ដំណើរទស្សនកិច្ចលើកទី១ របស់លោកប្រធានាធិបតីអេហ្ស៊ីបក្នុងប្រទេសបារំាង
ចុះផ្សាយនៅថ្ងៃ៖
ស្តាប់ - ០៥:៣១
លោកប្រធានាធិបតីនៃប្រទេសអេហ្ស៊ីបអាប់ដែល ហ្វាតា អាល់ស៊ីស៊ីផ្តើមទស្សនកិច្ចនៅក្នុងប្រទេសបារំាងរយៈពេល ២ថ្ងៃដោយចាប់ផ្តើមនៅថ្ងៃពុធ ទី២៦ វិច្ឆិកានេះ។ នៅក្នុងទីក្រុងប៉ារីស ប្រទេសបារំាង លោកអាល់ស៊ីស៊ីចូលជួបលោកប្រធានាធិបតីបារំាងហ្រ្វង់ស័រ ហូឡង់ ព្រមទំាងថ្នាក់ដឹកនំាបារំាងផ្សេងទៀត ក្នុងនោះក៏មានលោកប្រមុខការទូតឡូរ៉ង់ ហ្វាប៊្យុសផងដែរ។គួរជម្រាបជូនថា លោកអាល់ស៊ីស៊ីបានចូលកាន់តំណែងប្រធានាធិបតីអេហ្ស៊ីបតំាងពីខែកក្កដា ឆ្នំា ២០១៣ តាមរយៈការធ្វើរដ្ឋប្រហារយោធាទម្លាក់លោកម័រស៊ី មុននឹងបានជាប់ឆ្នោតជាផ្លូវការកាលពីខែឧសភាកន្លងទៅថ្មីៗនេះ។
មុននឹងមកដល់ប្រទេសបារំាងថ្ងៃនេះ លោកអាល់ស៊ីស៊ីបានបំពេញទស្សនកិច្ចរយៈពេល ២ថ្ងៃនៅក្នុងប្រទេសអ៊ីតាលី។ ដំណើរមកកាន់ប្រទេសអឺរ៉ុបមួយចំនួនជាលើកទី១ របស់លោកប្រធានាធីបតីអេហ្ស៊ីបនេះបានធ្វើឡើង បន្ទាប់ពីលោកទើបបានជាប់ឆ្នោតប្រធានាធិបតីអេហ្ស៊ីបជាផ្លូវការកាលពីខែឧសភាកន្លងមក។ តែគេមិនត្រូវភ្លេចនិយាយទេថា គឺរូបលោកអាល់ស៊ីស៊ីនេះឯងដែលបានធ្វើរដ្ឋប្រហារយោធាទម្លាក់លោកប្រធានាធិបតីស្របច្បាប់ម័រស៊ីកាលពីខែកក្កដា ឆ្នំា ២០១៣។ គឺរូបលោកអាល់ស៊ីស៊ីនេះឯងដែលបានចាត់វិធានការវាយបង្រ្កាបលើសកម្មជនរបស់លោកម័រស៊ី និងក្រុមភាតរៈអ៊ីស្លាមដោយបណ្តាលឲ្យមានមនុស្សស្លាប់ជាង ១ ៤០០នាក់ និងចាប់ដាក់គុកប្រមាណជា ១៥ ០០០នាក់។ គឺជាទង្វើរំលោភសិទ្ធិមនុស្សយ៉ាងចាស់ដៃមួយដែលលោកអាល់ស៊ីស៊ីបានទទួលការរិះគន់យ៉ាងចាស់ដៃពីសហគមន៍អន្តរជាតិនាពេលនោះ។
ដូច្នេះគេអាចនិយាយបានថា ដំណើរទៅកាន់បរទេសរបស់លោកអាល់ស៊ីស៊ីពេលនេះ អាចជាការស្វែងរកភាពស្របច្បាប់របស់លោកនៅលើឆាកអន្តរជាតិ ពិសេសតំាងពីលោកបានជាប់ឆ្នោតប្រធានាធិបតីផ្លូវការដោយទទួលបានសម្លេងគំាទ្រយ៉ាងច្រើនសម្បើមពីប្រជាជនកាលពីខែឧសភាកន្លងទៅ។ អ៊ីចឹងហើយបានជានៅពេលនេះ ប្រទេសលោកខាងលិចមួយចំនួនបានព្យាយាមបំភ្លេចរឿងអតីតកាលរបស់លោកអាល់ស៊ីស៊ី ដោយយល់ព្រមបោះដៃរួមសហការជាមួយលោកអាល់ស៊ីស៊ីវិញម្តង។
ប្រយោជន៍ដែលប្រទេសលោកខាងលិចចំាបាច់ត្រូវតែរួមសហការជាមួយប្រទេសអេហ្ស៊ីប
ក្រៅពីសំដៅពង្រឹងទំនាក់ទំនងរវាងប្រទេស និងប្រទេសនៅលើវិស័យមួយចំនួន ពិសេសវិស័យសេដ្ឋកិច្ច បារំាង ក៏ដូចជាអ៊ីតាលីបានចាត់ទុកអេហ្ស៊ីប ជាប្រទេសដៃគូយុទ្ធសាស្រ្តមួយមិនអាចខ្វះបានសម្រាប់សន្តិសុខនៅក្នុងតំបន់ ពិសេសនៅក្នុងតំបន់មជ្ឈិមបូព៌ា។ ចូរកុំភ្លេចថា បន្ទាប់ពីបានជាប់ឆ្នោតប្រធានាធិបតីផ្លូវការកាលពីខែឧសភាមក លោកអាល់ស៊ីស៊ីបាននំាប្រទេសអេហ្ស៊ីបមកកាន់ឆាកអន្តរជាតិជាថ្មី ដោយផ្តើមដើរតួនាទីជាអាជ្ញាកណ្តាលដូចដែលអេហ្ស៊ីបធ្លាប់បានធ្វើកន្លងមកនៅក្នុងសំណុំរឿងតំបន់មួយចំនួន ពិសេសជម្លោះរវាងអ៊ីស្រាអែល និងប៉ាឡេស្ទីន។ ថ្មីៗនេះ ទីក្រុងគែរបានធ្វើជាអន្តរការីនៅក្នុងជម្លោះរវាងអ៊ីស្រាអែល និងប៉ាឡេស្ទីនកាលក្នុងសង្រ្គាមតំបន់ហ្គាហ្សា។ គឺប្រទេសអេហ្ស៊ីបនេះហើយដែលបានចូលរួមយ៉ាងសកម្មជួយដោះស្រាយវិបត្តិនយោបាយនៅក្នុងប្រទេសលីប៊ី។ សំណុំរឿងលីប៊ីដែលទីក្រុងប៉ារីស និងគែរកំពុងសម្តែងក្តីបារម្ភដូចគ្នា គឺខ្លាចតែប្រទេសអារ៉ាប់មួយនេះធ្លាក់ទៅក្នុងកណ្តាប់ដៃពួកជីហាត។
ក្រៅពីប្រទេសលីប៊ី អេហ្ស៊ីប និងបារំាងក៏ត្រូវបញ្ជាក់ពីជំហររបស់ខ្លួនទាក់ទងនឹងវិបត្តិក្នុងប្រទេសស៊ីរី។ មកដល់ពេលនេះ ទីក្រុងគែរបានគំាទ្រដំណោះស្រាយស្នើឡើងដោយប្រទេសរុស្ស៊ីដែលគេមិនត្រូវទាត់លោកប្រធានាធិបតីស៊ីរីអាសាដចេញពីឆាកនយោបាយ។ តែនេះ មិនមែនជាការចង់បានរបស់ទីក្រុងប៉ារីសទេ។ បន្ទាប់មក និងអ្វីដែលសហគមន៍អន្តរជាតិត្រូវការអេហ្ស៊ីប ក៏ដូចជាអេហ្ស៊ីបត្រូវការសហគមន៍អន្តរជាតិនោះ គឺយុទ្ធនាការប្រយុទ្ធប្រឆំាងនឹងអង្គការរដ្ឋអ៊ីស្លាមដែលទីក្រុងគែរប្រកាសឲ្យដឹងពីការត្រៀមខ្លួនចូលរួមជាបស្ចិមលោក។
កម្មវត្ថុរបស់បារំាង គឺសំដៅពង្រឹងកិច្ចសហប្រតិបត្តិការយោធាជាមួយអេហ្ស៊ីប
សេដ្ឋកិច្ច គឺជាប្រធានបទសំខាន់មួយដែលបារំាងមិនអាចមើលរំលងបានទេ នោះបើទោះបីជារឿងសិទ្ធិមនុស្សនៅអេហ្ស៊ីបបានធ្វើឲ្យបារំាងទើសទាល់ចិត្តខ្លំាងក៏ដោយ។ ទីផ្សារដែលទីក្រុងប៉ារីសកំពុងសម្លឹងមិនដាក់ភ្នែកនោះ គឺទីផ្សារអាវុធដែលទីក្រុងគែរកំពុងធ្វើឲ្យទំនើបនៅក្នុងវិស័យយោធារបស់ខ្លួន ព្រោះថា ដើម្បីអាចប្រឈមទប់នឹងក្រុមភេរវនិយមផ្ទៃក្នុង ក៏ដូចអង្គការរដ្ឋអ៊ីស្លាមបាន អេហ្ស៊ីបចំាបាច់ត្រូវពង្រឹងបន្ថែម ឬត្រូវបំពាក់អាវុធទាន់សម័យឲ្យកម្លំាងទ័ពរបស់ខ្លួន។ តំាងពីអាមេរិកបានកាត់បន្ថយជំនួយយោធាមួយភាគទៅឲ្យអេហ្ស៊ីបដោយសារតែបញ្ហាសិទ្ធិមនុស្សមក ទីក្រុងគែរបានងាកទៅរកជំនួយពីអ្នកផ្សេង ដូចយ៉ាងពីប្រទេសអារ៉ាប៊ីសាអូឌីតជាដើម។
គឺការពង្រឹងទំនាក់ទំនងយោធាជាមួយអេហ្ស៊ីបនេះហើយដែលបារំាងសង្ឃឹមទទួលបានកិច្ចសន្យាមួយចំនួននៅក្នុងដំណើរទស្សនកិច្ចរបស់លោកអាល់ស៊ីស៊ីពេលនេះ។ តែបញ្ហានៅត្រង់ថា បារំាងត្រូវការប្រកួតប្រជែងជាមួយប្រទេសផ្សេងទៀត មានរុស្ស៊ី ឬមួយក៏ចិនជាដើម។ នៅដើមឆ្នំា ២០១៤ នេះ ទីក្រុងប៉ារីសទទួលបានកុងត្រាលក់នាវាចម្បំាង៤គ្រឿងទៅឲ្យកម្លំាងជើងទឹកអេហ្ស៊ីប និងដែលសង្ឃឹមទទួលបានការកុម្មង់ទិញចំនួន ២គ្រឿងបន្ថែមទៀត។ ការចរចាក៏អាចផ្តោតលើការធ្វើឲ្យទំនើបនូវប្រព័ន្ធការពារផ្លូវអាកាស ដូចយ៉ាងការលក់យន្តហោះចម្បំាង Rafale ចំនួន ២៤គ្រឿងទៅឲ្យទ័ពអាកាសអេហ្ស៊ីប។
ក្រៅពីទីផ្សារអាវុធ បារំាងក្នុងនាមជាអ្នកវិនិយោគលំដាប់ទី៥ នៅក្នុងប្រទេសអេហ្ស៊ីបក៏កំពុងសម្លឹងឃើញទីផ្សារមួយចំនួនទៀតនៅក្នុងប្រទេសដែលមានប្រជាជនរស់នៅ ៨០លាននាក់ ពិសេសការសាងសង់រចនាសម្ព័ន្ធនានា មានដូចជាវិស័យដឹកជញ្ជូនសាធារណៈជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ