ទីក្រុងបាងកកកំពុងបន្តក្លាយជាសមរភូមិប្រយុទ្ធរវាងពួកអាវក្រហម និងទ័ពរដ្ឋាភិបាល
ចុះផ្សាយនៅថ្ងៃ៖
ស្តាប់ - ០៥:២៩
រហូតមកដល់ព្រឹកថ្ងៃសៅរ៍ ទី ១៥ ឧសភានេះទៀត ទីក្រុងបាងកកកំពុងបន្តក្លាយជាឆាកប្រយុទ្ធគ្នាយ៉ាងហិង្សារវាង ក្រុមបាតុករអាវក្រហម និងទ័ពរដ្ឋាភិបាល។ គិតតំាងពីថ្ងៃផ្ទុះអំពើហិង្សាកាលពីថ្ងៃព្រហស្បតិ៍ ទី១៣ ឧសភាមក អំពើហឹង្សាបានផ្តាច់ជីវិតមនុស្សជិត ២០នាក់ និងរបួសយ៉ាងតិច ១៤១នាក់ផ្សេងទៀត។
ក្រោយពីមានភាពស្ងប់ស្ងាត់មួយរយៈពេលខ្លីមក ស្នូរកំាភ្លើងបានផ្ទុះឡើងជាថ្មីយ៉ាងខ្ទរខ្ទារនៅក្នុងទីក្រុងបាងកកនាព្រឹកថ្ងៃសៅរ៍ ទី១៥ ឧសភា។ តែគ្រាប់កំាភ្លើង មានទំាងគ្រាប់ជ័រ លាយឡំនឹងគ្រាប់មែនទែន មិនបានធ្វើឲ្យពួកបាតុករអាវក្រហមបាក់ស្មារតីឡើយ។ ពួកគេនៅតែបន្តក្រាញននៀលនៅក្នុងជំរំមួយស្ថិតក្នុងសង្កាត់ពាណិជ្ជកម្ម Rachaprasong ដែលពួកគេបានហ៊ុមព័ទ្ធដោយរបងឫស្សី និងកង់ឡានអស់ជាច្រើនសប្តាហ៍កន្លងមក។ នៅពេលនេះ ទាហានកំពុងឡោមព័ទ្ធជំរំនោះ ដោយបានបិទច្រកចេញ ចូល។ តែគេនៅទាន់ដឹងទេ ថាតើនៅពេលណាទៅ ដែលទ័ពនឹងផ្តើមប្រតិបត្តិការវាយបំបែកជំរំនោះ។
លោក Nim Somprasong ជាបាតុករអាវក្រហមម្នាក់បានបញ្ជាក់ថា ទាហានបានបាញ់តម្រង់លើហ្វូងបាតុករដោយមិនបានគោរពពាក្យសន្យារបស់ខ្លួនទេ។ លោក Nim Somprasong បាននិយាយយ៉ាងដូច្នេះ៖ « ខ្ញុំគិតថា រដ្ឋាភិបាលបានប្រើប្រាស់អំពើហិង្សាជ្រុលហួស ដោយគ្មានបង្ហាញភស្តុតាងច្បាស់លាស់។ ទាហានបានធ្វើការបាញ់រះ ដោយមិនបានពិចារណាអ្វីទំាងអស់ ពិសេស ពួកគេមិនបានចោទសួខ្លួនឯងទេថា ពួកយើងក៏ជាជនជាតិថៃដូចពួកគេដែរ។ ពួកគេបានចោទពួកយើងថា ជាពួកភេរវជន។ ខ្ញុំគិតថា ការចោទរបៀបនេះ គ្រាន់តែជាលេសមួយដើម្បីធ្វើការវាយបង្រ្កាបតែប៉ុណ្ណោះ។ យើងមានតែដំបង ដើម្បីការពារខ្លួន។ ចំណែកឯពួកទាហានវិញ គេបានប្រើប្រាស់សុទ្ធតែអាវុធទំនើបៗ មានទំាងអាវុធស័្វយប្រវត្តិ M១៦ ទៀតផង »។
ជាមួយនឹងការបាញ់រះយ៉ាងកម្រោលនេះបានជម្រុញឲ្យក្រុមបាតុករមិនអាចទប់កំហឹងរបស់ខ្លួនបាន។ការជេរប្រមាជលាយឡំនឹងការគប់ដបសំាងនិងដុំថ្មក៏បានកើតមានឡើងទៅលើហ្វូងទាហានដែលស្ថិតនៅចំងាយប្រមាណ២០០ម៉ែត្រពីពួកបាតុករ។បាតុករម្នាក់ទៀតដែលមិនបញ្ចេញឈ្មោះក៏មិនអាចទប់កំហឹងរបស់ខ្លួនបានទេ។បាតុកររូបនោះបាននិយាយយ៉ាងដូច្នេះថា « ពួកទាហានដែលនៅទីនេះគឺដើម្បីសម្លាប់រង្គាលពួកយើងនិងសម្លាប់ហ្វូងមនុស្សនៅទីនេះ។យើងនឹងបន្តតស៊ូទប់ទល់ជាមួយពួកគេ រហូតដល់នាទីចុងក្រោយ។ពួកយើងជាអ្នកស្រឡាញ់លទ្ធិប្រជាធិបតេយ្យតែពួកគេបានបាញ់រះមកលើពួកយើងដោយគ្រាប់កាំភ្លើងមែនទែន។ នៅទីនេះពួកយើងគ្មានអាវុធទេ »។ សំណួរដែលកំពុងចោទឡើងនោះគឺថា តើព្រឹត្តិការណ៍ដែលកំពុងកើតមានឡើងនៅក្នុងប្រទេសថៃពេលនេះគឺជាសង្រ្គាមស៊ីវិលឬ យ៉ាងណា ?
សម្រាប់លោក Shawn Bung-prakorn ដែលជាអ្នកនំាពាក្យម្នាក់របស់ចលនាពួកអាវក្រហមបានអះអាងដោយសុទិដ្ឋិនិយមថា៖ « យើងកំពុងប្រឈមមុខនឹងកំលំាងទាហានដែលពួកគេគ្មានបទពិសោធន៍ក្នុងការទប់ទល់នឹងជនស៊ីវិលទេ។ អំពើហិង្សាដែលបានបណ្តាលឲ្យស្លាប់មនុស្ស និងរបួសនាពេលនេះ បានបញ្ជាក់យ៉ាងច្បាស់ថា វិបត្តិនយោបាយកំពុងនំាប្រទេសថៃឲ្យធ្លាក់ក្នុងសង្រ្គាមស៊ីវិល។ ពួកអាវក្រហមមិនចុះញ៉មទេ ពួកគេបន្តនំាគ្នាធ្វើដំណើរមកពីខេត្តឆ្ងាយៗ មកកាន់ទីក្រុងបាងកក។ យើងបានធ្វើសំណើចំនួនពីរទៅកាន់រដ្ឋាភិបាល ទីមួយ៖ បញ្ឈប់អំពើហិង្សា ដើម្បីចៀសវាងការស្លាប់មនុស្សជាថ្មី និងទីពីរ៖ ឲ្យដកកំលំាងទាហានចេញពីទីក្រុង។ តែរដ្ឋាភិបាលបានចាត់ទុកសំណើខាងលើថា ជារឿងអាម៉ាសមុខមួយទៅវិញ។ អីចឹងមានន័យថា អំពើហិង្សានឹងត្រូវផ្ទុះជាថ្មី នៅរាត្រីនេះ ដោយចៀសមិនរួច »។
គ្រាន់តែជាង២៤ម៉ោងប៉ុណ្ណោះ វិបត្តិនយោបាយនៅក្នុងប្រទេសថៃបានធ្លាក់ទៅក្នុងស្ថានភាពមួយដ៏ធ្ងន់ធ្ងរ និងដែលគ្មានភាគីណាមួយត្រៀមខ្លួននឹងសម្របសម្រួលដោយសន្តិវិធី។ នៅមានតួអង្គសំខាន់ពីររូបផ្សេងទៀតគឺ ព្រះមហាក្សត្រ ព្រះចៅភូមិបុលអាឌូយ៉ាដេត និងលោកអតីតនាយករដ្ឋមន្រ្តីថៃថាក់ស៊ីន។ ព្រះចៅភូមិបុលអាឌូយ៉ាដេតដែលកំពុងគង់ព្យាបាលក្នុងមន្ទីរពេទ្យ នៅមិនទាន់មានព្រះរាជបន្ទូលអ្វីទំាងអស់។ ចំណែកតួអង្គថាក់ស៊ីនវិញបានត្រឹមតែអំពាវនាវឲ្យមានការចរចាជាថ្មីឡើងវិញ។ ក៏ប៉ុន្តែសំណួរដែលចោទនោះគឺថា តើស្ថានការណ៍បានធ្លាក់ដល់ម្លឹងហើយ លោកថាក់ស៊ីននៅតែមានឥទ្ធិពល និងទឹកមាត់ប្រៃដើម្បីនិយាយជាមួយពួកអាវក្រហមទៀត ឬយ៉ាងណា ?
បើពិនិត្យជារួមទៅ ចលនារបស់ពួកអាវក្រហមពេលនេះហាក់បានប្រែក្លាយទៅជាចលនាសង្គមមួយ ដែលមិនមែនតែដើម្បីលោក ថាក់ស៊ីនតែម្នាក់គត់ទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ