របាយការណ៍ Sipri៖កំណើនចំណាយយោធានៅចិន រុស្ស៊ី និងប្រទេសអឺរ៉ុបខាងកើតក្នុងឆ្នំា ២០១៤
នៅថ្ងៃចន្ទ ទី១៣ មេសានេះ វិទ្យាសា្ថនស្រាវជ្រាវអន្តរជាតិស្តីពីសន្តិភាពហៅកាត់ថា Sipri ដែលមានទីស្នាក់ការក្នុងទីក្រុងស្តុកខុល ប្រទេសស៊ុយអែតបានចេញផ្សាយរបាយការណ៍ឆ្នំា ២០១៤ ស្តីពីការចំណាយថវិកាយោធានៅក្នុងពិភពលោក។ យោងតាមរបាយការណ៍ ប្រទេសចិន រុស្ស៊ី និងប្រទេសអឺរ៉ុបខាងកើតជាក្រុមប្រទេសដែលបានចាយវាយក្នុងផ្នែកយោធាច្រើនជាងគេកាលពីឆ្នំា ២០១៤ កន្លងទៅ។ យ៉ាងណាក៏ដោយ Sipri បានបញ្ជាក់ថា អាមេរិកនៅតែជាប្រទេសដែលបានចំណាយផ្នែកយោធាច្រើនជាងគេក្នុងលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ទោះបីជាការចំណាយផ្នែកយោធារបស់អាមេរិកបានថយចុះ ៦,៥% ក្នុងឆ្នំា ២០១៤ កន្លងទៅក៏ដោយ ក៏អាមេរិកនៅតែស្ថិតចំណាត់ថ្នាក់ទី១ ក្នុងលោកជាមួយនឹងទឹកប្រាក់ចំណាយចំនួន ៦១០ ០០០លានដុល្លារសម្រាប់ឆ្នំា ២០១៤ ហើយបើធៀបនឹងការចំណាយនៅមុនថ្ងៃមហាភេរវកម្មទី១១ កញ្ញា ឆ្នំា ២០០១ ថវិកាយោធារបស់អាមេរិកនៅក្រោយថ្ងៃមហាភេរវកម្មមានកំណើនប្រមាណជា ៤៥%។ ប្រទេសស្ថិតចំណាត់ថ្នាក់ទី២ គឺចិនដែលបានចំណាយប្រមាណជា ២១៦ ០០០លានដុល្លារសម្រាប់ឆ្នំា ២០១៤ ពោលគឺបានកើនឡើងចំនួន ៩,៧%។ ចំណែកប្រទេសស្ថិតក្នុងចំណាត់ថ្នាក់ទី៣ គឺរុស្ស៊ីជាមួយនឹងការចំណាយចំនួន ៨៤ ៥០០លានដុល្លារក្នុងឆ្នំា ២០១៤។
ឆ្នំា ២០១៤ ដែលទីក្រុងម៉ូស្គូបានបង្កើនថវិកាយោធាចំនួន ៨,១% ដើម្បីធ្វើទំនើបកម្មកម្លំាងទ័ពរបស់ខ្លួន។ រីឯនៅក្នុងឆ្នំា ២០១៥ ដែលស្ថានការណ៍នៅអ៊ុយក្រែនកំពុងធ្វើឲ្យរុស្ស៊ីប្រឈមមុខខ្លំាងនឹងបស្ចិមលោក ក្រុងម៉ូស្គូគ្រោងនឹងដំឡើងថវិកាយោធាចំនួន ១៥% តែគម្រោងនេះអាចនឹងកាត់បន្ថយបន្តិចវិញដោយសារតែបរិបទសេដ្ឋកិច្ចផុយស្រួយ។ ដោយឡែកនៅក្នុងប្រទេសអ៊ុយក្រែន ការចំណាយក្នុងវិស័យការពារជាតិបានកើនចំនួន ២៣% ក្នុងឆ្នំា ២០១៤ និងត្រូវកើនទ្វេដងសម្រាប់ឆ្នំា ២០១៥ នេះ។ នៅក្នុងប្រទេសប៉ូឡូញ រដ្ឋាភិបាលបានដំឡើងថវិកាការពារជាតិចំនួន ១៣% ក្នុងឆ្នំា ២០១៤ និងគ្រោងដំឡើងបន្ថែមចំនួន ៣៨% នៅក្នុងឆ្នំា ២០១៥។
យ៉ាងណាក៏ដោយ Sipri បានកត់សម្គាល់ឃើញជារួមថា ការចំណាយផ្នែកយោធានៅក្នុងពិភពលោកបានថយចុះប្រមាណជា ០.៤% ក្នុងរយៈពេល ៣ឆ្នំាជាប់ៗគ្នាចុងក្រោយនេះ ពោលគិតជាទឹកប្រាក់មាន ១ ៧៧៦លានដុល្លារ។ បើនិយាយពីការចំណាយផ្នែកយោធាក្នុងឆ្នំា ២០១៤ នៅតាមទ្វីបវិញ គឺមានការកើនឡើង។ ជាក់ស្តែងនៅអាហ្រ្វិកមានការកើនឡើងចំនួន ៥,៩% នៅអាស៊ី និងនៅអូសេអានីមានការកើនឡើងចំនួន ៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ