ជនជាតិបារាំងម្នាក់ទទួលបានចំណាត់ថ្នាក់លេខមួយក្នុងការប្រកួតនិយាយពីភាសាខ្មែរជាលើកដំបូង!
លោក Blaise Kilianជាជនជាតិបារាំងទទួលបានចំណាត់ថ្នាក់លេខ១ ក្នុងការប្រកួតនិយាយភាសាខ្មែរសម្រាប់ជនបរទេសលើកដំបូងនៅកម្ពុជា។ ក្នុងការប្រកួតនេះមានបេក្ខជនចំនួន២២នាក់ មកពី៩ ប្រទេស។ កម្មវិធីនេះត្រូវបានរៀបចំឡើងនៅរសៀលថ្ងៃសៅរ៍ទី ១៣ មិថុនានេះ នៅឯសាលកវិទ្យាល័យបញ្ញាសាស្ត្រកម្ពុជា ទីតាំងខាងត្បូងវិមានឯករាជ្យ ក្នុងរាជធានីភ្នំពេញ ហើយក៏មានការចូលរួមពីលោករដ្ឋមន្ត្រីក្រសួងអប់រំ និងកីឡា ហង់ ជួនណារ៉ុន រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រីភឿង សកុណា ឯកអគ្គរដ្ឋទូតនៃបណ្តាប្រទេសមួយចំនួន សាស្ត្រាចារ្យ និងនិស្សិតសរុបទាំងអស់ជិត ៥០០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ការប្រកួតនិយាយភាសាខ្មែរសម្រាប់ជនបរទេសលើកដំបូងនៅកម្ពុជានេះ ត្រូវបានរៀបចំឡើងជា៣កំរិត។ កំរិតធម្យម មានបេក្ខជន៩រូប កំរិតខ្ពស់មានបេក្ខជនចំនួន៧រូប និង កំរិតជំនាញមានបេក្ខជន៦រូប។ លោក Blaise Kilian បានប្រកួតនិយាយភាសាខ្មែរនៅក្នុងកំរិតជំនាញ ដោយលោកបានប្រកួតប្រជែងជាមួយនិងបេក្ខជនមកពីប្រទេសអូស្ត្រាលីម្នាក់ ជប៉ុន៣នាក់ និងអង់គ្លេសម្នាក់។
បេក្ខជនទាំង២២នាក់នេះ មកពីបណ្តាប្រទេសដូចជា ជប៉ុន បារាំង ប៊ែលស្សិក កូរ៉េខាងត្បូង កូរ៉េខាងជើង អូស្ត្រាលី អ៊ីតាលី អង់គ្លេស និងសហរដ្ឋអាមេរិក។បេក្ខជនទាំងអស់មានរយៈពេល៣នាទី និយាយពីប្រធានបទទាក់និងមូលហេតុ និងកត្តាដែលជំរុញឲ្យពួកគេរៀនភាសាខ្មែរ និយាយពីសំនួនពាក្យនៅក្នុងភាសាខ្មែរ និងនិយាយពីអនុស្សាវរីយ៍ដែលពួកគេចងចាំបំផុតនៅកម្ពុជា។
លោករដ្ឋមន្ត្រីក្រសួងអប់រំយុវជននិងកីឡា ហង់ ជួនណារ៉ុន បានបង្ហាញថា កម្មវិធីនេះត្រូវបានរៀបចំឡើងដើម្បីលើកទឹកចិត្តដល់ជនបរទេសដែលកំពុងតែធ្វើការ និងរស់នៅក្នុងប្រទេសកម្ពុជាឲ្យចេះនិយាយភាសាខ្មែរ។ លោករដ្ឋមន្ត្រីបានបន្តថា នៅពេលដែលជនបរទេសចាប់ផ្តើមរៀនភាសាខ្មែរហើយនោះ គឺមិនត្រឹមតែរៀននិយាយនិងសរសេរប៉ុណ្ណោះទេ ប៉ុន្តែពួកគេថែមទាំងយល់ដឹងពីវប្បធម៌ខ្មែរ ធ្វើការសិក្សាស្រាវជ្រាវ ហើយចាប់ផ្តើមយល់និងស្រលាញ់ការរស់នៅក្នុងប្រទេសខ្មែរកាន់តែខ្លាំងជាងមុន។
សូមបញ្ជាក់ថាជនបរទេសទាំង២២រូបដែលចូលរួមប្រកួតនៅក្នុងកម្មវិធីនេះ បានរស់នៅនិងធ្វើការនៅក្នុងប្រទេសកម្ពុជាអស់រយៈពេលជាច្រើនឆ្នាំមកហើយដែរ ដែលអ្នកខ្លះរហូតដល់ទៅជាង២០ឆ្នាំ ជាង ១០ឆ្នាំ ប៉ុន្តែក៏មានអ្នកខ្លះទើបតែមកសិក្សានិងរស់នៅក្រោម១ឆ្នាំផងដែរ។ ហើយក្នុងនោះក៏មានអ្នករស់នៅបាន១ឆ្នាំ រហូតដល់ទៅ៥ឆ្នាំផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ