FIFA សម្រេចបន្ថែមចំនួនក្រុមបាល់ទាត់ដល់ ៤៨ក្រុម ចាប់ពីWorld Cup ឆ្នាំ២០២៦ទៅ
សហព័ន្ធបាល់ទាត់អន្តរជាតិទើបបានសម្រេចចិត្តបន្ថែមចំនួនក្រុមជំរើសជាតិ ដែលចូលរួមក្នុងការប្រកួតបាល់ទាត់ពិភពលោក ចាប់ពីឆ្នាំ២០២៦ទៅ ដំឡើងពីចំនួន៣២ ទៅដល់ ៤៨ក្រុម។ សេចក្តីសម្រេចនេះ ត្រូវបាន FIFA បញ្ជាក់ថាដើម្បីអនុញ្ញាតឲ្យក្រុមកីឡាបាល់ទាត់កាន់តែច្រើន អាចមានឱកាសចូលរួមប្រកួត។ តែយ៉ាងណា មានមតិរិះគន់ជាច្រើន ដែលថា ហេតុផលសំខាន់នៃការពង្រីកចំនួននេះ គឺជាហេតុផលដើម្បីប្រមូលប្រាក់ បានកាន់តែច្រើន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
នេះគឺជាជោគជ័យទីមួយរបស់លោក Gianni Infantino ប្រធានថ្មីរបស់FIFA។ បច្ចុបន្បន្ននេះ ក្រុមបាល់ទាត់ដែលត្រូវជម្រុះជ្រើសរើសចូលទៅក្នុងការប្រកួត World Cup គឺមានចំនួន៣២ ហើយសរុបពេល World Cup ម្តងៗ គឺមានចំនួន៦៤ប្រកួត។ តែចាប់ពីឆ្នាំ២០២៦ទៅ ចំនួនក្រុមអេគីប នឹងឡើងដល់ ៤៨ហើយការប្រកួត នឹងឡើងដល់៨០ប្រកួត។ ប៉ុន្តែការរៀបចំបែបថ្មីនេះ គឺមិនផ្លាស់ប្តូរចំនួនថ្ងៃប្រកួត ទេពោលគឺ ការប្រកួតនៅតែប្រព្រឹត្តិទៅរយៈពេល៣២ថ្ងៃដដែល ដែលធ្វើឡើងនៅក្នុងពហុកីឡាដ្ឋាន១២កន្លែង។
សហព័ន្ធកីឡាបាល់ទាត់អន្តរជាតិ បានបញ្ជាក់ថា ការរៀបចំថ្មីនេះ គឺជាគំនិតដ៏ប្រសើរ ដើម្បីអនុញ្ញាតឲ្យក្រុមកីឡាបាល់ទាត់ មិនថាមកពីប្រទេសតូចប្រទេសធំ មានឱកាសចូលរួមបានកាន់តែច្រើន។ តែយ៉ាងណា គេនៅមិនទាន់ដឹងថា ១៦ក្រុមដែលត្រូវបន្ថែមថ្មី នឹងត្រូវបែងចែក ទៅតាមទ្វីបនីមួយៗ ដោយរបៀបណា ទេ។
ទោះយ៉ាងណាក្តី ការតំឡើងចំនួនក្រុមកីឡាបាល់ទាត់នេះ នៅតែគេចមិនផុតពីការរិះគន់។ សម្រាប់សមាគមក្លឹបកីឡាបាល់ទាត់អឺរ៉ុប គេយល់ថា ការតំឡើងចំនួនអេគីប មិនមែនធ្វើឡើងដោយហេតុផលកីឡាទេ តែធ្វើឡើងដោយហេតុផលហិរញ្ញវត្ថុ។ FIFA សង្ឃឹមថា ធ្វើដូច្នេះ គេនឹងចំណេញប្រាក់កាន់តែច្រើន។
ជាការពិត យោងតាមរបាយការណ៍របស់FIFA ដែលទីភ្នាក់ងារព័ត៌មានបារាំងបានពិនិត្យ ការរៀបចំថ្មីជាមួយនឹងចំនួនក្រុមបាល់ទាត់ ៤៨ក្រុមនេះ នឹងអនុញ្ញាតិឲ្យFIFA រកចំណូលបានថែម ចំនួន៦៤០លានដុល្លារ សម្រាប់World Cupម្តងៗ មិនត្រឹមតែប៉ុណ្ណោះ ចំណូលដែលបានពីសិទ្ធិផ្សព្វផ្សាយរូបភាពតាមទូរទស្សន៍ ក៏កើនឡើងបាន៥០០លានដុល្លារ ហើយចំណូលបានមកពីការផ្សាយពាណិជ្ជកម្ម ក៏នឹងអាចកើនបាន ៣៧០លានដុល្លារ ផងដែរ។ គឺដោយយោងលើរបាយការណ៍តួលេខទាំងនេះហើយ ទើបក្រុមប្រឹក្សាប្រតិបត្តិរបស់FIFA បានសម្រេចយល់ព្រម ជាឯកច្ឆ័ន កាលពីថ្ងៃអង្គារទី១០មករា។
ដោយឡែក សេចក្តីសម្រេចរបស់FIFAនេះ ក៏ត្រូវបានគេរិះគន់ផងដែរ ដោយសារតែវាបានធ្វើឡើងដោយតក់ក្រហល់ ដោយពុំមានឆ្លងកាត់ការសួរយោបល់គ្នា ពីសំណាក់សមាគមន៍ក្លឹបបាល់ទាត់ធំៗទូទាំងពិភពលោកទេ។ លោក Javier Tebas ប្រធានសហគមន៍Ligue របស់អេស្ប៉ាញ បាននិយាយថា លោក Gianni Infantino ប្រធានថ្មីរបស់ FIFA មានចរិកធ្វើការ មិនខុសពីលោក Joseph Blatter ទេ គឺចូលចិត្តសម្រេចអ្វី ដោយអត្តនោម័តតែឯង ឲ្យតែចំណេញលុយច្រើន។ យ៉ាងណាមិញ សហគមក្រុមកីឡាបាល់ទាត់អាជីព បានសម្តែងការព្រួយបារម្ភដែរ អំពីរបៀបរៀបចំថ្មីនេះ ដោយពួកគេយល់ថា ៤៨ក្រុម គឺវាច្រើនជ្រុលហួសហេតុពេក។ បើរយៈពេលនៃការប្រកួតនៅតែ៣២ថ្ងៃដដែល គឺមានន័យថា ក្រុមនីមួយៗ មិនមានពេលបានសំរាកគ្រប់គ្រាន់ទេ ព្រោះត្រូវប្រកួតច្រើនដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ