ការបារម្ភនៃមូលនិធិរូបិយវត្ថុអន្តរជាតិFMIពាក់ព័ន្ធនឹងសង្គ្រាមរូបិយវត្ថុ
ចុះផ្សាយនៅថ្ងៃ៖
ស្តាប់ - ០៥:២៣
មូលនិធិរូបិយវត្ថុអន្តរជាតិFMIដែលបារម្ភពីស្ថានភាពសេដ្ឋកិច្ច អាមេរិកាំង បានទាមទារឲ្យរូបិយប័ណ្ណនៃប្រទេសកំពុងអភិវឌ្ឍន៍សំខាន់ៗដូចជា ប្រាក់យ័នចិននិងប្រាក់realប្រេស៊ីលធ្វើការដំឡើងថ្លៃរបស់ខ្លួនឲ្យ បានសមរម្យនៅចំពោះមុខប្រាក់ដុល្លារអាមេរិក។ ដូច្នេះ ដើម្បីចៀសឲ្យផុតពីវិបត្តិអស់ទាំងនេះ មូលនិធិរូបិយវត្ថុអន្តរជាតិFMIបានស្នើឲ្យមានជាបន្ទាន់នូវការ សម្របសម្រួលមួយក្នុងវិស័យនយោបាយសេដ្ឋកិច្ចនៅក្នុងក្រុមប្រទេសG20 ។
មូលនិធិរូបិយវត្ថុអន្តរជាតិFMIទាមទារឲ្យរូបិយប័ណ្ណនៃប្រទេសកំពុងអភិវឌ្ឍន៍សំខាន់ៗដូចជាប្រាក់យ័នចិននិងប្រាក់realប្រេស៊ីលធ្វើការដំឡើងថ្លៃរបស់ខ្លួន មកពីមូលនិធិរូបិយវត្ថុអន្តរជាតិFMIចង់ឲ្យការដោះដូរពាណិជ្ជកម្មរវាងប្រទេសកំពុងអភិវឌ្ឍន៍សំខាន់ៗនិងប្រទេសមហាអំណាចសេដ្ឋកិច្ចដូចជាសហរដ្ឋអាមេរិកនិងសហភាពអឺរ៉ុបដែលជាក្បាលម៉ាស៊ីនជួយអូសទាញសេដ្ឋកិច្ចពិភពលោកហើយដែលកំពុងតែជួបនឹងវិបត្តិអាចប្រព្រឹត្តទៅបានល្អប្រសើរ ពោលគឺមានតុល្យភាពនិងមានចីរភាព។
បើយោងតាមមូលនិធិរូបិយវត្ថុអន្តរជាតិFMI នៅឆ្នាំ២០១០កំណើនសេដ្ឋកិច្ចពិភពលោកអាចមានប្រមាណ៤,៨% ហើយនៅឆ្នាំ២០១១អាចមានប្រមាណ៤,២%។ ទាំងនេះ ក្នុងខណៈដែលសេដ្ឋកិច្ចនៃប្រទេសកំពុងអភិវឌ្ឍន៍ក្នុងលោកមានកំណើនជាមធ្យមប្រមាណ៧,១%នៅឆ្នាំ២០១០។ ទន្ទឹមគ្នានេះ សេដ្ឋកិច្ចនៃប្រទេសបស្ចិមលោកជឿនលឿនដូចជាសហរដ្ឋអាមេរិកនិងសហភាពអឺរ៉ុបកំពុងជួបនឹងវិបត្តិ។
ហេតុដូច្នេះហើយបានជាអ្នកទទួលខុសត្រូវខាងសេដ្ឋកិច្ចនៃមូលនិធិរូបិយវត្ថុអន្តរជាតិFMIដែលបានបង្ហាញឲ្យដឹងកាលពីម្សិលមិញពីស្ថានភាពសេដ្ឋកិច្ចពិភពលោក បានធ្វើការទាមទារឲ្យប្រទេសកំពុងអភិវឌ្ឍន៍ធ្វើការដំឡើងថ្លៃរូបិយប័ណ្ណរបស់ខ្លួន ដើម្បីធ្វើឲ្យការដោះដូរពាណិជ្ជកម្មពិភពលោកមានដំណើរការល្អប្រសើរ។
ប្រទេសកំពុងអភិវឌ្ឍន៍សំខាន់ៗជាច្រើនដូចជាប្រទេសចិននិងប្រទេសប្រេស៊ីលនៅតែបន្តបង្កើនកំណើនសល់ផលក្នុងការដោះដូរពាណិជ្ជកម្មរបស់ខ្លួនជាមួយប្រទេសបស្ចិមលោក ដែលអាចជាមូលហេតុនាំឲ្យកើតមានភាពតានតឹងនិងធ្វើឲ្យបាត់បង់តុល្យភាពក្នុងការដោះដូរពាណិជ្ជកម្មពិភពលោក។
ប្រទេសចិននៅឆ្នាំ២០១០នេះអាចមានកំណើនសេដ្ឋកិច្ចប្រមាណ១០,៥%ហើយនិងអាចមានការសល់ផលក្នុងការដោះដូរពាណិជ្ជកម្មជាមួយបរទេសស្មើនឹង៤,៧%នៃផលិតផលដុលក្នុងប្រទេស។ ហើយការសល់ផលក្នុងការដោះដូរពាណិជ្ជកម្មជាមួយបរទេសកើតមាននៅក្នុងសឹងគ្រប់ប្រទេសអាស៊ី។ លើកលែងតែសិង្ហបុរីមួយចេញដែលការសល់ផលក្នុងការដោះដូរពាណិជ្ជកម្មជាមួយបរទេសមានស្មើនឹង២០,៥%នៃផលិតផលដុលក្នុងប្រទេស ហើយអត្រានៃកំណើនសេដ្ឋកិច្ចមាន១៥%។
កត្តាអស់ទាំងនេះហើយដែលជំរុញឲ្យ មូលនិធិរូបិយវត្ថុអន្តរជាតិFMIធ្វើការទាមទារឲ្យមានតុល្យភាពក្នុងការដោះដូរពាណិជ្ជកម្មពិភពលោក។ គួរបញ្ជាក់ថា នៅប្រទេសជឿនលឿន កំណើនសេដ្ឋកិច្ចនៅឆ្នាំ២០១១អាចធ្លាក់មកនៅ២,២%ទល់នឹង២,៧%នៅឆ្នាំ២០១០។ ចំណែកឯសេដ្ឋកិច្ចនៃសហរដ្ឋអាមេរិកវិញ នៅឆ្នាំ២០១១ប្រហែលជាអាចជួបនឹងដំណើរដើរថយក្រោយទៀតផង។
សេដ្ឋកិច្ចនៃសហរដ្ឋអាមេរិកនិងសេដ្ឋកិច្ចនៃសហភាពអឺរ៉ុបធ្លាក់ស្រុតចុះយ៉ាងដូច្នេះ មកពីសេដ្ឋកិច្ចនៃប្រទេសទាំងនោះ៖
- មានកង្វះថាមពលក្នុងការទិញដូរហូបចុកផ្ទៃក្នុង។
- មានកង្វះក្នុងការបោះទុនធ្វើវិនិយោគសម្រាប់បង្កើនផលិតផល។
- អត្រានៃអ្នកឥតការងារធ្វើអាចកើនឡើងដល់ទៅ៩,៦%នៅសហរដ្ឋអាមេរិកនៅឆ្នាំក្រោយ។
- នៅតំបន់ប្រើប្រាក់អឺរ៉ូវិញ អត្រានៃអ្នកឥតការងារធ្វើអាចកើនឡើងដល់ទៅ១០%។
ដូច្នេះ ដើម្បីចៀសឲ្យផុតពីវិបត្តិអស់ទាំងនេះ មូលនិធិរូបិយវត្ថុអន្តរជាតិFMIបានស្នើឲ្យមានជាបន្ទាន់នូវការសម្របសម្រួលមួយក្នុងវិស័យនយោបាយសេដ្ឋកិច្ចនៅក្នុងក្រុមប្រទេសG20 ។ នយោបាយសេដ្ឋកិច្ចដែលផ្អែកលើអាទិភាពសំខាន់ៗបួន៖
ទី១- បន្តធ្វើការសម្របសម្រួល”នយោបាយរូបិយវត្ថុ”។
ទី២- ពង្រឹងប្រព័ន្ធធនាគារដែលបច្ចុប្បន្ននេះនៅមានកង្វះមូលធនសម្រាប់ផ្តល់ប្រាក់កម្ចីឲ្យសហគ្រាស ហើយនិងផ្តល់ទំនុកចិត្តដល់អតិថិជន។
ទី៣- សំអិតសំអាងហិរញ្ញវត្ថុសាធារណៈឲ្យមានតុល្យភាព។
ទី៤- ប្រទេសកំពុងអភិវឌ្ឍន៍សំខាន់ៗដែលមានការសល់ផលយ៉ាងច្រើនលើសលុបត្រូវតែរិះរកឲ្យមានតុល្យភាពដោយជំរុញឲ្យមានសន្ទុះកំណើនក្នុងការទិញដូរហូបចុកផ្ទៃក្នុង ហើយនិងត្រូវធ្វើការដំឡើងថ្លៃរូបិយប័ណ្ណរបស់ខ្លួន។ ទាំងនេះ សម្រាប់ផលប្រយោជន៍នៃសេដ្ឋកិច្ចពិភពលោកក៏ដូចជាសម្រាប់ផលប្រយោជន៍នៃប្រទេសកំពុងអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ