វិបត្តិនយោបាយថៃ៖ ក្រុមបាតុករ និងរដ្ឋាភិបាលផ្តើមចង្អុលមុខដាក់គ្នា ក្រោយផ្ទុះគ្រាប់បែក
ចុះផ្សាយនៅថ្ងៃ៖
ស្តាប់ - ០៧:១៧
នៅក្នុងប្រទេសថៃ ទីក្រុងបាងកកមួយភាគធំកំពុងបន្តកាន់កាប់ដោយក្រុមបាតុករអាវលឿង។ មានទីតំាងយុទ្ធសាស្រ្តមួយចំនួនត្រូវបានក្រុមបាតុករបោះជំរំស្នាក់នៅដូចដែលគេធ្លាប់បានឃើញកាលពីក្នុងវិបត្តិឆ្នំា ២០១០ កន្លងទៅ។ ព័ត៌មានថ្មី និងដែលអាចចាត់ទុកថាធ្ងន់ធ្ងរនៅថ្ងៃសុក្រនេះ គឺការផ្ទុះគ្រាប់បែកមួយគ្រាប់នៅក្នុងហ្វូងបាតុករដែលបានបណ្តាលឲ្យរបួសធ្ងន់ និងស្រាលយ៉ាងតិច ២៨នាក់។ ប្រតិកម្មភ្លាម រដ្ឋាភិបាល និងក្រុមបាតុករបានទម្លាក់កំហុសដាក់គ្នាទៅវិញ ទៅមក។
យោងតាមព័ត៌មានចុះផ្សាយដោយទីភ្នាក់ងារសារព័ត៌មានបារំាង AFP ឲ្យដឹងថា គ្រាប់បែកបានផ្ទុះនៅវេលាម៉ោង ១រសៀល ម៉ោងក្នុងទីក្រុងបាងកក។ គ្រាប់បែកនោះមិនបានផ្ទុះនៅចំកណ្តាលហ្វូងបាតុករទេ តែបានផ្ទុះនៅពីមុខក្បួនបាតុកម្មដឹកនំាដោយលោកស៊ូថេប និងដែលការផ្ទុះនោះមានចម្ងាយពីលោកស៊ូថេបប្រមាណ ៣០ម៉ែត្រ។ ភ្លាមៗ ក្រុមកងការពារលោកស៊ូថេបក៏បានគ្រាកលោកស៊ូថេបចូលទៅក្នុងសួនឧទ្យានក្បែរនោះដែលជាទីកន្លែងបោះទីតំាងរបស់ក្រុមបាតុករអាវលឿងអស់រយៈពេលជាច្រើនថ្ងៃកន្លងមក។
រូបភាពនៅក្រោយការផ្ទុះគ្រាប់បែកនោះត្រូវបានទូរទស្សន៍គំាទ្របាតុករចាក់ផ្សាយជាប់មិនដាច់ដោយបានបង្ហាញឲ្យឃើញនូវទិដ្ឋភាពរត់ប្រសេកប្រសាចរបស់បាតុករ និងមានអ្នកខ្លះទៀត ដេក ក្រាបផ្ទាល់ដី ពិសេសគឺរូបភាពបាតុកររងរបួសដែលមានឈាមហូរដាបពេញខ្លួន។ យោងតាមតួលេខផ្តល់ដោយមជ្ឈមណ្ឌលជួយសង្រ្គោះឲ្យដឹងថា មានមនុស្សរងរបួសយ៉ាងតិច ៣១នាក់ ក្នុងនោះមានរបួសធ្ងន់ម្នាក់។ ចំណែកខាងប៉ូលិសក៏បានបញ្ជូនក្រុមអ្នកស៊ើបអង្កេតភ្លាមទៅកាន់កន្លែងកើតហេតុ។ នៅពេលនេះ បាតុករ និងរដ្ឋាភិបាលបានទម្លាក់កំហុសដាក់គ្នាទៅវិញ ទៅមក។ តែមានមតិខ្លះលើកឡើងថា អាចជាស្នាដៃរបស់ប្រជាជនក្នុងក្រុងបាងកកដែលធុញទ្រាន់នឹងពួកបាតុករដែលរំខានដល់ការរស់នៅ រកស៊ីរបស់ពួកគេ។
បាតុករ និងរដ្ឋាភិបាលបន្តចង្អុលមុខដាក់គ្នា
អំពើហិង្សាដែលកើតចេញពីការបំផ្ទុះគ្រាប់បែក ពីការបាញ់ប្រហារ ឬមួយក៏ពីទង្វើអ្វីផ្សេងទៀតនៅក្នុងក្បួនបាតុកម្មតាមផ្លូវ គឺជារឿងមួយមិនអាចចៀសផុត។ ករណីប្រទេសថៃ សឹងក្លាយជារឿងមួយធម្មតាទៅហើយ ព្រោះថា អំពើហិង្សានយោបាយក្នុងប្រទេសជិតខាងកម្ពុជាមួយនេះបានកើតមានតំាងក្រោយរដ្ឋប្រហារយោធាទម្លាក់លោកនាយករដ្ឋមន្រ្តីថាក់ស៊ីនក្នុងឆ្នំា ២០០៦ មកម្ល៉េះ។ ក៏ប៉ុន្តែ អ្វីដែលប្លែកបន្តិចនាពេលនេះ គឺថា ឧប្បត្តិហេតុក្នុងរយៈពេលប៉ុន្មានថ្ងៃចុងក្រោយនេះច្រើនកើតមាននៅពេលយប់ក្នុងជំរំរបស់បាតុករអាវលឿងខ្លួនឯង ដោយគេមិនដឹងថា តើជនដៃដល់ជានរណា និងមកពីខាងណាទេ។ ជាក់ស្តែងថ្មីៗនេះ មានការចោលគ្រាប់បែកមួយគ្រាប់លើផ្ទះមួយរបស់លោកអតីតនាយករដ្ឋមន្រ្តីអាប់ភីសិតក្នុងពេលរាត្រី ដោយមិនបានបង្កឲ្យមានមនុស្សស្លាប់ និងរងរបួសឡើយ។
សូមជម្រាបជូនថា បាតុកម្មក្នុងទីក្រុងបាងកកសព្វថ្ងៃ គឺជាបាតុកម្មរបស់ក្រុមអាវលឿងសុទ្ធសាធ ពោលមិនមានបាតុកម្មរបស់ពួកអាវក្រហមគំាទ្រលោកស្រីនាយករដ្ឋមន្រ្តីយីងឡាក់ទេ។ តែមកដល់ពេលនេះ ទំាងព្រឹត្តិការណ៍ចោលគ្រាប់បែកលើផ្ទះរបស់លោកអាប់ភីសិត ក៏ដូចជាការបំផ្ទុះគ្រាប់បែកនារសៀលថ្ងៃនេះ ត្រូវបានក្រុមបាតុករអាវលឿងចោទលោកស្រីយីងឡាក់ចំមុខ។ តែត្រូវបានលោកឧបនាយករដ្ឋមន្រ្តីស៊ូរ៉ាពុងចោទត្រឡប់វិញថា គឺជាទង្វើរបស់ក្រុមបាតុករអាវលឿងខ្លួនឯងក្នុងបំណងបញ្ឆេះអំពើហិង្សាដើម្បីឲ្យទាហានចូលខ្លួនធ្វើអន្តរាគមន៍។
អ្វីដែលលោកស៊ូថេបចង់បាន គឺរដ្ឋប្រហារយោធាទម្លាក់លោកស្រីយីងឡាក់
ការដែលលោកស៊ូរ៉ាពុងហ៊ាននិយាយថា ជាទង្វើរបស់ក្រុមបាតុករអាវលឿងខ្លួនឯងក្នុងបំណងបញ្ឆេះអំពើហិង្សាដើម្បីឲ្យទាហានចូលខ្លួនធ្វើអន្តរាគមន៍នោះ ពិតជារឿងមួយមិនសូវខុសប៉ុន្មានទេ បើគេពិនិត្យមើលនៅក្នុងវិបត្តិនាពេលកន្លងមក។ តំាងពីជាង ២ខែមកហើយដែលក្រុមបាតុករអាវលឿងធ្វើបាតុកម្មទាមទារឲ្យលោកស្រីយីងឡាក់ចុះចេញពីតំណែង។ ក្បួនបាតុកម្មដែលមិនសូវកើតមានអំពើហិង្សា និងដែលរដ្ឋាភិបាលព្យាយាមទ្រំាអត់ធ្មត់។ តែចំពោះពួកបាតុករ នេះពិតជាបរិយាកាសមួយមិនល្អសោះ ព្រោះថា បើស្ថានការណ៍នៅតែបន្តយ៉ាងដូចនេះ មិនដឹងជាថ្ងៃណាដែលខ្លួនអាចទម្លាក់លោកស្រីយីងឡាក់បានឡើយ។
ពួកគេយល់ថា គឺមានតែបង្កើតឲ្យមានបរិយាកាសវឹកវរ ច្របូកចបល់តាមរយៈការបញ្ឆេះអំពើហិង្សាទេ ទើបគេអាចផ្លាស់ប្តូររបបដឹកនំាបច្ចុប្បន្នបាន។ គឺរូបភាពវឹកវរ ច្របូកចបល់ដែលគ្មាននរណាអាចគ្រប់គ្រងបាននោះឯងដែលនឹងអាចជម្រុញកងទ័ពឲ្យចេញអន្តរាគមន៍បាន តាមរយៈធ្វើរដ្ឋប្រហារ។ នេះហើយជាបំណងប្រាថ្នាដែលមេបាតុករអាវលឿងលោកស៊ូថេបទន្ទឹងរង់ចំាតែមួយគត់ ព្រោះថា ទម្លាក់លោកស្រីយីងឡាក់តាមក្បួនបាតុកម្មអហិង្សាប្រហែលជាមិនអាចមិនរួច ហើយទម្លាក់តាមការបោះឆ្នោត គឺរឹតតែគ្មានសង្ឃឹមទៅទៀត។
ករណីលោកស៊ូថេប ជារឿងនយោបាយ
កាលពីដើមខែធ្នូ ឆ្នំា ២០១៣ តុលាការបានចេញដីការឲ្យចាប់ខ្លួនលោកស៊ូថេប ពីបទបានញុះញង់ឲ្យមានការងើបបះបោរប្រឆំាងនឹងរដ្ឋាភិបាលរបស់លោកស្រីយីងឡាក់។ ក្រៅពីដីការនេះ លោកស៊ូថេបក៏កំពុងជាប់ចោទក្នុងរឿងអាស្រូវមួយទៀតកាលពីឆ្នំា ២០១០ នៅក្នុងព្រឹត្តិការណ៍វាយបង្រ្កាបយ៉ាងហិង្សាលើក្រុមបាតុករគំាទ្រលោកថាក់ស៊ីនដោយបានបណ្តាលឲ្យមានមនុស្សស្លាប់ ៩០នាក់។ កាលណោះ លោកស៊ូថេបមានតំណែងជាឧបនាយករដ្ឋមន្រ្តីក្នុងរដ្ឋាភិបាលរបស់លោកអាប់ភីសិត។
តែមកដល់ពេលនេះ លោកស៊ូថេបនៅបន្តមានសេរីភាពពេញទី និងថែមទំាងបានចេញមុខចាត់ចែងមហាបាតុកម្មយ៉ាងគគ្រឹកគគ្រេងមកដល់ម៉ោងនេះទៀតផង។ នៅថ្ងៃព្រហស្បតិ៍ ទី១៦ មករា រដ្ឋាភិបាលបានអំពាវនាវជាថ្មីឲ្យប៉ូលិសចាប់ខ្លួនលោកស៊ូថេប។ តែប៉ូលិសនៅតែមិនហ៊ានចាប់ខ្លួនលោកស៊ូថេបដដែល។ ឥឡូវនេះ រឿងរ៉ាវនេះក៏ហាក់ដូចបន្តស្ងាប់ស្ងាត់ និងមិនសូវនិយាយច្រើនប៉ុន្មានទេ។ ក្រុមអ្នកវិភាគបានយល់ឃើញថា រឿងរ៉ាវនេះមានបង្កប់ទៅដោយរឿងនយោបាយច្រើនជាងរឿងបុគ្គលរបស់លោកស៊ូថេបផ្ទាល់ ពិសេសនៅក្នុងស្ថានការណ៍នយោបាយមិនទៀងទាត់នាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ