អង់គ្លស៖លោកដេវីដ កាមេរ៉ូនចូលកាន់តំណែងនាយករដ្ឋមន្រ្តីអាណត្តិទី២ សម្រាប់ ៥ឆ្នំា
នៅប្រទេសអង់គ្លេស លទ្ធផលបោះឆ្នោតសភាកាលពីថ្ងៃព្រហស្បតិ៍ ទី៧ ឧសភាបានផ្តល់ជោគជ័យយ៉ាងធំធេងដល់គណបក្សអភិរក្សនិយមរបស់លោកនាយករដ្ឋមន្រ្តីផុតអាណត្តិដេវីដ កាមេរ៉ូន (David Cameron) និងគណបក្សជាតិនិយមនៅក្នុងរដ្ឋស្កុតឡែនរបស់លោកស្រី Nicola Sturgeon។ តាមលទ្ធផលមិនទាន់ផ្លូវការឲ្យដឹងថា គណបក្សអភិរក្សនិយមអាចនឹងទទួលបានសម្លេងគំាទ្រដាច់ខាត និងបង្កើតរដ្ឋាភិបាលថ្មីតែម្នាក់ឯងដោយមិនត្រូវការចងសម្ព័ន្ធជាមួយគណបក្សផ្សេងទេ។ ចំណែកអ្នកដែលចាញ់យ៉ាងអាម៉ាស់មុខខ្លំាងជាងគេ គឺគណបក្សពលកររបស់លោកអេដ ម៉ីលីបាន (Ed Miliband) និងគណបក្សសេរី ប្រជាធិបតេយ្យរបស់លោកនីក ក្លេក (Nick Clegg)។
ចុះផ្សាយនៅថ្ងៃ៖
ស្តាប់ - ០៥:៥២
គេអាចនិយាយថា លទ្ធផលនៃការបោះឆ្នោតសភានៅអង់គ្លេសពេលនេះ គឺជាលទ្ធផលដ៏គួរឲ្យភ្ញាក់ផ្អើល និងដែលគ្មាននរណាបានរង់ចំា ព្រោះតំាងពីក្នុងសម័យឃោសនាបោះឆ្នោត មុនថ្ងៃបោះឆ្នោត និងរហូតដល់ថ្ងៃបោះឆ្នោតនាថ្ងៃម្សិលមិញទៀត លទ្ធផលនៃការស្ទង់មតិផ្តល់ដោយវិទ្យាសា្ថនស្ទង់មតិសឹងតែទំាងអស់បានប្រាប់ឲ្យដឹងពីលទ្ធផលប្រកៀកប្រកើយគ្នារវាងគណបក្សធំចំនួនពីរ គឺគណបក្សអភិរក្សនិយមរបស់លោកនាយករដ្ឋមន្រ្តីផុតអាណត្តិដេវីដ កាមេរ៉ូ (David Cameron) និងគណបក្សពលកររបស់លោកអេដ ម៉ីលីបាន (Ed Miliband)។ តែទីបំផុតនៅយប់មិញ និងក្រោយពីបានរាប់សន្លឹកឆ្នោតជាបន្តបន្ទាប់មកដល់ព្រឹកថ្ងៃសុក្រ ទី៨ ឧសភានេះមក លទ្ធផលជាក់ស្តែងបែរជាបានបង្ហាញផ្ទុយស្រឡះពីស្ទង់មតិទៅវិញ ពោលគណបក្សអភិរក្សនិយមបានឈ្នះដាច់ឆ្ងាយពីគណបក្សពលករ។
តាមលទ្ធផលបណ្តោះអាសន្នឲ្យដឹងថា គណបក្សអភិរក្សនិយមរបស់លោកដេវីដ កាមេរ៉ូនអាចនឹងទទួលបានសម្លេងភាគច្រើនដាច់ខាតនៅក្នុងសភាដល់ទៅ ៣២៩អសនៈនៅក្នុងចំណោម៦៥០អសនៈដែលមាននៅក្នុងរដ្ឋសភា ហើយគណបក្សពលកររបស់លោកអេដ ម៉ីលីបានទទួលបានប្រមាណ ២៣៩អសនៈ។ នេះជារឿងភ្ញាក់ផ្អើលទី១ រីឯរឿងភ្ញាក់ផ្អើលទី២ គឺជោគជ័យរបស់គណបក្សជាតិនិយមនៅក្នុងរដ្ឋស្កុតឡែនដែលទទួលបានចំនួន ៥៨អសនៈនៅក្នុងចំណោមអសនៈប្រកួតប្រជែងចំនួន ៥៩។ សូម្បីតែគណបក្សពលករក៏បានបាត់បង់កៅអីនៅរដ្ឋស្កុតឡែនដែរ។
តំាងពីយប់មិញ លោកដេវីដ កាមេរ៉ូន និងលោកអេដ ម៉ីលីបានប្រកាសទទួលស្គាល់ភ្លាមៗពីជោគជ័យ និងបរាជ័យរបស់គណបក្សខ្លួន។ សម្រាប់លោកដេវីដ កាមេរ៉ូន រាត្រីយប់មិញ ពិតជារាត្រីមួយដ៏ត្រចះត្រចង់សម្រាប់គណបក្សអភិរក្សនិយម។ តែសម្រាប់លោកអេដ ម៉ីលីបាន រាត្រីយប់មិញជារាត្រីដ៏គួរឲ្យខកចិត្តខ្លំាងណាស់សម្រាប់គណបក្សពលករ។
ហេតុអ្វីបានជាគណបក្សអភិរក្សនិយមទទួលបានជោគជ័យគួរឲ្យភ្ញាក់ផ្អើល?
ការដែលគណបក្សអភិរក្សនិយមទទួលបានសម្លេងភាគច្រើនដាច់ខាតនៅក្នុងសភាពេលនេះ គឺជាលើកទី១ បើគិតតំាងពីឆ្នំា ១៩៩២ ហើយបើគិតជាចំនួនអសនៈដែលទទួលបានវិញ នេះជាលើកទី១ ដែលទទួលបានច្រើនលើសលប់ បើគិតតំាងពីជំនាន់លោកស្រីនាយករដ្ឋមន្រ្តីម៉ាហ្ការ៉េត ថាច់ឆ័រក្នុងឆ្នំា ១៩៨៣។ រីឯជោគជ័យរបស់គណបក្សជាតិនិយមនៅក្នុងរដ្ឋស្កុតឡែនពេលនេះ ក៏ជាជោគជ័យមួយដ៏កម្រដែរ។ ចំណែកបរាជ័យដ៏ល្វីងជូរចត់របស់គណបក្សពលកររបស់លោកអេដ ម៉ីលីបានពេលនេះ ក៏ជាលើកទី១ ដែរ បើគិតតំាងពីរយៈពេល ៣០ឆ្នំាកន្លងទៅ។ រីឯអ្នកចាញ់យ៉ាងអាម៉ាស់មួយទៀត គឺគណបក្សសេរី ប្រជាធិបតេយ្យរបស់លោកនីក ក្លេកដែលធ្លាប់រួមសហការណ៍ជាមួយរដ្ឋាភិបាលរបស់លោកដេវីដ កាមេរ៉ូនក្នុងរយៈពេល ៥ឆ្នំាកន្លងទៅ។ លោកនីក ក្លេក និងលោកអេដ ម៉ីលីបានបានលាចុះចេញពីតំណែងប្រធានគណបក្សនៅថ្ងៃនេះ។
មានមូលហេតុច្រើនដែលបានបង្វែរចិត្តប្រជាជនអង់គ្លេសឲ្យសម្រេចបោះឆ្នោតជូនគណបក្សអភិរក្សនិយមនៅនាទីចុងក្រោយ ពិសេសគឺជោគជ័យរបស់លោកកាមេរ៉ូនក្នុងការជួយស្តារកំណើនសេដ្ឋកិច្ចឡើងវិញ។ ដូច្នេះចាប់ពីពេលនេះតទៅ លោកកាមេរ៉ូនដែលមានសម្លេងភាគច្រើនដាច់ខាតក្នុងដៃគ្មានជម្រើសអ្វីពីបន្តអនុវត្តន៍នូវកម្មវិធីនយោបាយ សេដ្ឋកិច្ចដែលទទួលផលវិជ្ជមាន និងបន្តគម្រោងកំណែទម្រង់ផ្សេងទៀតដែលមិនទាន់បានបញ្ចប់នៅក្នុងអាណត្តិទី១។
លោកកាមេរ៉ូនត្រូវប្រឈមមុខនឹងសហភាពអឺរ៉ុប និងចលនាទាមទារផ្តាច់ទឹកដីនៅផ្ទៃក្នុងចក្រភពអង់គ្លេស!
ការជាប់ឆ្នោតជាថ្មីរបស់លោកកាមេរ៉ូនជាការបើកផ្លូវឆ្ពោះទៅធ្វើប្រជាមតិសម្រេចពីជោគវាសនារបស់អង់គ្លេសនៅក្នុងសហភាពអឺរ៉ុប។ លោកកាមេរ៉ូនធ្លាប់បានប្រាប់ឲ្យដឹងតំាងពីក្នុងអាណត្តិទី១ រួចហើយថា បើលោកជាប់ឆ្នោតមួយអាណត្តិថ្មីទៀត លោកនឹងរៀបចំបោះឆ្នោតប្រជាមតិនៅឆ្នំា ២០១៧ ដើម្បីចង់ដឹងពីយោបល់របស់ប្រជាជនអង់គ្លេសថា តើពួកគេចង់បន្តស្ថិតនៅ ឬមិនចង់បន្តស្ថិតនៅក្នុងសហភាពអឺរ៉ុប។ នៅក្នុងយុទ្ធនាការឃោសនាបោះឆ្នោតកន្លងទៅ ក៏លោកកាមេរ៉ូនបានសន្យាជាថ្មីដែរ។ គេនៅទាន់ដឹងថា តើប្រជាជនអង់គ្លេសនឹងសម្រេចចិត្តយ៉ាងម៉េចទេ អ្វីដែលគេដឹង រូបលោកកាមេរ៉ូនក៏មិនមែនជាឥស្សរជនប្រឆំាងអឺរ៉ុបផ្កាប់មុខដែរ តែលោកបានសន្យាថា ប្រសិនបើដៃគូអឺរ៉ុបសុខចិត្តធ្វើសម្បទានមួយចំនួនឲ្យអង់គ្លេសលោកនឹងធ្វើយុទ្ធនាការរក្សាអង់គ្លេសនៅក្នុងសហភាពអឺរ៉ុប។
ក្រៅពីបញ្ហាអន្តរជាតិមួយនេះ ក៏នៅមានបញ្ហាផ្ទៃក្នុងមួយដែលលោកកាមេរ៉ូនមិនអាចមើលរំលងបាន នោះគឺការទាមទារផ្តាច់ទឹកដីរបស់ប្រជាជនស្កុតឡែនចេញពីចក្រភពអង់គ្លេស។ នាការបោះឆ្នោតប្រជាមតិនៅក្នុងរដ្ឋស្កុតឡែនកាលពីខែកញ្ញា ឆ្នំា ២០១៤ កន្លងទៅ មានប្រជាជនស្កុតឡែន ៥៥% បានបដិសេធមិនផ្តាច់ខ្លួនចេញពីចក្រភពអង់គ្លេសទេ។ តែជាមួយនឹងជោគជ័យរបស់គណបក្សជាតិនិយមស្កុតឡែនពេលនេះនឹងអាចធ្វើឲ្យលោកកាមេរ៉ូនឈឺក្បាលជាថ្មី និងដែលលោកត្រូវចាត់វិធានការបង្រួបបង្រួមជាបន្ទាន់។ គួររម្លឹកជូនថា មានរដ្ឋចំនួន ៤ ដែលស្ថិតក្នុងចង្កោមចក្រភពអង់គ្លេសតែមួយ គឺអង់គ្លេស ស្កុតឡែន Wales និងអៀឡង់ខាងជើង។ ដូច្នេះបើមានរដ្ឋណាមួយអាចទទួលបានឯករាជ្យ នោះវាជាផលវិបាកធំណាស់សម្រាប់ចក្រភពអង់គ្លេសទំាងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ