ដល់ពេលហើយ ដែល Apple ត្រូវបង់ពន្ធឲ្យសមមាត្រទៅតាមចំណូលរបស់ខ្លួននៅអឺរ៉ុប
ចុះផ្សាយនៅថ្ងៃ៖
ស្តាប់ - ០៥:៥០
ថ្មីៗនេះ សហភាពអឺរ៉ុប បានចេញសេចក្តីសម្រេចចិត្តមួយ យ៉ាងចម្រូងចម្រាស ដោយបានបង្ខំក្រុមហ៊ុនApple ឲ្យបង់ពន្ធ សងទៅប្រទៀសអៀរឡង់ ចំនួន១៣ពាន់លានអឺរ៉ូ។ សហភាពអឺរ៉ុបចោទប្រកាន់ក្រុមហ៊ុនដ៏ធំរបស់អាមេរិកនេះ ថាបានឃប់ឃិតជាមួយអាជ្ញាធរអៀរឡង់ ដើម្បីគេចវេស មិនបង់ពន្ធជាថ្នូរនឹងការបង្កើតការងារនៅអៀរឡង់ ដែលសកម្មភាពនេះគឺវាអយុត្តិធម៌ណាស់ សម្រាប់ក្រុមហ៊ុនដ៏ទៃទៀត ក៏ដូចជាប្រជាពលរដ្ឋសាមញ្ញ ដែលខំធ្វើការរកប្រាក់ ដើម្បីបង់ពន្ធជូនរដ្ឋ។ ការចូលលូកដៃរបស់សហភាពអឺរ៉ុប ក្នុងកិច្ចការពន្ធដាអៀរឡង់ កំពុងតែធ្វើឲ្យមានការមិនសប្បាយចិត្ត ពីសំណាក់រដ្ឋាភិបាលអៀរឡង់ផ្ទាល់ និងក្រុមហ៊ុនធំៗនានា របស់អាមេរិក ព្រមទាំងរដ្ឋាភិបាលអាមេរិកផងដែរ។
អៀរឡង់ សុខៗ ត្រូវឆ្នោត១៣ពាន់លានអឺរ៉ូ៖
បើយើងមើលមួយភ្លែត គឺអៀរឡង់ទើបតែត្រូវឆ្នោតរង្វាន់ធំ ក្នុងទឹកប្រាក់១៣ពាន់លានអឺរ៉ូ ដែលឆ្នោតមួយសន្លឹកនេះ មិនមែនអៀរឡង់ជាអ្នកទិញទេ តែគឺសហភាពអឺរ៉ុប ជាអ្នកទិញនិងផ្ទៀងឲ្យអៀរឡង់។ ១៣ពាន់លានអឺរ៉ូ ពោលគឺស្មើនឹងទឹកប្រាក់នៃការចំណាយវិនិយោគរបស់អៀរឡង់ មួយគុណជាបីឯណោះ។ គឺក្រុមហ៊ុន Apple ដែលត្រូវបានសហភាពអឺរ៉ុប ដាក់បន្ទុកឲ្យបង់ប្រាក់នេះ ចូលក្នុងហោប៉ៅពន្ធដាររបស់អៀរឡង់ ព្រោះសហភាពអឺរ៉ុប បានស្រាវជ្រាវដឹងថា ២០ឆ្នាំមកនេះ ក្រុមហ៊ុនApple មិនបានបង់ពន្ធឲ្យទៅអៀរឡង់ ឲ្យសមមាត្រទៅនឹងចំណូលដែលខ្លួនរកបានទេ។
នេះគឺជាលទ្ធផលនៃការអង្កេតស្រាវជ្រាវ អស់រយៈពេល៣ឆ្នាំរបស់គណកម្មការអឺរ៉ុប ដែលមានលោកស្រី Vestager ជាអ្នកទទួលខុសត្រូវការស៊ើបអង្កេត។ សម្រាប់សហភាពអឺរ៉ុប គឺវាច្បាស់ណាស់ថា ក្រុមហ៊ុនផលិតiPhone នេះបានទទួលការសហការពីរដ្ឋាភិបាលអៀរឡង់ ក្នុងការរៀបចំកែច្នៃធ្វើយ៉ាងណា ដើម្បីឲ្យក្រុមហ៊ុនដ៏មានជាងគេលំដាប់ទីពីរលើលោកនេះ អាចបង់ពន្ធតិចបំផុត។ នេះគឺជាអំពើមួយអយុត្តិធម៌ ហើយវាជាការប្រកួតប្រជែងមិនស្មោះត្រង់ ខណៈដែលក្រុមហ៊ុនដ៏ទៃទៀត ត្រូវបង់ពន្ធពេញៗ នៅតាមបណ្តាប្រទេសសមាជិកអឺរ៉ុបផ្សេងទៀត។
ក្រុមហ៊ុនខ្មោចរបស់Apple នៅអៀរឡង់៖
ក្នុងការអង្កេត គណកម្មការអឺរ៉ុបបានផ្តោតទៅលើក្រុមហ៊ុនពីរ នៅអៀរឡង់ ទីមួយគឺក្រុមហ៊ុនApple Operation Europe (AOE) ដែលគឺជាសាខារបស់ក្រុមហ៊ុនApple ដែលមានមនុស្សធ្វើការនៅអៀរឡង់ចំនួនប្រមាណជា៦ពាន់នាក់ និងក្រុមហ៊ុនទីពីរគឺ Apple Sales International (ASI) ដែលគ្រាន់តែបានចុះបញ្ជីរនៅអៀរឡង់ តែពុំមានទីតាំងពិតប្រាកដ ហើយពុំមានមនុស្សធ្វើការសូម្បីតែម្នាក់។ គឺក្រុមហ៊ុនទីពីរនេះហើយ ដែលមានលក្ខណៈជាក្រុមហ៊ុនខ្មោច ដែលធ្វើឲ្យមានការសង្ស័យ ព្រោះដោយសារតែពុំមានទីតាំង ពុំមានមនុស្សធ្វើការ ទើបក្រុមហ៊ុននេះ មិនបាច់បង់ពន្ធទៅឲ្យអៀរឡង់ទេ។ ក៏ប៉ុន្តែពេលដែលគេពិនិត្យស៊ីជំរៅ ប្រាក់ចំណូលរបស់សាខាក្រុមហ៊ុនApple ប្រចាំទ្វីបអឺរ៉ុប ស្ទើរតែទាំងស្រុង គឺផ្ទេរចូលទៅក្នុងគណនីក្រុមហ៊ុនទីពីរនេះ។
យោងតាមប្រសាសន៍លោកស្រី Vestager ក្រុមហ៊ុន Apple Sales International មានប្រាក់ចំណូល១៦ពាន់លានអឺរ៉ូ ក្នុងឆ្នាំ២០១១ ហើយក្នុងនោះ មានតែ៥០លានប៉ុណ្ណោះ ដែលជាចំណូលរបស់សាខាអៀរឡង់ នៅសល់ជាង១៥ពាន់លានផ្សេងទៀត គឺគ្មានប្រភព ដូច្នេះមិនត្រូវបង់ពន្ធទេ។ លោកស្រីបន្តថា ឆ្នាំ ឆ្នាំ២០១៤ កម្រឹតពន្ធ ដែលApple បង់ឲ្យអៀរឡង់ មានតែ០,០០៥% ប៉ុណ្ណោះ។ មានន័យថា ក្នុងប្រាក់ចំណូលរកបាន១លានអឺរ៉ូ ក្រុមហ៊ុននេះ បង់ពន្ធមិនដល់៥០អឺរ៉ូផង។ នេះវាជារឿងមួយមិនអាចទទួលយកបានទេ ខណៈដែលពន្ធលើប្រាក់ចំណូលក្នុងប្រទេសអៀរឡង់ ជាទូទៅគឺមានកម្រិត១២,៥%។
អៀរឡង់៖ ដែនដីសំបូរសប្បាយរបស់ក្រុមហ៊ុនណាមិនចង់បង់ពន្ធ
យោងតាមគណកម្មការអឺរ៉ុប ក្រុមហ៊ុនApple និងរដ្ឋាភិបាលអៀរឡង់ បានធ្វើកិច្ចព្រមព្រៀងជាមួយគ្នាចំនួន២លើក ដើម្បីចាត់ចែងកិច្ចការពន្ធដារ។ ម្តងនៅឆ្នាំ១៩៩១ និងម្តងទៀតនៅឆ្នាំ២០០៧។ សម្រាប់គណកម្មការអឺរ៉ុប គឺកិច្ចព្រមព្រៀងទាំងពីរលើកនេះហើយ ដែលមានលក្ខណៈមិនប្រក្រតី ដែលអនុញ្ញាតឲ្យក្រុមហ៊ុនApple គេចពីការបង់ពន្ធ ហើយជាថ្នូរApple សន្យាប្រើប្រាស់ទីផ្សារការងារនៅអៀរឡង់។
ការពិតវាជាជម្រើសរបស់រដ្ឋាភិបាលអៀរឡង់ ដែលសុខចិត្តជួយក្រុមហ៊ុនApple មិនយកពន្ធច្រើន ក្នុងប្រទេសខ្លួន។ គេគ្មានអ្វីត្រូវងើងឆ្ងល់ទេ នៅពេលដែលឃើញលោក Michael Noonan រដ្ឋមន្ត្រីក្រសួងហិរញ្ញវត្ថុអៀរឡង់ ចេញមុខមករិះគន់សហភាពអឺរ៉ុបថាកុំចេះដឹងរឿងគេ។ លោករដ្ឋមន្ត្រីរូបនេះ បានទាមទារឲ្យរដ្ឋាភិបាលអៀរឡង់ប្តឹងសហភាពអឺរ៉ុបទៀតផង ព្រោះអឺរ៉ុបមិនត្រូវមកជ្រៀតជ្រែក កិច្ចការពន្ធដារបស់ប្រទេសមាសជិកឯទៀតទេ។ អឺរ៉ុប ខំរកយុត្តិធម៌ តម្រូវឲ្យក្រុមហ៊ុនមានកំហុស បង់ពន្ធសងអៀរឡង់ តែអៀរឡង់បែរជាចេញមុខមកប្រកាសថា គេមិនត្រូវការប្រាក់នេះទេ។
យ៉ាងណាមិញលោក Tim Cook អគ្គនាយកApple បាននិយាយថា នេះជាកាលៈទេសៈមួយដ៏ចំលែក ដែលសហភាពអឺរ៉ុបមកចេះចាត់ចែង បញ្ជាឲ្យក្រុមហ៊ុនលោក សងប្រាក់១៣ពាន់លានទៅអៀរឡង់ រឺឯប្រទេសសាមីវិញ បែរជានិយាយថាទេ ក្រុមហ៊ុនApple មិនបានជំពាក់លុយពន្ធផង។
គួរបញ្ជាក់ថា បច្ចុប្បន្ននេះ ក្រុមហ៊ុនApple កើបប្រាក់ចំណូលដល់ទៅ២៣២ពាន់លានដុល្លារ ហើយក្នុងនោះមាន ២១៤ពាន់លានដុល្លារ កំពុងលាក់ខ្លួននៅបរទេស ក្រៅពីសហរដ្ឋអាមេរិក ដែលជាទីតាំងធំ។ មិនមែនមានតែក្រុមហ៊ុនApple មួយទេ ដែលកំពុងរងការចោទប្រកាន់ពីសហភាពអឺរ៉ុប ថាបានលួចកេងបន្លំមិនបង់ពន្ធ។ នៅមានក្រុមហ៊ុនអាមេរិកធំៗ ជាច្រើនផ្សេងទៀត ដូចជាក្រុមហ៊ុន Google Amazon Starbucks Tweeter Facebook Dropbox ជាដើម ដែលកំពុងតែធ្វើរឿងស្រដៀងគ្នានេះ ដើម្បីគេចវេសមិនបង់ពន្ធលើប្រាក់ចំណូលរបស់ខ្លួន។ ហើយក្រុមហ៊ុមទាំងអស់នេះ ភាគច្រើន សុទ្ធតែមកតាំងទីនៅប្រទេសអៀរឡង់ទាំងអស់។
អឺរ៉ុបចង់បង្ហាញភាពរឹងមាំ ក្នុងការអនុវត្តច្បាប់ ហើយអាមេរិក គួរណាតែយកគំរូតាម៖
ការលូកដៃចូលមកលើកិច្ចការពន្ធដារ តំរូវឲ្យក្រុមហ៊ុនApple បង់ពន្ធនេះ កំពុងតែធ្វើឲ្យកើតជាសង្រ្គាមពាក្យសំដី រវាងសហរដ្ឋអាមេរិក និងសហភាពអឺរ៉ុបផងដែរ។ ក្រសួងហិរញ្ញវត្ថុអាមេរិក បានរិះគន់ថាសហភាពអឺរ៉ុបកំពុងបង្កបញ្ហាផ្លូវច្បាប់ផ្នែកគណនីពន្ធដារ ហើយវិធានទាំងនោះវាហាក់ដូចជាកំពុងតែធ្វើបាបក្រុមហ៊ុនរបស់អាមេរិក។
គណកម្មការអឺរ៉ុបបានឆ្លើយតបទៅវិញ ទាំងមិនញញើតថា អឺរ៉ុបមានច្បាប់របស់អឺរ៉ុប ហើយអឺរ៉ុបមិនបានទៅទាមទារផ្តេសផ្តាសទេ គឺទាមទារឲ្យបង់ពន្ធតែទៅលើប្រាក់ចំណូលដែលក្រុមហ៊ុនរកបាននៅលើដែនដីរបស់សហភាពអឺរ៉ុប តែប៉ុណ្ណោះ។ មួយវិញទៀតអឺរ៉ុបក៏មិនបានទៅធ្វើបាបក្រុមហ៊ុនអាមេរិកដែរ ព្រោះវិធានច្បាប់អឺរ៉ុបអនុវត្តទៅគ្រប់ក្រុមហ៊ុន មិនថាធំមិនថាតូច មិនថាបារាំង អាល្លឺម៉ង់ រឺអាមេរិក ទេ។
អង្គការ និងអ្នកនយោបាយនៅអឺរ៉ុបជាច្រើននាក់ បានអបអរដល់ចំណាត់ការរបស់សហភាពអឺរ៉ុប ដែលបង្ហាញពីភាពម៉ឹងម៉ាត់ ក្នុងការអនុវត្តច្បាប់ចំពោះមុខក្រុមហ៊ុនគ្រាក់ៗធំរបស់អាមេរិក។ កន្លងមកក្រុមហ៊ុនទាំងអស់នេះ មានភាពក្អេងក្អាង កើបប្រមូលប្រាក់ចំណេញ កេងបន្លំមិនព្រមបង់ពន្ធ ខណៈដែលវិបត្តិសេដ្ឋកិច្ច និងការចំណាយរបស់រដ្ឋកាន់តែថយចុះ។ រឺឯងរដ្ឋវិញ គិតតែពីរកប្រាក់ចំណូល ដោយការដំឡើងពន្ធលើប្រជាពលរដ្ឋសាមញ្ញ។ យ៉ាងណាមិញ សមាគមដើម្បីយុត្តិធម៌ពន្ធដារអាមេរិកវិញ បានរិះគន់រដ្ឋាភិបាលអាមេរិកថា គួរណាតែយកគំរូតាមសហភាពអឺរ៉ុប ដែលបង្ហាញគោលជំហរជាក់លាក់ក្នុងការប្រមូលពន្ធ មិនមែនស៊ុំគ្រលំ ចាញ់ប្រៀបក្រុមហ៊ុនយក្សទាំងអស់នោះទេ។ ទោះក្រុមហ៊ុននោះធំប៉ុណ្ណាក៏ដោយ តែមិនអាចធំជាងច្បាប់រដ្ឋទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ