលធ្លាប់ស្និតស្នាលជាមួយ លោក Boris Eltsine អតីតប្រធានាធិបតិរុស្ស៊ី។ ឆ្នាំនេះ លោក Nemtsov មានអាយុ៥៥ឆ្នាំ ហើយមានសញ្ញាប័ត្រផ្នែករូបវិទ្យា។ កាលពីជំនាន់ លោក Boris Eltsine លោក Nemtsov គឺជាអ្នកនយោបាយម្នាក់ ដែលតំណាងឲ្យចលនានយោបាយថ្មី របស់រុស្ស៊ី ក្នុងការធ្វើកំណែរទម្រង់ប្រទេស ព្រោះថា ពេលនោះ សហភាពសូវៀត ទើបតែដួលរលំ ហើយរុស្ស៊ីទើបតែបត់ក្បាល វិលទៅបើកចំហរប្រទេស តាមប្រព័ន្ធគ្រប់គ្រងបែបសេរី។
ក្នុងចំណោម អ្នកប្រឆាំង នឹងនយោបាយលោកពូទីន បច្ចុប្បន្ន មានតែ លោក Boris Nemtsov ម្នាក់គត់ ដែល ធ្លាប់បានបំរើការងារផ្ទាល់ ក្នុងជួររដ្ឋាភិបាលរុស្ស៊ី។ គាត់បានជាប់ឆ្នោតជាតំណាងរាស្រ្ត ក្នុងសភារុស្ស៊ី កាលពីឆ្នាំ ១៩៩០។ បន្ទាប់មក គាត់ធ្លាប់ធ្វើជាចៅហ្វាយខេត្ត ហើយបានកសាងកេរិ៍្តឈ្មោះ បន្តិចម្តងៗ ក្នុងជួរគណបក្ស រហូតក្លាយជា នាយករដ្ឋមន្រ្តីស្តីទី របស់លោក Boris Eltsine ក្នុងឆ្នាំ ៩៧-៩៨។
ក្នុងបទសម្ភាសន៍ តាមវិទ្យុ គាត់បានប្រាប់ថា កាលពីដំបូង លោក Boris Eltsine មានចេតនា ឲ្យគាត់បន្តវេន ក្នុងការដឹកនាំ និងស្តារប្រទេសរុស្ស៊ី បន្តែទីបំផុតលោក Boris Eltsine បានប្តូរចិត្ត ងៀកទៅទំនុកបំរុង លោកពូទីនវិញ។ គាត់ថា នេះជាការសម្រេចចិត្ត ខុសធ្ងន់ធ្ងរណាស់ របស់លោក Boris Eltsine។ ក្រោយការឡើងកាន់ដំណែង របស់លោក ពូទីន លោក Boris Nemtsov បានបន្តធ្វើជាតំណាងរាស្ត្រក្រុមប្រឆាំង ក្នុងសភាឌូម៉ា របស់រុស្ស៊ី។
លោក ត្រូវគេទទួលស្គាល់ថា ជាអ្នកនយោបាយ ដែលគេគោរពស្រលាញ់ ដោយសារតែភាពក្លាហាន និងចិត្តមានៈរបស់គាត់ ក្នុងការវែកញែករកសខ្មៅ និងបញ្ហាអយុត្តិធម៌សង្គម។ គាត់ធ្លាប់បានរិះគន់ ដោយចំហរ អំពី របៀបគ្រប់គ្រងប្រទេស បែបផ្តាច់ការរបស់ពូទីន អំពីបញ្ហាពុករលួយ តួយ៉ាងការរៀបចំកីឡាអូឡាំពិករដូវត្រជាក់ នៅក្រុងសុតឈី។ ហើយរឿងចុងក្រោយនេះ គឺបញ្ហានៅ អ៊ុយក្រែននេះឯង ដែលលោកបានធ្វើការបរិហារ ពីមហិច្ឆិតា របស់ពូទីន ក្នុងការលេបត្របាក់ តំបន់គ្រីម៉េ និងភាគខាងកើតអ៊ុយក្រែន។
ប្រតិកម្មក្រោយ ឃាតកម្ម៖
លោកប្រធានាធិបតី បារាំង បានមានប្រតិកម្មភ្លាមៗ ថានេះ ជាឃាតកម្មដ៏សាហាវ និងដ៏ថោកទាបជាទីបំផុត។ លោកបានអំពាវនាវ ឲ្យអាជ្ញាធររុស្ស៊ី វែកមុខ រកជនដៃដល់ និងអ្នកដែលបញ្ជា ឲ្យឃើញ។ ដូចគ្នាដែរ លោកស្រី អង់ហ្គេឡា មែកគែល បានថ្លែងថា លោកស្រី មានក្តីរន្ធត់ តក់ស្លុតជាខ្លាំង ហើយលោកស្រី ហៅឃាតកម្មនេះថា ជាឃាតកម្មដ៏កំសាកបំផុត។ ចំណែក លោកប្រធានាធិបតី អ៊ុយក្រែន ប៉េត្រូប៉ូរ៉ូឆិនកូ បានថ្លែងថា លោក Boris Nemtsov ជាមិត្តរបស់អ៊ុយក្រែន។ លោកជាស្ពាន នាំសន្តិភាពរវាង អ៊ុយក្រែន និងរុស្ស៊ី។
ដោយឡែក លោកប្រធានាធិបតីរុស្សី បានចាត់ទៅក្រសួងមហាផ្ទៃរុស្ស៊ី ឲ្យដឹកនាំ ក្រុមស្រាវជ្រាវ ដើម្បីវែករកមុខឃាតករ និង មនុស្សដែលនៅពីក្រោយឃាតកម្មនេះ។ យ៉ាងណាក៏ដោយ ទោះបីជាលោក ពូទីន មិនមែនជាអ្នកបញ្ជា ឲ្យគេសម្លាប់លោក Boris Nemtsov ក៏ដោយចុះ បន្តែលោកពូទីន មានការទទួលខុសត្រូវមួយទៀត ដែលគាត់ជាអ្នក ធ្វើឲ្យមានស្ថានការអាប់អួរ នៅរុស្ស៊ី។ ស្ថានការដែលធ្វើឲ្យមានការបែកបាក់ ចោទគ្នាទៅវិញទៅមក ក្នុងចំណោមអ្នកនយោបាយ ក៏ដូចជាប្រជាជនរុស្ស៊ី។ ហេតុការណ៏នៅអ៊ុយក្រែនកន្លងមក បានធ្វើឲ្យជនជាតិរុស្ស៊ី ចោទគ្នាថា នរណាមិនគាំទ្រឲ្យរុស្ស៊ីធ្វើសង្គ្រាមនៅអ៊ុយក្រែន សុទ្ធសិងតែពួកក្បត់ជាតិ។ លោក Boris Nemtsovត្រូវមនុស្សមួយចំនួន ចោទថាជាអ្នកក្បត់ជាតិ ព្រោះលោកអំពាវនាវឲ្យឈប់ ឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ