អគ្គលេខាធិការអូតង់៖ ទ័ពពិសេសដើម្បីប្រតិកម្មរហ័សនឹងអាចធ្វើប្រតិបត្តិការនៅដើមឆ្នាំ ២០១៥
ចុះផ្សាយនៅថ្ងៃ៖
ស្តាប់ - ០៥:៥១
រដ្ឋមន្រ្តីការបរទេសរបស់ប្រទេសសមាជិកអង្គការអូតង់បានជួបប្រជុំគ្នា នៅថ្ងៃអង្គារទី ២ ធ្នូ នៅទីក្រុងព្រុចស៊ែល ប្រទេសបែលហ្ស៊ិក។ នៅក្នុងកិច្ចប្រជុំបូកសរុបដំណាច់ឆ្នាំ ប្រមុខការទូតរបស់អូតង់ផ្តោតសំខាន់ ពិភាក្សាលើស្ថានការណ៍ដែលបានកើតមាន នៅក្នុងពិភពលោក នៅក្នុងអំឡុងពេលមួយឆ្នាំនេះ ចាប់តាំង ពីវិបត្តិនៅអ៊ុយក្រែន សង្រ្គាមរបស់ពួកជីហាត នៅស៊ីរី និងអ៊ីរ៉ាក់ ដោយមិនភ្លេចនិយាយពីដំណើរដកកងទ័ពអន្តរជាតិចេញពីអាហ្វហ្កានីស្ថាន ដែលត្រូវបញ្ចប់បេសកកម្មរបស់ខ្លួន នៅចុងឆ្នាំ២០១៤នេះ។ ឆ្នាំ២០១៤ សំបូរទៅដោយរឿងរំលោភឈ្លានពាន វិបត្តិ និងជម្លោះសង្រ្គាមស៊ីវិល។ នេះជាការកត់សំគាល់របស់អគ្គលេខាធិការថ្មីរបស់អង្គការអូតង់ ឬសម្ព័ន្ធអាត្លង់ទិកខាងជើង លោកចេន ស្តូលតង់ប៊ើក Jens Stoltenberg។
នៅក្នុងកិច្ចប្រជុំថ្ងៃនេះ រដ្ឋមន្រ្តីការបរទេសរបស់ប្រទេសសមាជិកទំាង២៨របស់អូតង់ ត្រូវធ្វើការបូកសរុបប្រចាំឆ្នាំ នូវរាល់ព្រឹត្តិការណ៍ ទាក់ទងនឹងជម្លោះប្រដាប់អាវុធដែលបានកើតមាន នៅក្នុងពិភពលោក នៅក្នុងរយៈពេល មួយឆ្នាំ នេះ។ គេធ្វើការបូកសរុប ក៏ដូចជានឹងពិភាក្សាលំអិតពីវិធានការដែលអង្គការអូតង់បានសម្រេច នៅក្នុងជំនួបកំពូល កាលពីខែកញ្ញាកន្លងទៅ នៅក្នុងប្រទេសអង់គ្លេស។
ទាក់ទងនឹងវិបត្តិដែលកំពុងកើតមាននៅភាគខាងកើតអ៊ុយក្រែន និងជម្លោះប្រដាប់អាវុធបង្កដោយពួកជីហាតនៅស៊ីរី និងនៅអ៊ីរ៉ាក់ ប្រមុខរដ្ឋរបស់ប្រទេសសមាជិកអូតង់ កាលពីក្នុងជំនួបកំពូលអូតង់ នៅប្រទេសអង់គ្លេស បានសម្រេចចាត់វិធានការបង្កើតក្រុមទ័ពពិសេសរបស់អូតង់មួយ ដែលមានសមត្ថភាពអន្តរាគមន៍ក្នុងរយៈពេលដ៏ខ្លីបំផុត។
បច្ចុប្បន្ននេះ អូតង់មានទ័ពពិសេសប្រមាណ ១ម៉ឺន ៥ពាន់នាក់ ដែលមានឈ្មោះថា កងកម្លាំងប្រតិកម្មរហ័ស។ រហូតមក អូតង់ត្រូវការពេលយ៉ាងតិច មួយខែ ដើម្បីបញ្ជូនអង្គភាពកងកម្លាំងប្រតិកម្មរហ័ស ទៅក្នុងបេសកកម្មណាមួយ។ ប៉ុន្តែ កាលពីខែកញ្ញា ប្រមុខរដ្ឋរបស់សមាជិកអូតង់បានសម្រេចបង្កើតទ័ពពិសេសមួយ ដែលមានចំនួនតែ ពី៣០០ ទៅ ១២០០នាក់ ដែលរើសចេញពីកងកម្លាំងប្រតិកម្មរហ័ស និងដែលមានសមត្ថភាពអាចធ្វើអន្តរាគមន៍ ភា្លមៗ ក្នុងរយៈពេលតែពី ៤ ទៅ៥ថ្ងៃប៉ុណ្ណោះ។ ក្រុមនេះនឹងអាចចេញធ្វើប្រតិបត្តិការចាប់ពីឆ្នាំ ២០១៦។ ប៉ុន្តែ តាមអគ្គលេខាធិការអូតង់ លោក Jens Stoltenberg គេនឹងអាចសាកល្បងសមត្ថភាពរបស់ក្រុមទ័ពពិសេស មួយក្រុម ចាប់ពីដើមឆ្នាំ ក្រោយនេះ ទៅ។ អាល្លឺម៉ង់ ន័រវែស ជាពិសេស ប៉ូឡូញ ដែលបារម្ភជាងគេពីការឈ្លានពានរបស់រុស្ស៊ីទៅក្នុងទឹកដីរបស់ខ្លួន បានស្ម័គ្រចិត្តបញ្ជូនទ័ពរបស់ខ្លួន ទៅក្នុងអង្គភាពទ័ពពិសេស សាកល្បងរបស់អូតង់។
អគ្គលេខាធិការរបស់អូតង់ធ្លាប់បាននិយាយថា គេនឹងអាចបេះយកចំណែកណាមួយពីកញ្ចប់ថវិការបស់អូតង់ ឬបើមិនដូច្នោះទេ គឺប្រទេសសមាជិកត្រូវចូលរួមធ្វើវិភាគទានបន្ថែម។ អូតង់បានបង្កើនសកម្មភាពទ័ព ជាច្រើន នៅមួយរយៈពេលចុងក្រោយនេះ ដើម្បីការពារដែនអាកាស និងដែនទឹករបស់ប្រទេសសមាជិករបស់ខ្លួន ដូចជាបង្កើនចំនួនយន្តហោះចម្បាំងឲ្យទៅហោះហើរ ធ្វើជាយន្តហោះប៉ូលិសនៅលើដែនអាកាសនៅអឺរ៉ុបខាងកើត ឬបញ្ជូននាវាចម្បាំងទៅក្នុងសមុទ្រខ្មៅ និងសមុទ្របាល់ទិក បន្ទាប់ពីកត់សំគាល់ឃើញវត្តមានញយដងរបស់ទ័ពរុស្ស៊ី។
ដោយសារតែវិបត្តិសេដ្ឋកិច្ចនៅក្នុងប្រទេស សមាជិករបស់អូតង់កាន់តែច្រើនបានកាត់បន្ថយវិភាគទានរបស់ខ្លួន សម្រាប់អង្គការអូតង់។ ប៉ុន្តែ នៅក្នុងជំនួបកំពូល ប្រមុខដឹកនាំរបស់ប្រទេសសមាជិកអូតង់បានប្រកាសប្តេជ្ញាថា នឹងព្យាយាមផ្តល់ថវិការបស់ខ្លួនដែលស្មើនឹង២ភាគរយនៃផលិតផលក្នុងស្រុកសរុបសម្រាប់កេសថវិការបស់អូតង់។
ការសុំចូលរបស់អ៊ុយក្រែន ជាសមាជិករបស់អូតង់ជាប្រភពក្តៅក្រហាយសម្រាប់រុស្ស៊ី
នៅក្នុងពេលកំពុងមានភាពតានតឹងជាមួយរុស្ស៊ី គ្មាននរណាគិតថា ការសុំ របស់អ៊ុយក្រែន សមាជិករបស់អង្គការអូតង់ជារឿងដែលត្រូវធ្វើនៅពេលបច្ចុប្បន្ននេះទេ។ រុស្ស៊ីផ្ទាល់ធ្លាប់បានព្រមានធ្ងន់ៗពីផលវិបាក ប្រសិនបើអ៊ុយក្រែនចូលជាសមាជិករបស់អូតង់។ សម្រាប់រុស្ស៊ី វាជាការគំរាមកំហែងដល់សុវត្ថិភាពទឹកដីរុស្ស៊ី។
ដើម្បីជៀសវាងបន្ថែមភាពតានតឹង អូតង់នឹងមិនជជែកភ្លាមៗទៅលើបំណងចូលជាសមាជិករបស់អ៊ុយក្រែនទេ ប៉ុន្តែ អូតង់គ្រាន់តែបញ្ជាក់ថា គេនៅតែបើកទ្វារជានិច្ចសម្រាប់ប្រទេសប្រជាធិបតេយ្យ និងឯករាជ្យ។
យ៉ាងណាក៏ដោយ បើទោះបីជាមិននិយាយពីការសុំចូលជាសមាជិក របស់អ៊ុយក្រែន ប៉ុន្តែអូតង់ កំពុងគិតគូររកថវិកា និងមធ្យោបាយសម្រាប់ជួយពង្រឹងទ័ពអ៊ុយក្រែន ទប់ទល់នឹងរុស្ស៊ី។ នៅថ្ងៃនេះ រដ្ឋមន្រ្តីការបរទេសរបស់អូតង់ត្រូវជួបជាមួយរដ្ឋមន្រ្តីការបរទេសអ៊ុយក្រែន ដើម្បីជជែកពីការបង្កើតមូលនិធិចំនួន៤ ដែលមានតម្លៃ ១៥លានដុល្លារ។ ១៥លានដុល្លារ ដើម្បីធ្វើទំនើបកម្មកងទ័ពអ៊ុយក្រែន។
ប្រធានាធិបតីថ្មីរបស់អាហ្វហ្កានីស្ថានត្រូវអញ្ជើញឲ្យចូលរួមនៅក្នុងកិច្ចប្រជុំថ្នាក់រដ្ឋមន្រ្តីការបរទេសនៅព្រុចស៊ែល ព្រោះថា កិច្ចប្រជុំត្រូវផ្តោតសំខាន់ផងដែរ ទៅលើការបិទបញ្ចប់បេសកកម្មធ្វើសង្រ្គាមប្រឆាំងពួកតាលីបង់ រយៈពេល១៣ឆ្នាំរបស់ទ័ពអន្តរជាតិ នៅអាហ្វហ្កានីស្ថាន។ នៅចុងឆ្នាំ ២០១៤ អូតង់ត្រូវដកទ័ពចេញទាំងអស់ ប៉ុន្តែ តាមកិច្ចព្រមព្រៀងរវាងរដ្ឋាភិបាលថ្មីរបស់អាហ្វហ្កានីស្ថាន និងអូតង់ និងអាមេរិក ទ័ពអន្តរជាតិប្រមាណ១ម៉ឺន ពីរពាន់៥រយនាក់ ដែលក្នុងនោះមានមួយម៉ឺននាក់ជាទ័ពអាមេរិក ត្រូវបន្តរក្សាទុកនៅអាហ្វហ្កានីស្ថាន។ តួនាទីរបស់ពួកគេគេគឺចូលរួមបណ្តុះបណ្តាលកងទ័ពអាហ្វហ្កានីស្ថាន ប៉ុន្តែ លែងចូលរួមធ្វើសង្រ្គាម ប្រយុទ្ធដោយផ្ទាល់ប្រឆាំងពួកតាលីបង់ទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ