OTAN៖ ជំនួបកំពូលត្រៀមការពារខ្លួន ដើម្បីឆ្លើយតបទៅនឹងការគំរាមកំហែងរបស់រុស្ស៊ី
ចុះផ្សាយនៅថ្ងៃ៖
ស្តាប់ - ០៥:៣១
អង្គការសន្ធិសញ្ញាអាត្លង់ទិកខាងជើង រឺហៅកាត់ថា OTAN បានបិទបញ្ចប់ជំនួបកំពូលប្រចាំឆ្នាំរបស់ខ្លួននៅក្នុងទីក្រុងវ៉ាសូវី ប្រទេសប៉ូឡូញ នៅថ្ងៃអាទិត្យ ទី១០កក្កដានេះ។ ជំនួបកំពូលរវាងប្រទេសសមាជិកសហភាពអឺរ៉ុបទាំង២៨ ដែលជាសមាជិកនៃអង្គការនេះ ជាមួយនឹងសហរដ្ឋអាមេរិក ព្រមទាំងប្រទេសអឺរ៉ុបសមាជិកផ្សេងទៀត គឺដើម្បីស្វែងរកវិធីសាស្ត្រ និងមធ្យោបាយ ក្នុងការការពារខ្លួន ស្របពេលដែលរុស្ស៊ីកំពុងតែជម្រុញការត្រៀមរៀបចំអាវុធ នៅតាមបណ្តោយព្រំដែនជាមួយអឺរ៉ុប។ តែយ៉ាងណា OTAN មិនបានចាត់ទុករុស្ស៊ីជាសត្រូវទេ ហើយបន្តយន្តការចរចាជាមួយរុស្ស៊ីតទៅទៀត។
មហិច្ឆិតារុស្ស៊ី គឺជាគ្រោះថ្នាក់៖
ជំនួបកំពូលប្រចាំឆ្នាំនៃអង្គការអូតង់ គឺបានផ្តោតសំខាន់ទៅលើបញ្ហាសន្តិសុខ នៅតំបន់អឺរ៉ុបខាងកើត និងខាងជើង ពោលគឺតំបន់ដែលមានព្រំដែនជាប់ជាមួយរុស្ស៊ី។ ប៉ុន្មានឆ្នាំចុងក្រោយនេះ ខាងប្រទេសតំបន់សមុទ្របាល់ទិក មានដូចជាប៉ូឡូញ អេស្តូនី ឡេតូនី និងលីទុយអានី ជាដើម មានការព្រួយបារម្ភខ្លាំង ដោយសាររុស្ស៊ីដែលនៅជាប់ខាងកើត បានដាក់រាយកម្លាំងទ័ព និងបញ្ឈរអាវុធត្រៀម ដែលនេះគឺជាការគំរាមកំហែងសម្រាប់ពួកគេ។
យើងដឹងថាសង្រ្គាមត្រជាក់ បានចប់ជាស្ថាពរហើយ ក៏ប៉ុន្តែយើងនៅតែបារម្ភដដែលអំពីមហិច្ឆិតាយោធា របស់រុស្ស៊ី។ ដូចយើងបានឃើញស្រាប់ហើយនៅអ៊ុយក្រែន កាលពីឆ្នាំ២០១៤ ដែលរុស្ស៊ីបានលើកកម្លាំងមកទន្រ្ទានយកតំបន់គ្រីម៉េ ហើយបានពន្យុះក្រុមឧទ្ទាមខាងកើតអ៊ុយក្រែន ឲ្យធ្វើសង្រ្គាមទៀត។ ដូច្នេះ ការព្រួយបារម្ភពីមហិច្ឆិតារបស់រុស្ស៊ី វាមិនមែនជារឿងមិនសមហេតុសមផលទេ តែជារឿងពិត ដែលគ្រប់បណ្តាប្រទេសលោកខាងលិច កំពុងតែបារម្ភ។
បន្ថែមកម្លាំង៤០០០នាក់ និងស្ថាបនាប្រព័ន្ធការពារមីស៊ីល៖
ឆ្លើយតបទៅនឹងចលនាទ័ពរបស់រុស្ស៊ីនៅតំបន់បាល់ទិក អូតង់និងសមាជិកខ្លួនហាក់បានចាប់ដៃគ្នាបានល្អ។ លោកបារ៉ាក់ អូបាម៉ា បានថ្លែងកាលពីល្ងាចថា ទោះមានការអ្វីក៏ដោយ អាមេរិក នៅចាំជួយអឺរ៉ុប ជានិច្ច។ ក៏ប៉ុន្តែលោកឆ្លៀតបន្ថែមថា តែអឺរ៉ុប ក៏មិនត្រូវរំពឹងចាំតែជំនួយរបស់អាមេរិកទាំងស្រុងដែរ។ គ្រប់គ្នាត្រូវព្យាយាម ធ្វើឲ្យអស់ពីសមត្ថភាព។
ក្នុងន័យនេះ សមាជិកអូតង់ បានមូលមតិគ្នា បន្ថែមការចំណាយវិភាគទាន ដើម្បីដំណើរការរបស់អូតង់ និងជាពិសេសគឺដើម្បីសម្រេចឲ្យបានរួចរាល់នូវការសាងសង់ ប្រព័ន្ធការពារគ្រាប់មីស៊ីលនៅឆ្នាំ២០២០ ខាងមុខនេះ។ សម្រាប់ពេលនេះ អូតង់បានសម្រេច ដាក់ចល័តកម្លាំងចម្រុះចំនួន៤០០០នាក់ នៅតាមប្រទេសតំបន់បាល់ទិក។ បន្ថែមពីនេះទៀត កម្លាំងពិសេសមួយនឹងត្រូវបង្កើតឡើង ហើយដែលអាចចុះធ្វើអន្តរាគមន៍ភ្លាមៗ ក្នុងរយៈពេល៤៨ម៉ោង ក្នុងករណីមានការបន្ទាន់។
ទីតាំងប្រតិបត្តិការធំថ្មីរបស់អូតង់ នឹងត្រូវបើកឲ្យដំណើរការក្នុងពេលឆាប់ៗនេះ នៅទីក្រុងព្រុចសែល។ ទីតាំងថ្មីនេះ នឹងអនុញ្ញាតឲ្យមានការសហការប្រមូលទិន្ន័យរួមគ្នា ពីគ្រប់ស្ថានីយធំៗរបស់អូតង់ដែលដាក់រាយនៅជុំវិញអឺរ៉ុប។ មានន័យថា នាវាចម្បាំងអាមេរិកនៅក្បែរអេស្ប៉ាញ ប្រព័ន្ធរ៉ាដា នៅតួកគី និងប្រព័ន្ធចាប់រលកសញ្ញានៅរូម៉ានីជាដើម នឹងអាចធ្វើការរួមគ្នា ក្រោមការដឹកនាំនិងសម្របសម្រួលពីស្នាក់ការធំរបស់អូតង់នៅព្រុចសែល។
អង់គ្លេសសន្យាបន្តជួយអូតង់ ទោះបីខ្លួនដើរចេញពីសហភាពអឺរ៉ុប៖
ធ្លាប់មានគេព្រួយបារម្ភដែរ ពីផលប៉ះពាល់ ដល់ដំណើរការរបស់អូតង់ ក្នុងករណីដែលអង់គ្លេស ដើរចេញពីសហភាពអឺរ៉ុប ដោយសារតែអង់គ្លេស ជាអ្នកចំណាយប្រាក់សឹងតែមួយភាគបួន នៃដំណើរការអូតង់ នៅក្នុងសហភាពអឺរ៉ុប។ ក៏ប៉ុន្តែក្នុងពេលប្រជុំកាលពីថ្ងៃ៩ កក្កដា លោកដេវីដ ខាមឺរ៉ុន បានបញ្ជាក់ច្បាស់ហើយថា អង់គ្លេសនៅតែបន្តចូលរួមសហការជាមួយអូតង់ជានិច្ច។
លោកនាយករដ្ឋមន្ត្រីអង់គ្លេស បានបញ្ជាក់ថានៅថ្ងៃទី ១៨កក្កដាខាងមុខនេះ សភាអង់គ្លេសនឹងបោះឆ្នោតសម្រេចបន្តដាក់ប្រតិបត្តិការនាវាមុជទឹកបាតសមុទ្រចំនួន៤គ្រឿង បន្តទៀត។ នាវាមុជទឹក បំពាក់ដោយប្រព័ន្ធនុយក្លេអ៊ែរ នេះគឺជាមធ្យោបាយដ៏សំខាន់ ក្នុងការការពារសន្តិរួមរបស់អូតង់ និងរបស់អង់គ្លេសខ្លួនឯងផងដែរ។
ក៏ប៉ុន្តែ ទាក់ទិនទៅនឹងបញ្ហាប្រព័ន្ធនុយក្លេអ៊ែរនេះ នៅពេលអង់គ្លេសចេញពីសហភាពអឺរ៉ុបទៅ គឺមានន័យថាចាប់ពីពេលនោះទៅ គឺមានសល់តែបារាំងម្នាក់ឯងគត់ ដែលមានបច្ចេកវិទ្យាអាវុធនុយក្លេអ៊ែរ ក្នុងសហភាពអឺរ៉ុប។ ឆ្លើយតបជាមួយនឹងកម្មវិធីធ្វើប្រព័ន្ធការពារមីស៊ីល របស់អូតង់ លោកប្រធានាធិបតីបារាំងមិនបានរារាំង រឺប្រឆាំងដាច់ណាច់ទេ តែបារាំងបានសំណូមពរ ឲ្យមានការចែករំលែកការងារគ្នា មិនមែនអាមេរិកទទួលខុសត្រូវធ្វើទាំងស្រុងទេ។ បារាំងត្រូវមានចំណែកចាត់ចែង ទាក់ទងទៅនឹងប្រព័ន្ធអាវុធនុយក្លេអ៊ែរ។
ភាពចាំបាច់នៃប្រព័ន្ធការពារមីស៊ីលនុយក្លេអ៊ែរ៖
រុស្ស៊ីបច្ចុប្បន្ននេះ កំពុងតែដំឡើងកម្លាំង និងប្រព័ន្ធបាញ់គ្រាប់មីស៊ីលនៅតំបន់Kaliningrad នៅគ្រីម៉េ ហើយអាចនៅស៊ីរីទៀតផង។ហើយមិនមែនមានតែរុស្ស៊ីមួយទេ ដែលមានអាវុធមីស៊ីលនុយក្លេអ៊ែរ នៅមានអ៊ីរ៉ង់ និងកូរ៉េខាងជើងទៀត។ ដូច្នេះ វាជារឿងបន្ទាន់បំផុត ដែលអឺរ៉ុប ក៏ដូចជាអូតង់ ត្រូវសម្រេចឲ្យបាននូវប្រព័ន្ធការពារ រឺបំផ្លាញមីស៊ីលនុយក្លេអ៊ែរ ឲ្យបានមុនឆ្នាំ២០២០។
ក៏ប៉ុន្តែ លោករដ្ឋមន្ត្រីការបរទេសប៊ែលហ្សិក បានបញ្ជាក់ថា យ៉ាងណាក៏ដោយ គ្រប់គ្នាត្រូវតែបើកផ្លូវចំហរឲ្យធំ ដើម្បីជជែកដោះស្រាយបញ្ហាជាមួយរុស្ស៊ី ដោយសន្តិវិធី។ គេត្រូវការនិយាយចរចាជាមួយរុស្ស៊ី មិនមែនត្រឹមតែបញ្ហាសន្តិសុខនៅអឺរ៉ុបខាងកើតទេ តែគេក៏ត្រូវការរុស្ស៊ីក្នុងការដោះស្រាយបញ្ហានៅស៊ីរី និងអ៊ីរ៉ាក់ដែរ។ ដូច្នេះម្នាក់ៗ សុទ្ធតែមានផលប្រយោជន៍ ដើម្បីបញ្ចៀសសង្រ្គាម និងការផ្ទុះអាវុដាក់គ្នា។ វិធីតែមួយគត់គឺ និយាយចរចាគ្នា។
កម្លាំង១២០០០នាក់ បន្តនៅអាហ្វហ្កានីស្ថាន៖
ទាក់ទិននឹងអាហ្វហ្កានីស្ថាន OTAN បានសន្យាបន្តដាក់កម្លាំងពិសេសចំនួន១២០០០នាក់ នៅទីនោះរហូតដល់ចុងឆ្នាំ២០១៧។ បន្ថែមពីនេះទៀត ប្រទេសសមាជិកអូតង់ បានសន្យាបន្តជួយថវិកា ដើម្បីជួយកងទ័ពអាហ្វហ្កានីស្ថាន រហូតដល់ឆ្នាំ២០២០ដែរ។
ចំណែកនៅស៊ីរីនិងអ៊ីរ៉ាក់វិញ អូតង់បន្តជួយកងទ័ពអ៊ីរ៉ាក់ តាមរយៈការហ្វិកហាត់បច្ចេកទេស ដើម្បីវាយប្រយុទ្ធជាមួយក្រុមជីហាដអង្គការរដ្ឋអ៊ីស្លាម។ អូតង់ ក៏ជួយផងដែរនូវយន្តហោះស៊ើបការណ៍ជាច្រើនគ្រឿងដល់កងទ័ពអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ