ប្រជាជនក្រិកបោះឆ្នោតបដិសេធ មិនយកសំណើរបស់ម្ចាស់បំណុល
ទីបំផុតទៅ ភាគច្រើននៃប្រជាជនក្រិក បានបោះឆ្នោតបដិសេធ មិនព្រមទទួលយក សំណើរបស់ម្ចាស់បំណុល។ នៅវេលាម៉ោង ៨យប់ ម៉ោង នៅប្រទេសក្រិក ក្រសួងមហាផ្ទៃក្រិក បានប្រកាសលទ្ធផលបណ្តោះអាសន្ន ថា ក្នុងចំណោម សន្លឹកឆ្នោត ដែលបានរាប់រួចរាល់ ចំនួន៤០% គឺ៦១%ភាគរយ ជាសម្លេង មិនព្រម ទល់នឹង សម្លេងព្រម ចំនួន៣៨%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ថ្ងៃចាប់ជ្រេ ពាក្យចរចាមអារ៉ាម ពីលទ្ធផលនៃប្រជាមតិ ចាប់ផ្តើមលេចឮខ្សឹបខ្សៀវ មនុស្សម្នាចាប់ផ្តើមជួបជុំគ្នា ដើម្បីអបអរសាទរលទ្ធផល។ ពេលវេលាកាន់តែខិត លទ្ធផលឃើញកាន់តែច្បាស់ថា សម្លេងមិនគាំទ្ររបស់ ប្រជាជនក្រិក មានច្រើនលើស សម្លេងគាំទ្រ។ យោងតាមលទ្ធផលបណ្តោះអាសន្ន សម្លេងឆ្នោតប្រឆាំងមានចំនួន ៦១ ភាគរយ ទល់នឹង សម្លេងយល់ព្រម ចំនួន៣៨%។
លទ្ធផលនេះ មិនមែនគ្រាន់តែជាជោគជ័យរបស់រដ្ឋាភិបាលក្រិក ដែលបានអំពាវនាវឲ្យប្រជាជនខ្លួនបោះឆ្នោតបដិសេធនោះទេ តែវាជាជោគជ័យ របស់ប្រជាជាតិក្រិកទាំងមូល ដែលបានចាប់ដៃគ្នា យ៉ាងណែន ដើម្បីទប់ទល់នឹងការដាក់គំនៀប ពីសំណាក់ម្ចាស់បំណុល និង សហភាពអឺរ៉ុប។ ព្រឹត្តិការណ៍ដ៏សំខាន់មួយនេះ កំពុងធ្វើឲ្យរញ្ជួយ នយោបាយហិរញ្ញវត្ថុ របស់តំបន់ចាយលុយអឺរ៉ូ ទាំងមូល ព្រោះនេះជាលើកទីមួយហើយ ក្នុងប្រវត្តិសាស្ត្រសហភាពអឺរ៉ុប ដែលប្រជាជនប្រទេសមួយ នាំគ្នាបោះឆ្នោតបដិសេធ វិធានការរឹតត្បិតថវិកា ដែលដាក់ចេញដោយ សហភាពអឺរ៉ុប។
នៅម៉ោងប្រហែលជា ម៉ោង១០ និង៣០ នាទីយប់ លោក នាយករដ្ឋមន្ត្រីក្រិក អាឡិចស៊ីស ស៊ីប្រាស បានធ្វើសុន្ទរកថា តាមទូរទស្សន៍ ដោយបានអបអរសាទរលទ្ធផល និងបានអរគុណប្រជាជនក្រិក ដែលបានបោះឆ្នោតបដិសេធ ទៅតាមអ្វី ដែលរដ្ឋាភិបាលបានអំពាវនាវ។ លោកបានបញ្ជាក់ថា វាមិនមែនជាការងាយទេ ក្នុងការដោះខ្លួនចេញពីវិបត្តិបំណុលនេះ ប៉ុន្តែ លោកជឿទុកចិត្ត ថា កិច្ចព្រមព្រៀងថ្មីមួយ ដែលសមហេតុសមផល មានលក្ខណៈមនុស្សធម៌ និងគិតពីប្រយោជន៍រួមរបស់ប្រជាជនក្រិក គឺជាជម្រើសដ៏ល្អ។ បើគ្រប់គ្នា ពិតជាមានចេតនាជួយក្រិក នោះគ្មានអ្វីដែលមិនអាចទៅរួចទេ។
ជាការពិតណាស់ តាមរយៈលទ្ធផល បដិសេធរបស់ប្រជាជនក្រិក នាពេលនេះ មិនមែនមានន័យថា វាសនាក្រិក នឹងត្រូវបានស្រោចស្រង់នោះទេ។ វាសនាក្រិក គឺនៅស្ថិតក្នុងដៃទាំងស្រុង របស់ម្ចាស់បំណុល នៅឡើយ។ គ្រាន់តែថា ចាប់ពីពេលនេះទៅ រដ្ឋាភិបាលក្រិក មានកម្លាំងខ្លាំងជាងមុន ក្នុងការចរចា ជាមួយម្ចាស់បំណុល។ ក្រិកចេញ ឬ មិនចេញ ពីតំបន់ចាយលុយអឺរ៉ូ ក៏គេនៅមិនទាន់អាចស្មានបាននៅឡើយដែរ សម្រាប់ពេលនេះ។
ថ្ងៃចន្ទនេះ លោកស្រី អង់ហ្គេឡា មែរគែល ប្រមុខរដ្ឋាភិបាលអាល្លឺម៉ង់ និងអញ្ជើញទៅជួបលោក ប្រធានាធីបតី បារាំង ដើម្បីស្វែងរកដំណោះស្រាយបន្ទាន់។ ក្នុងចំណោមថ្នាក់ដឹកនាំអឺរ៉ុប មានតែលោកស្រីអង់ហ្គេឡា មែគែលម្នាក់គត់ ដែលរឹងរូសជាងគេ មិនព្រមធ្វើសម្បទាន ជាមួយរដ្ឋាភិបាលក្រិក។ អ្វីដែលគេ មិនគួរភ្លេច គឺថា ក្នុងចំណោមលុយដែល ក្រិកជំពាក់ ក៏មានលុយអាល្លឺម៉ង់ មិនតិចដែរ។ ដូច្នេះវា ជារឿងធម្មតាទេ ដែលអាល្លឺម៉ង់ បារម្ភពីការប្រាក់របស់ខ្លួន។ ប៉ុន្តែសម្រាប់ពេលនេះ សហភាពអឺរ៉ុប ដែលមានបារាំង នឹង អាល្លឺម៉ង់ ជាក្បាលម៉ាស៊ីន គួរតែសម្តែងសាមគ្គីភាពរវាងគ្នា ដើម្បីស្រោចស្រង់ក្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ