ដោយសារតែកូវីដ១៩ ទិវាពលកម្មអន្តរជាតិខុសប្លែកពីធម្មតា ព្រោះគ្មានបាតុកម្ម
ចុះផ្សាយនៅថ្ងៃ៖
ស្តាប់ - ០៨:០៦
ថ្ងៃទី១ឧសភា ទិវាពលកម្មអន្តរជាតិឆ្នាំនេះ មានលក្ខណៈខុសប្លែកពីធម្មតា ដោយសារតែពុំមានក្បួនបាតុកម្ម របស់សហជីពកម្មករនិយោជិតឡើយ នៅតាមប្រទេសនានា។ ព្រោះតែជម្ងឺកូវីដ១៩ ប្រជាជនសឹងតែទូទាំងពិភពលោក ត្រូវសំងំនៅក្នុងផ្ទះ ឯការជួបជុំនៅតាមទីសាធារណៈ ត្រូវបានហាមឃាត់។ ជាទិវាពលកម្ម ដែលពលករកម្មករ មិនអាចជួបជុំគ្នាតវ៉ាសម្តែងមតិបាន ខណៈដែលពិភពលោកកំពុងតែប្រឈម នឹងវិបត្តិសេដ្ឋកិច្ចដ៏ធ្ងន់ធ្ងរ។ ហើយអ្នកដែលអាចរងផលលំបាកខ្លាំងជាងគេនោះ គឺកម្មករ ពលករតូចតាចតែម្តង ដែលត្រូវបាត់បង់ការងារ បាត់បង់ប្រាក់ចំណូល ដោយសារតែវិបត្តិសេដ្ឋកិច្ច បង្កឡើងដោយកូវីដ១៩។
កូវីដ១៩ ធ្វើឲ្យទិវាពលកម្មអន្តរជាតិស្ងាត់ជ្រងំ
ទិវាពលកម្មអន្តរជាតិ ១ឧសភា ឆ្នាំនេះ មានបរិយាកាសខុសប្លែកពីសព្វដង ដោយសារតែគ្មានក្បួនបាតុកម្មជួបជុំគ្នាទេ។ នៅតាមប្រទេសអឺរ៉ុប ជាពិសេសបារាំងតែម្តង ដែលមានសកម្មភាពសហជីពខ្លាំង តាមទំលាប់ ថ្ងៃទី១ឧសភា គឺមានមានក្បួនបាតុកម្មជួបជុំ ស្រែកទ្រហឹងអឺងកង នៅទូទាំងប្រទេសតែម្តង។
ទិវាពលកម្មអន្តរជាតិ ជាទិវាដែលឧទ្ទិសដល់ការងារដ៏លំបាក របស់ពលករ របស់កម្មករ និយោជិត នៅទូទាំងពិភពលោកយើង ដែលពួកគេធ្វើការប្រើកម្លាំង បែកញើសហូរញើស ដើម្បីបានប្រាក់កម្រៃចិញ្ចឹមជីវិត។ ទិវាពលកម្មអន្តរជាតិ ក៏គឺជាឱកាសដែលសហជីព ឬតំណាងនិយោជិត ធ្វើការតវ៉ា ទាមទារសិទ្ធិ ទាមទារអត្ថប្រយោជន៍ជូនដល់ ពលករកម្មករ និងជំរុញឲ្យរដ្ឋាភិបាល ប្រឹងប្រែងពង្រឹងការរីកចំរើនក្នុងវិស័យការងារ ការពារនិយោជិតឲ្យបានច្រើន ព្រោះគឺកម្លាំងញើសឈាមរបស់ពួកគេនេះហើយ ដែលជាចលករសេដ្ឋកិច្ចរបស់ពិភពលោកយើង។
តែក្នុងបរិបទបច្ចុប្បន្ននេះ មេរោគកូវីដ១៩ បានរារាំងមិនឲ្យមានបាតុកម្ម ឬ មានការជួបជុំអ្វីទាំងអស់។
មិនអាចចុះផ្លូវតវ៉ា តែអាចដាក់បដាតាមបង្អួច
គ្មានការជួបជុំដង្ហែរក្បួននៅខាងក្រៅ តាមផ្លូវសាធារណៈមែន ក៏ប៉ុន្តែសហជីពនៅតាមប្រទេសជាច្រើននៅអឺរ៉ុប បានអំពាវនាវ ឲ្យប្រជាជន នាំគ្នាបង្ហាញទឹកចិត្ត និងចូលរួមប្រារព្ធទិវានេះ នៅតាមផ្ទះរៀងៗខ្លួន។ ឧទាហរណ៍ ដូចជាការដាក់បដា នៅតាមមាត់បង្អួច ឬតាមរបងផ្ទះ ដើម្បីសម្តែងការតវ៉ាណាមួយ។
នៅបារាំង នៅវេលាម៉ោង១២ ថ្ងៃត្រង់ ប្រជាពលរដ្ឋ បានណាត់គ្នាទះដៃ គោះចានគោះឆ្នាំង តាមមាត់បង្អួតឲ្យកងរំពងឡើង ដើម្បីអបអរទិវាពលកម្មអន្តរជាតិនេះ និងជាពិសេស គឺដើម្បីគាំទ្រ អរគុណ ចំពោះបុគ្គលិកនៅតាមមន្ទីរពេទ្យ ពលករកម្មករ ដែលនៅបន្តធ្វើការ ដូចជាបុគ្គលិកគិតលុយនៅតាមផ្សារលក់ម្ហូបចំណី បុគ្គលិកអនាម័យ បុគ្គលិកប្រមូលសម្រាម ឬបុគ្គលិកដឹកចិញ្ជូនទំនិញជាដើម ។ល។ បើគ្មានពួកគេទាំងនេះ ជីវិតរស់នៅរបស់ប្រជាជនទូទាំងប្រទេស គឺពិតជាត្រូវរាំងស្ទះទាំងស្រុង។ បុគ្គលិកទាំងនោះនៅតែបន្តធ្វើការ បើទោះបីប្រឈមខ្លាំង នឹងការឆ្លងរាលដាលនូវជំងឺកូវីដ១៩ក៏ដោយ។
នៅបារាំង មានមតិជាច្រើន បានអំពាវនាវ សុំឲ្យតំឡើងប្រាក់ខែដល់បុគ្គលិកពេទ្យ ដល់ពលករកម្មករតូចតាច និងផ្តល់អត្ថប្រយោជន៍ការងារផ្សេងៗ ដូចជាបន្ថែមថ្ងៃឈប់សម្រាក ឬ ប្រាក់បំណាច់ និងអាចឲ្យពួកគេអាចឆាប់ចូលនិវត្តន៍ ជាដើម។
យ៉ាងណាមិញ លោកម៉ាក្រុង ប្រធានាធិបតីបារាំង បានធ្វើសារវីដេអូខ្លីមួយ ដើម្បីផ្ញើសារ ជូនប្រជាជនបារាំង ជាពិសេសគឺពលករកម្មករ និងសហជីពទាំងអស់ ដែលពួកគេមិនអាចធ្វើបាតុកម្មបាន នៅក្នុងឱកាសទិវានេះ។
លោកម៉ាក្រុង បានលើកឡើងថា ទិវាពលកម្មអន្តរជាតិ១ឧសភា ឆ្នាំ២០២០នេះ គឺមិនដូចលើកណាទាំងអស់។ លោកម៉ាក្រុង បន្តថា លោកពិតជាយល់នូវការលំបាក បណ្តាលមកពីការហាមឃាត់ ដែលធ្វើឲ្យប្រជាជនមិនអាចប្រារព្ធទិវានេះ ដូចសព្វមួយដងបាន។ លោកម៉ាក្រុង បានមានប្រសាសន៍ថា គឺដោយសារការងារប្រឹងប្រែង របស់ពលករ កម្មករ បុគ្គលិកពេទ្យ បុគ្គលិកសង្រ្គោះទាំងអស់ ដែលធ្វើឲ្យប្រទេសជាតិ អាចបន្តដំណើរ ឈររឹងមាំទៅមុខបាន។ ជាចុងក្រោយ លោកបានសន្យាថា ប្រជាជាតិបារាំងទាំងអស់ នឹងអាចប្រារព្ធទិវាពលកម្មអន្តរជាតិលើកក្រោយ ៗ ក្នុងបរិយាកាសសប្បាយរីករាយ និងសាមគ្គីភាព នៅពេលណាបារាំងរួមគ្នាពុះពារ យកឈ្នះមេរោគឆ្លងនេះបានសម្រេច។
កម្មករពលករ ជាអ្នកប្រឈមខ្លាំងជាងគេ ចំពោះវិបត្តិសេដ្ឋកិច្ច
យ៉ាងណាក៏ដោយ វិបត្តិកូវីដ១៩ បានធ្វើឲ្យពិភពលោកយើង ស្ថិតក្នុងវិបត្តិសេដ្ឋកិច្ចដ៏ធ្ងន់ធ្ងរបំផុត មិនធ្លាប់មានទេ។ ជាមួយនឹងវិបត្តិសេដ្ឋកិច្ច ដែលពិភពលោកយើងកំពុងឆ្លងកាត់ ដោយសារកូវីដ១៩នេះ។ គឺពលករ កម្មករតូចតាចនៅតាមរោងចក្រសហគ្រាស ដែលពួកគេអាចក្លាយជាជនរងគ្រោះ មុនគេបង្អស់។ ក្នុងសេដ្ឋកិច្ចសកលភាវូបនីយកម្ម មូលធននិយម ពេលមានវិបត្តិម្តងៗ រោងចក្របិទទ្វារ ម្ចាស់ភាគហ៊ុនដកហ៊ុនចេញ គឺកម្មករ ពលករតូចតាច ដែលត្រូវអត់ការងារធ្វើ គ្មានប្រាក់ចំណូល។
ត្រឹមត្រីមាសទី១ដើមឆ្នាំនេះ នៅតំបន់ចាយប្រាក់អឺរ៉ូ ចំណូលដុលបានចុះថយជារួម៣,៨%។ នៅបារាំងវិញ ចំណូលដុលក្នុងស្រុកបានធ្លាក់ចុះ៥,៨%។ វិទ្យាស្ថាន Eurostat បានព្យាករទុកថា ត្រីមាសទី២ នឹងថយចុះខ្លាំងជាងនេះទៀត។ ចំនួនអ្នកអត់ការងារធ្វើបានកើនឡើងខ្លាំងសម្បើមណាស់។
នៅសហរដ្ឋអាមេរិក គិតពីពាក់កណ្តាលខែមីនាមក ចំនួនមនុស្សដែលមកចុះឈ្មោះសុំប្រាក់ឧបត្ថម្ភ បន្ទាប់ពីបាត់បង់ការងារ គឺមានដល់ទៅ៣០លាននាក់។ នេះគឺជាចំនួនផ្ទុះឡើងដ៏ធំមហិមា ក្នុងពេលដ៏ខ្លីបំផុត ក្នុងប្រវត្តិសាស្ត្រ។ កម្មករ ពលករ ដែលមានការងារតូចតាច ប្រើកម្លាំង បានប្រាក់កម្រៃតិច ហើយប្រឈមនឹងការបណ្តេញចេញបំផុត នៅសហរដ្ឋអាេមរិក។
ហេតុដូច្នេះហើយ បានជាក្នុងឱកាសទិវាពលកម្មអន្តរជាតិ ក្នុងបរិបទវិបត្តិដ៏ធ្ងន់ធ្ងរនេះ អង្គការ សហជីព និងអ្នកនយោបាយមួយចំនួនធំ បានអំពាវនាវ ឲ្យគិតគូរដល់ពលករ កម្មករដែលងាយរងគ្រោះ។ រដ្ឋត្រូវតែបំពេញតួនាទីការពារពួកគេ ជួយពួកគេ កុំឲ្យបាត់បង់ការងារ។ ក្រុមហ៊ុនអន្តរជាតិ ធំៗ ដែលតែងតែកើបប្រាក់ចំណេញរាប់រយលាន យកទៅឲ្យម្ចាស់ភាគហ៊ុននោះ គួរតែពិចារណាជួយបុគ្គលិកនិយោជិត កុំគិតតែប្រាក់ចំណេញពេក។
វិបត្តិកូវីដ១៩នេះ បានធ្វើឲ្យពិភពលោកយើងស្វែងយល់បានច្រើន អំពីភាពផុតស្រួយនៃសេដ្ឋកិច្ចសកលភាវូបនីយកម្ម ព្រមទាំងផលអវិជ្ជមាន នៃការបែងចែកភោគផលមិនស្មើភាពគ្នា រវាងពលករ កម្មករតូចតាច ដែលយកញើសយកកម្លាំងដូរបាយ និងអ្នកមាន ថៅកែ ម្ចាស់ភាគហ៊ុន ដែលចាំតែកើបប្រាក់ចំណេញ មុនខ្វល់ពីការលំបាករបស់អ្នកតូចតាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ