លោក នីកូឡា សាកូហ្ស៊ី លើវិថីឆ្ពោះទៅរកតំណែងប្រធានាធិបតីបារាំងជាថ្មីម្តងទៀត ?!
ចុះផ្សាយនៅថ្ងៃ៖
ស្តាប់ - ០៦:០៣
លោក នីកូឡា សាកូហ្ស៊ី អតីតប្រធានាធិបតីបារាំង ដែលទើបកាលពីជាងពីរខែមុន បានប្រកាស វិលចូលធ្វើនយោបាយវិញ បានជាប់ឆ្នោតជាថ្មីនៅយប់មិញ ជាប្រធានគណបក្សស្តាំនិយម UMP ជាគណបក្សប្រឆាំង។ ជាមួយនឹងសំឡេងគាំទ្រ ៦៤,៥% លោកនីកូឡា សាកូហ្ស៊ី ដែលនរណាដឹងថាមានមហិច្ឆតាចង់ក្លាយជាប្រមុខដឹកនាំប្រទេស ជាថ្មី បានតាំងជំហរ ដាក់ខ្លួនក្នុងស្ថានភាពឃោសនា សម្រាប់បោះឆ្នោតប្រធានាធិបតីបារាំង ២០១៧ រួចជាស្រេចទៅហើយ។
បន្ទាប់ពីបានធ្វើយុទ្ធនាការឃោសនា យ៉ាងសស្រាក់សស្រាំ លោក នីកូឡា សាកូហ្ស៊ី បានទទួលសំឡេងគាំទ្រត្រឹមតែ ៦៤,៥%ប៉ុណ្ណោះ។ គឺខុសគ្នាឆ្ងាយណាស់ បើប្រៀបទៅនឹងកាលពី១០ឆ្នាំមុន។ នៅឆ្នាំ២០០៤ លោកនីកូឡា សាកូហ្ស៊ីធ្លាប់ជាប់ឆ្នោតធ្វើជាប្រធានបក្សUMP ក្នុងសំឡេង ៨៥%។ ហេតុដូច្នេះហើយបានជាសកម្មជនរបស់លោក មិនអាចស្រែកជ័យឃោស មិនបង្ហាញអំណរខ្លាំងក្លាតាមសន្ទុះចិត្តបាន និងបានប្រឹងសម្រួលអារម្មណ៍ ដោយលើកថាអត្រានៃអ្នកចូលបោះឆ្នោតមានកំរិតខ្ពស់ជាង១០ឆ្នាំមុន។
ម្យ៉ាងវិញទៀត គូប្រជែងដ៏ចម្បង ដែលធ្លាប់ជារដ្ឋមន្ត្រីក្រោមបង្គាប់លោកសាកូហ្ស៊ី បានទទួលសំឡេងគាំទ្រដល់ ២៩%។ ជាមួយអត្រាខ្ពស់នេះ លោក សាកូហ្ស៊ី គ្មានជម្រើសអ្វីក្រៅពីត្រូវដឹកនាំស្ថាបនាបក្ស ដែលប្រេះឆាខ្លាំង តាំងបរាជ័យឆ្នាំ២០១២មក ដោយត្រូវបង្ខំចិត្តសហការ និងរំពឹងលើលោក Bruno Le Maireទេ ប្រសិនបើចង់ឱ្យរូបបក្សលេចធ្លោនិងរួបរួមគ្នាឡើងវិញ។
ភាពស្រពិចស្រពិលនៃការបោះឆ្នោតរើសបេក្ខជនប្រធានាធិបតី
លោកនីកូឡាសាកូហ្ស៊ីអាចប្រើប្រាស់តំណែងជាប្រធានបក្ស សម្រាប់ជាប្រយោជន៍ក្នុងការតាំងខ្លួនជាបេក្ខជនប្រធានាធិបតី។
តាមធម្មតា មុននឹងអាចក្លាយជាបេក្ខជនប្រធានាធិបតី គណបក្សនឹងរៀបចំការបោះឆ្នោតបឋមមួយទៀត នៅឆ្នាំ ២០១៦ ដើម្បីជ្រើសរើសបេក្ខជនតំណាងបក្ស សម្រាប់ការបោះឆ្នោតប្រធានាធិបតីឆ្នាំ២០១៧។ ឥស្សរជននយោបាយបក្សស្តាំនិយមUMP ពីរនាក់រួចមកហើយដែលបានប្រកាសឈរឈ្មោះឱ្យសកម្មជនបក្សធ្វើការជ្រើសរើស នោះគឺលោក ហ្វ្រង់ស័រហ្វីយ៉ុង អតីតនាយករដ្ឋមន្ត្រីសម័យលោកនីកូឡា សាកូហ្ស៊ី ជាប្រធានាធិបតី និងលោក អាឡាំង ហ្សូប៉េ ជាអតីតនាយករដ្ឋមន្ត្រីបារាំង (ពីឆ្នាំ១៩៩៥-៩៧)។ របៀបរវាៈនៃការបោះឆ្នោតផ្ទៃក្នុងបក្សនេះ មានចែងសព្វគ្រប់ក្នុងលក្ខន្តិកៈបក្ស ប៉ុន្តែគ្រប់គ្នា គ្រប់ភាគីជាអ្នកប្រជែងនឹងលោកនីកូឡា សាកូហ្ស៊ី មានមន្ទិល និងសង្ស័យខ្លាចក្រែងតែលោក សាកូហ្ស៊ី នៅពេលបានក្តោបអំណាចបក្សក្នុងដៃហើយ ប្រើវិធីកលយ៉ាងណាកាយកប់លក្ខន្តិកៈច្បាប់ជ្រើសរើសបេក្ខជនបក្សនេះ ដោយបង្វៀងធ្វើយ៉ាងណាឱ្យប្រធានបក្សក្លាយជាបេក្ខជនប្រធានាធិបតីផ្លូវការតែម្តង។
នៅក្នុងបទសម្ភាសន៍ជាមួយកាសែតឡឺហ្វីហ្ការ៉ូ កាលពីថ្ងៃទី ២៦ វិច្ឆិកា លោកនីកូឡា សាកូហ្ស៊ី បានព្រលយពាក្យថា នឹងធ្វើឱ្យមានតម្លាភាព នូវអ្វី ដែលហៅការបោះឆ្នោតជ្រើសរើសបេក្ខជនប្រធានាធិបតីសម្រាប់បក្ស នៅឆ្នាំ២០១៦ បេក្ខភាពនឹងបើកចំហ ប៉ុន្តែមិនមែននរណា (អ្នកស្តាំនិយម ឬកណ្តាលនិយម) ក៏អាចចុះឈ្មោះបានឡើយ ! តើនេះមានន័យថាដូចម្តេច ?!
ធ្លាប់ជាអ្នកចាញ់នៅឆ្នាំ២០១២ នៅចំពោះមុខលោកហ្វ្រង់ស័រហូឡង់ នៃបក្សឆ្វេងនិយម ការវិលត្រលប់របស់លោកសាកូហ្ស៊ី ដែលបានស្រែកក្តែងៗខ្លួនឯងថា ប្តូរឥរិយាបថ បានទទួលមេរៀនពីបរាជ័យនៃការបោះឆ្នោតប្រធានាធិបតីកន្លងទៅ អាយុកាន់តែច្រើនកាន់តែចេះដឹងខុសត្រូវ តែតាមរយៈការឃោសនាជាងពីរខែកន្លងមកនេះ លោកនីកូឡា សាកូហ្ស៊ី មិនបានប្តូរផ្លាស់អ្វីទេ លោកនៅតែដដែល ក្អេងក្អាង វាយប្រហារមិនអាសូរ មិនរើសមុខមិនថាជាគូប្រជែងផ្ទាល់ ឬប្រយោលឡើយ។ ជាការវិលត្រលប់ បង្កប់ដោយការសឹក និងទំនងដើម្បីសម្រេចបំណងតែមួយគឺវិលទៅកាន់វិមាន អេលីហ្សេ បើទោះបីជារហូតមកទល់ពេលនេះ លោកមិនទាន់បានបញ្ចេញពាក្យអ្វីមួយម៉ាត់ ចេញពីមាត់លោកទាក់ទងបេក្ខភាពប្រធានាធិបតីក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ