ប្រទេសអាល្លឺម៉ង់ចូលរួមនៅក្នុងយុទ្ធនាការប្រឆាំងនឹងអង្គការរដ្ឋអ៊ីស្លាមក្នុងទឹកដីស៊ីរី
នៅថ្ងៃសុក្រ ទី៤ ធ្នូនេះ សភាអាល្លឺម៉ង់បានបោះឆ្នោតអនុម័តសេចក្តីសម្រេចរបស់រដ្ឋាភិបាលក្នុងការចូលរួមជាមួយកម្លាំងសម្ព័ន្ធមិត្តនៅក្នុងយុទ្ធនាការប្រយុទ្ធប្រឆាំងនឹងអង្គការរដ្ឋអ៊ីស្លាមក្នុងប្រទេសស៊ីរី។ សេចក្តីសម្រេចចិត្តរបស់រដ្ឋាភិបាលក្រុងប៊ែរឡាំងបានធ្វើឡើងតាមការអំពាវនាវរបស់លោកប្រធានាធិបតីបារាំងហ្រ្វង់ស័រ ហូឡង់នៅក្រោយអំពើភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកា។ អំពើភេរវកម្មដែលបានសម្លាប់មនុស្ស ១៣០នាក់ និងរបួសជាង ៣០០នាក់។
ចុះផ្សាយនៅថ្ងៃ៖
ស្តាប់ - ០២:១៥
គម្រោងផែនការដែលស្នើឡើងដោយរដ្ឋាភិបាលរបស់លោកស្រីនាយករដ្ឋមន្រ្តីអាល្លឺម៉ង់អង់ហ្គេឡា មែរកិលទទួលបានសម្លេងគាំទ្រយ៉ាងច្រើនពីក្រុមអ្នកតំណាងរាស្រ្ត ពោលជាង ៥០០សម្លេងក្នុងចំនួនអសនៈទំាង ៦៣០ ដែលមាននៅក្នុងសភា។ នៅក្នុងគម្រោងផែនការនោះ រដ្ឋាភិបាលអាល្លឺម៉ង់គ្រោងនឹងបញ្ជូនកម្លាំងទ័ពច្រើនបំផុតចំនួន ១ ២០០នាក់ យន្តហោះចម្បាំងផ្នែកឈ្លបយកការណ៍ចំនួន ៦គ្រឿង ព្រមទាំងនាវាដឹកយន្តហោះចម្បាំងមួយគ្រឿងដើម្បីសហការណ៍ជាមួយនាវាដឹកយន្តហោះចម្បាំងបារាំង Charles-de-Gaulle។
ក៏ប៉ុន្តែ ទាហានអាល្លឺម៉ង់នឹងមិនចូលរួមនៅក្នុងបេសកកម្មទម្លាក់គ្រាប់បែកលើស៊ីរី ដូចទាហានបារាំង ទាហានអាមេរិកាំង ឬមួយក៏ទាហានអង់គ្លេសទេ។ ទាហានអង់គ្លេសដែលទើបបានផ្តើមបើកយុទ្ធនាការផ្លូវអាកាសលើស៊ីរីតំាងពីថ្ងៃព្រហស្បតិ៍ ទី៣ ធ្នូ ពោល ១ម៉ោងក្រោយពីមានភ្លើងខៀវពីសភា។ អ្វីជាការកត់សម្គាល់ បេសកកម្មយោធារបស់បស្ចិមលោកនៅស៊ីរីមិនមានការរួមសហការណ៍ជាមួយនឹងបេសកកម្មរបស់ទាហានរុស្ស៊ីនៅស៊ីរីទេ។ រុស្ស៊ីដែលរងការចោទប្រកាន់ថា មិនបានវាយប្រហារលើពួកជីហាតអង្គការរដ្ឋអ៊ីស្លាមទេ តែបានវាយប្រហារលើពួកអ្នកបះបោរប្រឆាំងនឹងរដ្ឋាភិបាលរបស់លោកប្រធានាធិបតីស៊ីរីអាសាដក្នុងគោលដៅជួយគាំទ្រលោកអាសាដដែលជាសម្ព័ន្ធមិត្តរុស្ស៊ី។
នៅខាងក្រុមអ្នកប្រឆាំង ពួកគេបានបរិហារលើសេចក្តីសម្រេចរបស់រដ្ឋាភិបាល ព្រមទាំងបរិហារលើកង្វះយុទ្ធសាស្រ្តពិតប្រាកដរបស់បស្ចិមលោកនៅក្នុងយុទ្ធនាការប្រឆាំងនឹងអង្គការរដ្ឋអ៊ីស្លាមនៅក្នុងប្រទេសស៊ីរី។ ចំណែកក្រុមអ្នកគាំទ្ររដ្ឋាភិបាលវិញបានបញ្ជាក់ពីភាពស្របច្បាប់នៃសេចក្តីសម្រេចចិត្តដោយសំអាងលើសេចក្តីសម្រេចរបស់អង្គការសហប្រជាជាតិក្នុងការកំចាត់អង្គការរដ្ឋអ៊ីស្លាម និងតាមសំណើសុំរបស់ប្រទេសបារាំង។
គួរជម្រាបជូនថា សេចក្តីសម្រេចចិត្តរបស់រដ្ឋាភិបាលអាល្លឺម៉ង់ក្នុងការបញ្ជូនទាហានឲ្យទៅចូលរួមជាមួយសម្ព័ន្ធមិត្តក្នុងការប្រយុទ្ធប្រឆាំងពួកជីហាតអង្គការរដ្ឋអ៊ីស្លាមនៅស៊ីរីទើបបានប្រកាសឲ្យដឹងនៅ ១សប្តាហ៍មុន។ គឺជាសេចក្តីសម្រេចដើម្បីឆ្លើយតបតាមសំណើរបស់លោកប្រធានាធិបតីបារាំងហ្រ្វង់ស័រ ហូឡង់នៅក្រោយអំពើភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកា។ អំពើភេរវកម្មដែលបានសម្លាប់មនុស្ស ១៣០នាក់ និងរបួសជាង ៣០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ