ធនាគារអភិវឌ្ឍន៍អាស៊ី ADB ផ្តើមពិនិត្យគម្រោងផ្តល់ជំនួយលើវិស័យអប់រំនៅកម្ពុជា
ធនាគារអភិវឌ្ឍន៍អាស៊ី ADB នៅថ្ងៃទី៤មិថុនានេះ បានផ្តើមពិនិត្យមើល លើគម្រោងផ្តល់ជំនួយ ចំនួន ២របស់ខ្លួន ដែលកំពុងជួយលើកកម្ពស់វិស័យអប់រំ នៅកម្ពុជា។ នៅក្នុងដំណើរពិនិត្យមើលគម្រោងរបស់ខ្លួនរយៈពេល២ថ្ងៃនេះ ធនាគាអភិវឌ្ឍន៍អាស៊ី ADB បាននាំអ្នកកាសែតជាង២០នាក់ ដើម្បីចុះយកព័ត៌មាន និងធ្វើសេចក្តីរាយការណ៍ពីគម្រោងរបស់ខ្លួន ដែលមានទំហំទឹកប្រាក់ សរុបជាង៥០លានដុល្លារអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ផ្តើមចេញពីមជ្ឈមណ្ឌលសារគមនាគមន៍ ដែលស្ថិតនៅក្នុងបរិវេណវិទ្យាស្ថានជាតិអប់រំ អ្នកសារព័ត៌មានសរុបជាង២០នាក់ មកពីស្ថាប័ននានា បានពិនិត្យមើលគម្រោង ដែលផ្តល់ជំនួយដោយធនាគាអភិវឌ្ឍន៍អាស៊ី ADB មុនពេលពួកគេធ្វើដំណើរទៅកាន់ខេត្តស្វាយរៀង ដើម្បីបន្តពិនិត្យមើលមជ្ឈមណ្ឌលបណ្ដុះបណ្ដាលថ្នាក់តំបន់។ ជាគម្រោងចំនួនពីរ ដែលផ្តល់ដោយធនាគាអភិវឌ្ឍន៍អាស៊ី ADB។
ទី១ គឺជាគម្រោងលើកកម្ពស់គុណភាពអប់រំ (EEQP) ក្រោមជំនួយឥតសំណង ២៧,១ លានដុល្លារ និងគម្រោងជំនួយឥតសំណង ២៤,៥ លានដុល្លារផ្សេងទៀត សម្រាប់ពង្រីកការអប់រំបណ្ដុះបណ្ដាលបច្ចេកទេស និងវិជ្ជាជីវៈ (STTEV) ដែលជួយបង្កើតការងារ បង្កើនផលិតភាពកសិកម្ម និងបង្កើតបណ្ដាញអប់រំបណ្ដុះបណ្ដាលបច្ចេកទេស និងវិជ្ជាជីវៈ ដើម្បីជួយដល់ពលរដ្ឋក្រីក្រ ក្នុងការឆ្លើយតប ចំពោះតម្រូវការក្នុងទីផ្សារការងារ។
គម្រោងលើកកម្ពស់គុណភាពអប់រំ ដែលបានចាប់ផ្ដើមកាលពីឆ្នាំ ២០០៨ នឹងត្រូវបញ្ចប់នៅខែតុលា ឆ្នាំ២០១៤ ខាងមុខនេះ។ ចំណែកឯគម្រោងពង្រីកការអប់រំបណ្ដុះបណ្ដាលបច្ចេកទេស និងវិជ្ជាជីវៈ ដែលចាប់ផ្ដើមកាលពីឆ្នាំ២០១០ នឹងត្រូវបញ្ចប់នៅក្នុងខែមិថុនាឆ្នាំ២០១៥ខាងមុខ។ គម្រោងទាំង២នេះ រដ្ឋាភិបាលកម្ពុជាបានចូលរួមថវិកាបដិភាគចំនួន ៩,៣ លានដុល្លារ។
ស្ថិតនៅក្នុងគម្រោងនេះ មជ្ឈមណ្ឌលសារគមនាគមន៍មួយ ដែលស្ថិតនៅក្នុងបរិវេណវិទ្យាស្ថានជាតិអប់រំ ត្រូវបានបង្កើតឡើងក្នុងខែកុម្ភៈឆ្នាំ២០១៤។ មជ្ឈមណ្ឌលនេះ កំពុងត្រូវបានប្រើប្រាស់ និងដំណើរការដោយគ្រូឧទ្ទេសចំនួន១២០នាក់ និងគរុសិស្សចំនួន១០០០នាក់ មកពីទូទាំងប្រទេស។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡា ដែលបានចូលរួមពិនិត្យមើលគម្រោងនេះ បានបញ្ជាក់ពីសារៈសំខាន់នៃការបង្កើតមជ្ឈមណ្ឌលសារគមនាគមន៍ដោយADBនេះ។
សូមបញ្ជាក់ថា ចាប់តាំងពីឆ្នាំ ១៩៩៦មក ធនាគារអភិវឌ្ឍន៍អាស៊ី ADB បានផ្តល់ជំនួយដល់កម្ពុជាសម្រាប់វិស័យអប់រំ និងការបណ្ដុះបណ្ដាលបច្ចេកទេសវិជ្ជាជីវៈសរុបជាង ២០៤,៦ លានដុល្លារអាមេរិក ដែលក្នុងនោះ ៥២,៦ លានដុល្លារ គឺជាជំនួយឥតសំណងរបស់មូលនិធិអភិវឌ្ឍន៍អាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ