WFP៖ ប្រទេសក្រីក្រពឹងផ្អែកលើការនាំចូល ប្រឈមនឹងការខ្វះខាតស្បៀងអាហារដោយសារកូវីដ១៩
កូវីដ១៩ គឺជាវិបត្តិដ៏ធ្ងន់ធ្ងរបំផុតមួយ របស់ពិភពលោកនាពេលបច្ចុប្បន្ន។ ស្របពេលដែល ជំងឺរាតត្បាតនេះ នៅបន្តបោះពួយវាយប្រហារពិភពលោកឥតស្រាន្ត នៅថ្ងៃសុក្រ ទី ៣ មេសា អង្គការសហប្រជាជាតិ បានព្រមានថា កូវីដ១៩ កំពុងគំរាមកំហែង និងបង្កឲ្យមានវិបត្តិខ្វះខាតស្បៀងអាហារ សម្រាប់មនុស្សចំនួនរាប់រយលាននាក់ ជាពិសេសនៅក្នុងទ្វីបអាហ្វ្រិក។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងប្រទេសក្រីក្រ ដែលពឹងផ្អែកលើការនាំចេញមុខទំនិញនានា ដើម្បីទទួលបានលុយ ចំណាយលើការនាំចូលស្បៀងអាហារ មនុស្សវណ្ណៈកណ្តាល អាចនឹងត្រូវការជំនួយស្បៀងអាហារ ដើម្បីរស់បានក្នុងពេលជួបវិបត្តិកូវីដ១៩។ នេះ គឺជាការប្រកាសឲ្យដឹងពីខាងកម្មវិធីស្បៀងអាហារពិភពលោករបស់អ.ស.ប (WFP)។
ប្រធានផ្នែកសន្តិសុខស្បៀងរបស់កម្មវិធីស្បៀងអាហារពិភពលោក លោកអារីហ្វ អ៊ូសាំង (Arif Husain) បានមានប្រសាសន៍ថា ជាទូទៅ WFP ជួយឧបត្ថម្ភគាំទ្រស្បៀងអាហារ នៅពេលមានគ្រោះធម្មជាតិដូចជាគ្រោះរាំងស្ងួត ឬក៏ពេលមានវិបត្តិសេដ្ឋកិច្ចជាដើម។ ក៏ប៉ុន្តែ ឥឡូវនេះ WFP ត្រូវជួយទាំងអស់ និងកម្រិតពិភពលោកទៀតផង ដែលនេះមិនមែនជារឿងធ្លាប់កើតឡើងពីមុនមកទេ។
ជាមួយគ្នានេះ តាមរយៈរបាយការណ៍មួយ អង្គការស្បៀងអាហារពិភពលោកបានឲ្យដឹងថា មានមនុស្សស្ទើរតែជិត ២១២ លាននាក់ គ្មានសុវត្ថិភាពខាងស្បៀងអាហារ ហើយ ៩៥ លាននាក់ ដែលជាប្រជាជនរស់នៅក្នុងប្រទេសក្រីក្រខ្វះខាតស្បៀងធ្ងន់ធ្ងរខ្លាំង។ របាយការណ៍ខាងលើដដែល ឲ្យដឹងទៀតថា សម្រាប់ប្រទេសក្រីក្រជាច្រើន ផលវិបាកផ្នែកសេដ្ឋកិច្ច នឹងធ្វើឲ្យប្រទេសទាំងនោះ រងផលប៉ះពាល់កាន់តែធ្ងន់ធ្ងរជាងជំងឺកូវីដ១៩ ទៅទៀត។
នៅទ្វីបអាហ្វ្រិក ជាពិសេស អនុតំបន់សាហារ៉ា ដែលរស់ដោយពឹងផ្អែកខ្លាំងលើការនាំចូលធញ្ញជាតិ គឺជាទ្វីបដែលប្រឈមនឹងហានិភ័យខ្ពស់បំផុត។ ប្រទេសសូម៉ាលី និងស៊ូដង់ខាងត្បូង ជាប្រទេសដែលទទួលរងប៉ះពាល់ខ្លាំងជាងគេ ចំពោះការផ្គត់ផ្គង់គ្រាប់ធញ្ញជាតិ។ រីឯប្រទេសផ្សេងទៀត មានដូចជាអង់ហ្គោឡា នីហ្សេរីយ៉ា និងឆាដ ពឹងផ្អែកលើការនាំចេញ ដើម្បីទទួលបានលុយសម្រាប់ចំណាយលើការនាំចូលស្បៀងអាហារ។
គួររំឭកជូនថា គិតត្រឹមយប់ថ្ងៃទី ៣ មេសា ចំនួនអ្នកឆ្លងវីរុសកូវីដ១៩ នៅទូទាំង ពិភពលោក បានកើនឡើងដល់ជាង ១លាន ៦ម៉ឺននាក់ ហើយអ្នកស្លាប់បានឡើងដល់ជាង ៥ម៉ឺន ៦ពាន់នាក់។
យោងតាមរបាយការណ៍ចុងក្រោយបង្អស់របស់អង្គការសុខភាពពិភពលោក ដែលមានចុះ ផ្សាយដោយភ្នាក់ងារព័ត៌មានបារាំង AFP កាលពីថ្ងៃសុក្រម្សិលមិញ បង្ហាញថា ករណីឆ្លងកូវីដ១៩ នៅអាហ្វ្រិកមាន ៤ ពាន់ ៧រយករណី និងមានស្លាប់ ១២៧ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ