ធនាគារអភិវឌ្ឍន៍អាស៊ី៖ សេដ្ឋកិច្ចអាស៊ីកំពុងប្រឈមមុខនឹងវិបត្តិអតិផរណា
ចុះផ្សាយនៅថ្ងៃ៖
ស្តាប់ - ០៥:៥៨
នៅថ្ងៃព្រហស្បតិ៍ ទី២៨ កក្កដានេះ ធនាគារអភិវឌ្ឍន៍អាស៊ី ដែលហៅកាត់ជាភាសាអង់គ្លេសថា ADB ទើបបានចេញផ្សាយរបាយការណ៍មួយស្តីពីស្ថានភាពសេដ្ឋកិច្ចទូទៅនៅអាស៊ី។ នៅក្នុងរបាយការណ៍ដែលមានកម្រាស់ជាង ៦០ទំព័រ ADB បានព្រមានពីការផ្ទុះឡើងជាយថាហេតុនូវវិបត្តិអតិផរណា និងវិបត្តិប្រាក់បៀវត្សនៅក្នុងបណ្តាប្រទេសអាស៊ីមួយចំនួន។
តំាងពីក្រោយវិបត្តិសេដ្ឋិកិច្ចដែលបានផ្ទុះឡើងនៅក្នុងពិភពលោកក្នុងឆ្នំា ២០០៨ មក មានប្រទេសខ្លះក៏បានផ្តើមងើបផុតពីវិបត្តិ ចំណែកឯប្រទេសខ្លះទៀតក៏កំពុងបន្តត្រដាបត្រដួសដដែល។ ប៉ុន្តែអ្វីជាការកត់សម្គាល់ និងផ្ទុយពីប្រទេសអភិវឌ្ឍន៍គេសង្កេតឃើញថា ប្រទេសកំពុងអភិវឌ្ឍន៍នៅអាស៊ីហាក់ដូចបានងើបចេញពីវិបត្តិសេដ្ឋកិច្ចពិភពលោកបានលឿនជាងគេ និងថែមទំាងកំពុងតែដើរតួនាទីជាក្បាលម៉ាស៊ីនមួយដ៏សំខាន់សម្រាប់អូសទាញសេដ្ឋកិច្ចពិភពលោកទៀតផង។ របាយការណ៍របស់ធនាគារអភិវឌ្ឍន៍អាស៊ីដែលទើបចេញផ្សាយថ្ងៃនេះបានប្រមើលមើលថា បណ្តាប្រទេសអាស៊ីមួយចំនួនដែលកំពុងមានសេដ្ឋកិច្ចរីកលូតលាស់ ដូចយ៉ាងប្រទេសចិន កូរ៉េខាងត្បូង វៀតណាម ម៉ាឡេស៊ី ឥណ្ឌូនេស៊ី ថៃ ហ្វីលីពីន កម្ពុជា និងឡាវ អាចនឹងទទួលបានកំណើនសេដ្ឋកិច្ចជាមធ្យមចំនួន ៧,៩% សម្រាប់ឆ្នំា ២០១១ នេះ។ ប៉ុន្តែសម្រាប់ឆ្នំា ២០១២ខាងមុខ អត្រានេះនឹងអាចធ្លាក់មកនៅត្រឹម ៧,៧% វិញ។
ដូចយើងយ៉ាងបានដឹងស្រាប់ហើយថា កំណើនសេដ្ឋកិច្ចដែលបណ្តាប្រទេសអាស៊ីមួយចំនួនកំពុងបន្តមាន តិច ឬច្រើន រហូតមកដល់ពេលនេះ ដូចយ៉ាងប្រទេសចិនជាដើម គឺបានមកពីការនំាផលិតផលចេញទៅក្រៅប្រទេស។ អ៊ីចឹងហើយបានជា ADB បានបញ្ជាក់ថា វិបត្តិប្រាក់បំណុលដែលបណ្តាប្រទេសអឺរ៉ុបមួយចំនួនកំពុងពើបប្រទះក្តី កំណើនសេដ្ឋកិច្ចសន្សឹមៗនៅសហរដ្ឋអាមេរិកក្តី ឬមួយក៏ផលវិបាកដែលជប៉ុនកំពុងឆ្លងកាត់នៅក្រោយគ្រោះរញ្ជួយដីក្តី អាចនឹងធ្វើឲ្យប៉ះពាល់ដល់វិស័យនំាចេញរបស់ប្រទេសនៅអាស៊ី។ យ៉ាងណាក៏ដោយ ADB មិនបានចាត់ទុកបញ្ហានេះថា ជារឿងមួយដែលថ្នាក់ដឹកនំានៅអាស៊ីត្រូវបារម្ភទេ ព្រោះថា កំណើនសេដ្ឋកិច្ចក្នុងតំបន់អាស៊ីនៅតែមានលក្ខណៈមំាទំាជានិច្ច។
សន្ទុះសេដ្ឋកិច្ចនៅអាស៊ីកំពុងជម្រុញឲ្យមានវិបត្តិអតិផរណា
របាយការណ៍របស់ ADB បានទាញសញ្ញាអាសន្នថា នៅសឹងតែគ្រប់ប្រទេសទំាងអស់ក្នុងតំបន់អាស៊ី សុទ្ធតែបាននិងកំពុងជួបប្រទះនូវវិបត្តិអតិផរណាដូចគ្នា គ្រាន់តែប្រទេសខ្លះមានអត្រាអតិផរណាទាប ប្រទេសខ្លះទៀត មានអត្រាអតិផរណាខ្ពស់។ ជាទូទៅ អត្រាអតិផរណានៅក្នុងបណ្តាប្រទេសអាស៊ីទំាងអស់មានចន្លោះពី ៣ ទៅ ៦%។ វាលើកលែងតែប្រទេសវៀតណាមមួយ ដែលមានអត្រាអតិផរណារហូតដល់ទៅ ២០%។ មានមូលហតុច្រើនដែលជម្រុញឲ្យមានកំណើនអត្រាអតិផរណា ប៉ុន្តែមានមូលហេតុសំខាន់ចំនួនពីរដែលបានលើកឡើងដោយធនាគារអភិវឌ្ឍន៍អាស៊ី ទីមួយ៖ គឺមកពីមានកំណើនតម្រូវការផ្ទៃក្នុង និងទីពីរ៖ គឺការឡើងថ្លៃតម្លៃវត្ថុធាតុដើម។
សម្រាប់ ADB អត្រាអតិផរណាកើនហួសពីការគ្រោងទុក នឹងអាចជម្រុញឲ្យទំនិញឡើងថ្លៃកាន់តែខ្ពស់ និងមានការទាមទារដំឡើងប្រាក់បៀវត្ស ដែលនេះ នឹងបង្កឲ្យមានអស្ថិរភាពសេដ្ឋកិច្ច។ នេះ គឺជាហានិភ័យមួយដែលថ្នាក់ដឹកនំានយោបាយបានយល់ច្បាស់ណាស់ និងកំពុងស្វែងរកវិធានការទប់ទល់។ ដើម្បីអាចប្រឈមទប់នឹងហានិភ័យដែលផ្ទុះចេញពីអតិផរណា ធនាគារអភិវឌ្ឍន៍អាស៊ីបានជម្រុញឲ្យចាត់វិធានការ តាមរយៈការតម្លើងអត្រាការប្រាក់ និងការតម្លើងអត្រាប្តូររូបិយវត្ថុជាតិ ធៀបនឹងប្រាក់បរទេស ពិសេសគឺប្រាក់ដុល្លារអាមេរិក។
ការដំឡើងអត្រាការប្រាក់ខ្ពស់ នឹងនំាឲ្យប្រជាជនផ្តើមកាត់បន្ថយការចំណាយប្រចំាថ្ងៃ ដោយពួកគេនំាគ្នាយកលុយទៅសន្សំ ដើម្បីយកការប្រាក់ស៊ីវិញ។ ការដំឡើងអត្រាការប្រាក់ខ្ពស់ នឹងជម្រុញឲ្យអ្នកវិនិយោគកាត់បន្ថយការខ្ចីលុយពីធនាគារ យកទៅបង្កើនមុខរបររកស៊ី។ ដូច្នេះឃើញថា ការកាត់បន្ថយការចាយវាយប្រចាំថ្ងៃរបស់ប្រជាជន និងការកាត់បន្ថយការបោះទុនរកស៊ីរបស់ឈ្មួញ អាចនឹងកាត់បន្ថយសកម្មភាពសេដ្ឋកិច្ចកុំឲ្យបោះពួយទៅមុខជ្រុលពេក និងអាចចូលរួមជួយទប់ស្កាត់វិបត្តិអតិផរណា៕
សរុបមកវិញ ប្រទេសមួយដែលសុខភាពសេដ្ឋកិច្ចល្អ ពិតជាមានមោទនភាពហើយ ប៉ុន្តែរដ្ឋាភិបាលគួរតែប្រយត្ន័ប្រយែងធ្វើយ៉ាងណាកុំកំណើនសេដ្ឋកិច្ចរបស់ខ្លួនមានសន្ទុះជ្រុលពេក ព្រោះវាអាចនឹងជះផលវិបាកដល់ខ្លួនផង និងអាចឆ្លងរាលដាលនៅទូទំាងពិភពលោកផងដែរ។ ឧទាហរណ៍ ដូចករណីប្រទេសចិន ពិតណាស់ថា ជាមួយនឹងនយោបាយអត្រាការប្រាក់ទាប និងការរក្សាតម្លៃប្រាក់យ័នឲ្យនៅកម្រិតមួយទាប ធៀបនឹងប្រាក់ដុល្លារអាមេរិក ពិតជាបានអនុញ្ញាតឲ្យចិនបន្តមានកំណើនសេដ្ឋកិច្ចមកទល់ពេលបច្ចុប្បន្ន។ ប៉ុន្តែ បើរដ្ឋាភិបាលក្រុងប៉េកំាងមិនបានប្រុងប្រយ័ត្នទេ ខ្លួនឯង ជាអ្នកទទួលគ្រោះថ្នាក់។ នយោបាយប្រាក់យ័នទាបជ្រុល ធៀបនឹងប្រាក់ដុល្លារ អាចធ្វើឲ្យទីផ្សាររូបិយវត្ថុ និងពាណិជ្ជកម្មក្នុងស្រុកបាត់បង់តុល្យភាព។ នយោបាយអត្រាការប្រាក់ទាប អាចនឹងធ្វើឲ្យមានកំណើនប្រាក់កម្ចី និងផ្ទុះឡើងនូវវិបត្តិអចលនទ្រព្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ