ផលវិបាក និងប្រតិកម្មកើតចេញពីរឿងអាស្រូវ « Panama Papers »
រឿងអាស្រូវ « Panama Papers » ដែលបានបែកធ្លាយកាលពីថ្ងៃអាទិត្យ ទី៣ មេសាចុងសប្តាហ៍កន្លងទៅបាន និងកំពុងបង្កឲ្យមានប្រតិកម្ម និងផលវិបាកជាហូរហែ។ សូមរម្លឹកជូនឡើងវិញថា « Panama Papers » ជាសំណុំឯកសារជាង ១១លានឯកសាររបស់ការិយាល័យសាជីវកម្មពាណិជ្ជកម្មអន្តរជាតិរបស់ប៉ាណាម៉ាឈ្មោះ Mossack Fonseca។ សំណុំឯកសារជាង ១១លានឯកសារនេះត្រូវបានទម្លាយចេញដោយសម្ព័ន្ធអ្នកកាសែតអន្តរជាតិផ្នែកស៊ើបអង្កេត បន្ទាប់ពីបានធ្វើការអង្កេតអស់រយៈពេល ១ឆ្នាំ។ គឺជាសំណុំឯកសារដែលលាតត្រដាងពីរឿងគេចពន្ធរបស់ឥស្សរជនល្បីៗក្នុងលោក មានតាំងពីថ្នាក់ដឹកនាំកំពូលៗរហូតដល់កីឡាករ និងសិល្បករល្បីៗក្នុងលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤១
ពេលវេលាកាន់តែរំកិលទៅមុខ សំណុំរឿង« Panama Papers » ក៏បាន និងកំពុងបន្តទម្លាយចេញនូវព័ត៌មានថ្មីគួរឲ្យភ្ញាក់ផ្អើល។ នៅក្នុងថ្ងៃទី១ នៃការបែកធ្លាយសំណុំរឿង« Panama Papers » ដែលមានជាង ១១លានឯកសារពាក់ព័ន្ធនឹងរឿងគេចពន្ធ គេសង្កេតឃើញមានជាប់ឈ្មោះប្រមុខរដ្ឋ និងប្រមុខរដ្ឋាភិបាលប្រទេសខ្លះដែលកំពុងកាន់អំណាច ក៏ដូចជាឈ្មោះរបស់អតីតប្រមុខរដ្ឋ និងប្រមុខរដ្ឋាភិបាល ព្រមទាំងកីឡាករ និងសិល្បករល្បីៗក្នុងលោក។
ឥឡូវនេះ រឿងគេចពន្ធដោយយកលុយទៅលាក់ទុកតាមរយៈការិយាល័យសាជីវកម្មពាណិជ្ជកម្មអន្តរជាតិប៉ាណាម៉ាឈ្មោះ Mossack Fonseca បានឆ្លងរាលដាលដល់រដ្ឋមន្រ្តី អ្នកតំណាងរាស្រ្ត ព្រមទាំងប្រធាន និងអតីតប្រធានគណបក្សនយោបាយនៅក្នុងប្រទេសខ្លះ ដូចយ៉ាងប្រទេសបារាំងទាក់ទងនឹងគណបក្សស្តាំនិយមជ្រុលរបស់លោកស្រីម៉ារីន ឡឺពែន។ មួយវិញទៀត « Panama Papers » ក៏មានជាប់ឈ្មោះតាំងពីមហាសេដ្ឋីគ្រាក់ៗ រហូតដល់អ្នកមានលុយច្រើនគួរសម។
គួរបញ្ជាក់ថា អ្នកដែលបានយកលុយទៅទុកក្នុងប្រទេសបាណាម៉ាតាមរយៈការិយាល័យសាជីវកម្មពាណិជ្ជកម្មអន្តរជាតិរបស់ប៉ាណាម៉ាឈ្មោះ Mossack Fonseca មិនមែនសុទ្ធជាអ្នកដែលមានបំណងគេចពន្ធពីប្រទេសដើមរបស់ខ្លួនទេ ព្រោះមានអ្នកខ្លះក៏បានប្រកាសប្រាប់រដ្ឋអំណាចពីចំនួនទឹកលុយរបស់ខ្លួនដែរ ពោលមិនមែនយកទៅតម្កល់ទុកស្ងាត់ៗនោះទេ។
រឿងអាស្រូវ « Panama Papers » បានទម្លាក់លោកនាយករដ្ឋមន្រ្តីអ៊ីស្លង់
រឿងអាស្រូវ « Panama Papers » កំពុងបង្កឲ្យមានផលវិបាកនយោបាយនៅក្នុងប្រទេសខ្លះដែលថ្នាក់ដឹកនាំមានជាប់ពាក់ព័ន្ធផ្ទាល់។ មុនគេ គឺប្រទេសអ៊ីស្លង់ដែលលោកនាយករដ្ឋមន្រ្តីស៊ីមុនដួរ ដាវីដ ហ្គុនឡុកសុន (Sigmundur David Gunnlaugsson) បានប្រកាសចុះចេញពីកៅអីនាយករដ្ឋមន្រ្តីដែលលោកបានអង្គុយតាំងពីឆ្នាំ ២០១៣។ ការលាឈប់ពីមុខតំណែងរបស់លោកហ្គុនឡុកសុនដោយសារលោកមិនអាចទ្រាំទ្រនឹងសម្ពាធរបស់ប្រជាជនអ៊ីស្លង់នៅតាមដងផ្លូវតាំងពីថ្ងៃអាទិត្យ ទី៣ មេសា ចំថ្ងៃបែកធ្លាយរឿងអាស្រូវ« Panama Papers »។
អ្វីដែលប្រជាជនអ៊ីស្លង់ក្តៅក្រហាយខ្លាំងនឹងគ្រួសាររបស់លោកហ្គុនឡុកសុន គឺការដែលលោក និងភរិយាបានយកលុយរាប់លានដុល្លារទៅលាក់ទុកនៅបរទេស។ ក្រៅពីមានឈ្មោះលោកហ្គុនឡុកសុននៅក្នុងរឿងអាស្រូវ« Panama Papers » ក៏គេឃើញមានឈ្មោះរដ្ឋមន្រ្តីមួយចំនួនដែរ។ តែមកទល់ពេលនេះ រដ្ឋមន្រ្តីទាំងនោះបានបន្តឱបអំណាចមិនព្រមលាចេញទេ។ សូមជម្រាបជូនថា រឿងអាស្រូវ « Panama Papers » ជារឿងដ៏រសើបខ្លាំងណាស់សម្រាប់ប្រទេសអ៊ីស្លង់ដែលធ្លាប់បានឆ្លងកាត់វិបត្តិសេដ្ឋកិច្ចធ្ងន់ធ្ងរ ពិសេសក្នុងឆ្នាំ ២០០៨។
សង្រ្គាមប៉ាកាបានចាប់ផ្តើម
ក្រៅពីផលវិបាកនយោបាយ រឿងអាស្រូវ « Panama Papers » ក៏កំពុងបង្កឲ្យមានប្រតិកម្ម និងសង្រ្គាមប៉ាការវាងប្រទេសប៉ាណាម៉ា និងក្រុមប្រទេសពាក់ព័ន្ធ។ តែប្រតិកម្ម វិធានការ និងសង្រ្គាមប៉ាកានៅមានតិច ព្រោះវាជារឿងថ្មីថ្មោងដែលគេត្រូវការពេលវេលាដើម្បីធ្វើការស៊ើបអង្កេតឲ្យបានស៊ីជ្រៅបន្ថែម។ សូមជម្រាបជូនថា រឿងអាស្រូវ « Panama Papers » ត្រូវបានទម្លាយចេញដោយសម្ព័ន្ធអ្នកកាសែតអន្តរជាតិផ្នែកស៊ើបអង្កេត បន្ទាប់ពីមានអ្នកកាសែត ៣៧០នាក់ មកពី ១០៧ការិយាល័យនិពន្ធខុសគ្នា និងមកពី៧៧ប្រទេសក្នុងលោកបានធ្វើការអង្កេតអស់រយៈពេល ១ឆ្នាំ។
ក្រៅពីប្រទេសពាក់ព័ន្ធបានសន្យាប្រកាសបើកការស៊ើបអង្កេត ក៏មានប្រទេសខ្លះ ដូចយ៉ាងបារាំងបានប្រកាសពីការដាក់បញ្ជូលប៉ាណាម៉ាទៅក្នុងបញ្ជីខ្មៅនៃក្រុមប្រទេសជួយលាក់លុយអ្នកគេចពន្ធ។ ប៉ាណាម៉ាបានចេញមុខប្រតិកម្មភ្លាមៗដោយសន្យាសងសឹកបារាំងវិញតាមផ្លូវសេដ្ឋកិច្ច។ នៅអាមេរិក លោកប្រធានាធិបតីអូបាម៉ាមិនបានចោទអ្នកណាទេ តែបានចាត់ទុករឿងគេចពន្ធជាបញ្ហាដ៏ធំដែលគេត្រូវពង្រឹងច្បាប់ និងកិច្ចសហប្រតិបត្តិការជាលក្ខណៈអន្តរជាតិ។
ចំណែកអង្គការដើម្បីកិច្ចសហប្រតិបត្តិការ និងអភិវឌ្ឍន៍សេដ្ឋកិច្ចហៅកាត់ថា OCDE បានចោទប៉ាណាម៉ាចំៗថា មិនបានរួមចំណែកគ្រប់គ្រាន់ក្នុងយុទ្ធនាការប្រយុទ្ធប្រឆាំងនឹងការលាងលុយកខ្វក់។ ជាការឆ្លើយបកវិញ ប្រទេសប៉ាណាម៉ាបានចាត់ទុកការចោទប្រកាន់របស់ OCDE ថាអយុត្តិធម៌ និងមានការរើសអើង។ ចំណែកការិយាល័យសាជីវកម្មពាណិជ្ជកម្មអន្តរជាតិប៉ាណាម៉ា Mossack Fonseca បានបញ្ជាក់ថា ខ្លួនជាអ្នករងគ្រោះដោយក្រុមចោរព័ត៌មានវិទ្យានៅបរទេសដែលចូលលួចទិន្នន័យក្នុងម៉ាស៊ីនកុំព្យូទ័ររបស់ខ្លួន ព្រមទាំងបានដាក់ពាក្យប្តឹងទៅតុលាការចំពោះរឿងនេះ។
ឃើញថា រឿងអាស្រូវ « Panama Papers » នៅមានដំណើរវែងឆ្ងាយ និងស្មុគស្មាញខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ