អន្តោប្រវេសន៍៖ បារាំងចង់ព្យួរការអនុវត្តអនុសញ្ញាស្តីពីការលុបព្រំដែនក្នុងសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៤:៣៦
រដ្ឋាភិបាលបារាំងកំពុងតែពិចារណាអំពីការព្យួរជាបណ្តោះអាសន្ន នូវការអនុវត្តអនុសញ្ញា Schengen ដែលចែងអំពីសេរីភាពនៃការធ្វើដំណើរ ក្នុងប្រទេសជាសមាជិក។ វិធានការនេះធ្វើឡើង ដើម្បីទប់ស្កាត់ចលនាអន្តោប្រវេសន៍ខុសច្បាប់ ដែលកំពុងហូរចូលពីប្រទេសទុយនីស៊ី ឆ្លងកាត់តាមប្រទេសអ៊ីតាលី។
អនុសញ្ញា Schengen គឺជាសសរទ្រូងដ៏សំខាន់មួយ របស់សហភាពអឺរ៉ុប។ យោងតាមអនុសញ្ញានេះ ព្រំដែនរវាងប្រទេសជាសមាជិកត្រូវលុបចោលទាំងស្រុង ដើម្បីបើកឲ្យទំនិញ និងប្រជាជនអាចធ្វើចរាចរណ៍បានដោយសេរី។
បដិវត្តន៍នៅទុយនីស៊ី និងនៅលីប៊ីបានធ្វើឲ្យចលនាជនអន្តោប្រវេសន៍ខុសច្បាប់ចូលមកអឺរ៉ុបបានកើនឡើងកាន់តែខ្លាំង។ ច្រកចូលធំជាងគេ គឺប្រទេសអ៊ីតាលី ដែលជាសមាជិកអនុសញ្ញា Schengen ។ ថ្មីៗនេះ មានជនអន្តោប្រវេសន៍ជាង ២ម៉ឺននាក់បានលួចចូលដោយខុសច្បាប់ មកក្នុងដែនដីរបស់អ៊ីតាលី។ ដោយមិនចង់រ៉ាប់រងបញ្ហានេះតែម្នាក់ឯង រដ្ឋាភិបាលអ៊ីតាលីបានសម្រេចផ្តល់ឯកសារស្នាក់នៅ និងឯកសារធ្វើដំណើរដល់ជនអន្តោប្រវេសន៍ដោយខុសច្បាប់ទាំងនេះ ដើម្បីឲ្យពួកគេអាចធ្វើដំណើរក្នុងដែនដី Schengen បាន។ វិធានការនេះបានធ្វើឲ្យប្រទេសជាដៃគូ ជាពិសេស បារាំងផ្ទុះកំហឹងយ៉ាងខ្លាំង រហូតដល់បានសម្រេចបិទចរាចរណ៍ផ្លូវដែកជាមួយអ៊ីតាលីជាបណ្តោះអាសន្ន កាលពីថ្ងៃអាទិត្យមុន។
នៅក្នុងកិច្ចប្រជុំក្រៅផ្លូវការមួយ កាលពីថ្ងៃសុក្រ ម្សិលមិញនេះ មន្រ្តីរដ្ឋាភិបាលបារាំងបានលើកឡើងថា នៅពេលនេះ យន្តការ Schengen កំពុងតែបង្កជាបញ្ហា ដែលតម្រូវឲ្យបារាំងត្រូវពិចារណាអំពីលទ្ធភាពព្យួរការអនុវត្តអនុសញ្ញានេះបណ្តោះអាសន្ន។
ក៏ប៉ុន្តែ នៅក្នុងអនុសញ្ញា Schengen ការព្យួរអនុសញ្ញានេះអាចធ្វើទៅបានតែក្នុងករណីមួយប៉ុណ្ណោះ គឺករណីមានការគំរាមកំហែងធ្ងន់ធ្ងរដល់សណ្តាប់ធ្នាប់សាធារណៈ និងសន្តិសុខជាតិ។ បញ្ហាអន្តោប្រវេសន៍ខុសច្បាប់ ដែលបារាំងកំពុងជួបប្រទះនៅពេលនេះ ទំនងជាពិបាកនឹងចាត់បញ្ចូលក្នុងករណីខាងលើនេះណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ