កូវីដ១៩៖ អ្នកជំនាញហូឡង់ និងអ៊ីស្រាអែល រកឃើញ អង់ទីក័រដែលមានកម្លាំងទប់មេរោគកូរ៉ូណាវីរុសថ្មី
ចុះផ្សាយនៅថ្ងៃ៖
ស្តាប់ - ០៥:៤៧
នៅថ្ងៃទី៥ឧសភា សហគមអ្នកស្រាវជ្រាវវិជ្ជសាស្ត្រ បានផ្តោតក្តីសង្ឃឹម ក្នុងការយកឈ្នះទៅលើមេរោគកូរ៉ូណាវីរុសថ្មីដែលបង្កជំងឺកូវីដ១៩ ក្រោយទទួលដំណឹងថា អ្នកស្រាវជ្រាវហូឡង់មួយក្រុម និងអ្នកស្រាវជ្រាវអ៊ីស្រាអែល បានរកឃើញព្រមៗគ្នា នូវ អង់ទីក័រមួយប្រភេទ ដែលអាចមានកម្លាំងទប់ កុំឲ្យមេរោគកូរ៉ូណានេះ អាចបំបែកខ្លួន ចូលទៅតោងក្នុងសរីរាង្គមនុស្សបាន។ នេះគឺលទ្ធផលស្រាវជ្រាវដំណាក់កាលបឋម តែយ៉ាងណាវាជាក្តីសង្ឃឹមមួយ ក្នុងការស្រាវជ្រាវ ផលិតថ្នាំព្យាបាល ព្រមទាំងវ៉ាក់សាំងការពារជម្ងឺកូវីដ១៩។
វាគឺជាការស្រាវជ្រាវ២ដាច់ដោយឡែកពីគ្នា មួយជារបស់ក្រុមអ្នកស្រាវជ្រាវវិជ្ជសាស្ត្រ នៃសកលវិទ្យាល័យ Utrecht សហការជាមួយមជ្ឈមណ្ឌលវិជ្ជសាស្ត្រអឺរ៉ាស៊្មុស ទីក្រុងរ៉ូតែដាម ប្រទេសហូឡង់ រីឯមួយទៀត គឺជាការស្រាវជ្រាវ របស់វិទ្យាស្ថានស្រាវជ្រាវជីវសាស្ត្រ ដែលជាផ្នែកមួយនៃក្រសួងការពារជាតិអ៊ីស្រាអែល។
« អង់ទីក័រទប់ទល់មេរោគ »
ទស្សនាវត្តី The Nature ចេញផ្សាយកាលពីល្ងាចថ្ងៃចន្ទទី៤ឧសភា បានចុះផ្សាយពីលទ្ធផលស្រាវជ្រាវ របស់ក្រុមអ្នកជំនាញហូឡង់ ស្តីអំពីការស្វែងរកអង់ទីក័រ ដែលអាចមានកម្លាំងទប់ជាមួយមេរោគកូរ៉ូណាវីរុសប្រភេទថ្មីនេះ។ ក្រុមអ្នកជំនាញហូឡង់ បានបង្កើតអង់ទីក័រសិប្បនិម្មិតចំនួនប្រមាណ៥១ ដែលសុទ្ធតែជាប្រភេទ Anticorps monoclonal។ បន្ទាប់មកទៀត គេយកវាទៅឲ្យជួបជាមួយនឹងមេរោគកូរ៉ូណាវីរុស (Sars-CoV-2) ដែលបានបង្កជម្ងឺ Sars កាលពីឆ្នាំ២០១៣ និងមេរោគកូរ៉ូណាវីរុស ដែលបង្កជំងឺកូវីដ១៩។
ក្រោយការធ្វើតេស្តសាកល្បង គេបានរកឃើញអង់ទីក័រមួយក្នុងចំណោមនេះ ដែលអាចមានកម្លាំងទប់ទល់ជាមួយមេរោគទាំង២នេះបាន មិនថាមេរោគបង្កជំងឺSars ឬមេរោគបង្កជំងឺកូវីដ១៩ទេ។ តាមការពន្យល់របស់អ្នកជំនាញ អង់ទីក័រនេះ វាអាចចូលទៅវាយលុក លើប្រូតេអ៊ីន ដែលស្ថិតនៅលើសំបកក្រៅរបស់មេរោគកូរ៉ូណា។ គឺប្រូតេអ៊ីននេះហើយ ដែលមានតួនាទីភ្ជាប់ខ្លួន ធ្ពក់មេរោគទៅនឹងប្រព័ន្ធទទួល របស់កោសិកាមនុស្សយើង ដែលភាសាបច្ចេកទេសហៅថា Récepteurs ACE2។
ដូច្នេះ កាលណាអង់ទីក័រ ទៅរំខានវាយលុកលើប្រូតេអ៊ីននេះ គឺមានន័យថា មេរោគមិនអាចបញ្រ្ចៀតចូលទៅក្នុងសរីរាង្គមនុស្សយើង បានដោយងាយទេ។ អ្នកជំនាញហូឡង់ លើកឡើងថា អង់ទីក័រ ដែលគេទើបតែរកឃើញនេះ តែម្នាក់វាឬក៏អាចបូកផ្សំជាមួយអង់ទីក័រផ្សេងទៀត គឺវាប្រហែលជាអាចយុទ្ធសាស្ត្រទៅថ្ងៃខាងអនាគត ក្នុងយកឈ្នះជម្ងឺកូវីដ១៩។
អ៊ីស្រាអែលនឹងផលិតអង់ទីក័រដែលស្រាវជ្រាវឃើញ ក្នុងទ្រង់ទ្រាយធំ
ទាក់ទិនលទ្ធផលស្រាវជ្រាវរបស់ក្រុមអ្នកជំនាញអ៊ីស្រាអែល គឺគេមិនបានដឹងលំអិតប៉ុន្មានទេ។ នៅថ្ងៃទី៥ឧសភានេះ លោករដ្ឋមន្ត្រីក្រសួងការពារជាតិអ៊ីស្រាអែល គ្រាន់តែបានចេញលិខិតប្រកាសមួយ ដែលអះអាងថា អ្នកជំនាញនៃវិទ្យាស្ថានស្រាវជ្រាវជីវសាស្ត្រអ៊ីស្រាអែល (IIBR) បានរកឃើញអង់ទីក័រម៉ូណាក្លូណាល់ មួយប្រភេទ ដែលអាចមានកម្លាំង ទប់ជាមួយមេរោគកូរ៉ូណា។ នៅក្នុងលិខិតប្រកាសនេះដែរ លោកនាយកវិទ្យាស្ថានអ៊ីស្រាអែលនេះ បានបញ្ជាក់ថា គេនឹងដាក់ពាក្យសុំប្រឺវ៉េ ដើម្បីការពារលទ្ធផលស្រាវជ្រាវរបស់គេ ហើយបន្ទាប់មកទៀត គឺនឹងចាប់ផ្តើមផលិតអង់ទីក័រនេះ ក្នុងទ្រង់ទ្រាយធំ ដើម្បីឆ្លើយតបទៅនឹងតម្រូវការ។
តែយ៉ាងណា លទ្ធផលស្រាវជ្រាវទាំងអស់នេះ គឺវាស្ថិតនៅក្នុងដំណាក់កាលដំបូងប៉ុណ្ណោះ។ គេត្រូវការការតាមដាន និងទិន្នន័យឲ្យបានច្រើនជាងនេះទៀត។ តែយ៉ាងណាវាក៏ជាការសង្ឃឹមមួយដែរ ដែលក្រុមជំនាញ២ផ្សេងគ្នា បានស្រាវជ្រាវរកឃើញ អង់ទីក័រម៉ូណូក្លូណាល់ដូចគ្នា ដែលអាចទប់ទល់ជាមួយមេរោគកូរ៉ូណាប្រភេទថ្មីនេះបាន។
ដោយឡែក វិទ្យាស្ថានប៉ាស្ទ័ររបស់បារាំង ក៏កំពុងតែផ្តោតការយកចិត្តទុកដាក់ខ្លាំង លើការស្រាវជ្រាវស្វែងរកអង់ទីក័រនេះដែរ ដើម្បីរកមើលថា អង់ទីក័រមួយណា ដែលមានកម្លាំងជាងគេ អាចទប់ឬសម្លាប់មេរោគកូរ៉ូណាាបាន។ ដំណាក់កាលបន្ទាប់ គឺការចិញ្ចឹមនិងផលិតអង់ទីក័រទាំងនេះ ក្នុងទ្រង់ទ្រាយធំ ដើម្បីយកវាទៅប្រើ ព្យាបាលអ្នកជំងឺកូវីដ១៩។
អង់ទីក័រចំលងចេញ ពីកោសិកាសត្វឡាម៉ា
ការសិក្សាមួយផ្សេងទៀត របស់ក្រុមអ្នកស្រាវជ្រាវនៃសកលវិទ្យាល័យGant ប្រទេសប៊ែលហ្សិក និង អ្នកជំនាញនៅសកលវិទ្យាល័យតិចសាស់ សហរដ្ឋអាេមរិក ដែលសាកល្បងយកអង់ទីក័រចេញពីកោសិកាសត្វឡាម៉ា។ តាមពិតវាជាគម្រោងស្រាវជ្រាវចាស់ ដែលមានកាលពីជំនាន់មេរោគជំងឺ SARS នៅឆ្នាំ២០១៣។ តែពេលនេះ គេបានយកវាមកបំបែក សិក្សាសាកល្បងជាមួយមេរោគកូរ៉ូណាវីរុសប្រភេទថ្មី ដែលបង្កជំងឺកូវីដ១៩។
អ្នកជំនាញគេបានបង្កើតអង់ទីក័រសិប្បនិម្មិតមួួយ ដោយការច្របាច់បញ្ចូលគ្នា នៃ អង់ទីក័រចំនួន២ របស់សត្វឡាម៉ាដែលបានផលិតប្រឈមជាមួយមេរោគជំងឺ SARS។ បន្ទាប់មកគេយកវាមកសាកលើមេរោគកូរ៉ូណាប្រភេទថ្មី។ យោងតាមលទ្ធផល ដែលចុះផ្សាយក្នុងទស្សនាវត្តីវិជ្ជសាស្ត្រ Cell នៅថ្ងៃទី៥ឧសភានេះ គឺការសាកល្បងក្នុងមន្ទីរពិសោធន៍ បានលទ្ធផលថា អង់ទីក័រយកចេញពីសត្វឡាម៉ានេះ អាចទប់ទល់ជាមួយមេរោគកូរ៉ូណាប្រភេទថ្មីបាន។ ជាងនេះទៀត អង់ទីក័រយកពីកោសិកាសត្វឡាម៉ានេះ មានទំហំតូចជាងអង់ទីក័រយកចេញពីកោសិកាមនុស្ស ដែលវាធ្វើឲ្យកាន់តែមានភាពងាយស្រួល ក្នុងការយកអង់ទីក័រនេះ បញ្ចូលទៅក្នុងសរីរាង្គមនុស្ស ដូចជាវិធីងាយៗ ដោយគ្រាន់តែស្រូបចូលតាមផ្លូវដង្ហើម ជាដើម។ នេះគឺលទ្ធផលសាកល្បងក្នុងមន្ទីរពិសោធន៍។ គេត្រូវរងចាំតានដាន លើលទ្ធផល នៃការសាកល្បងជាក់ស្តែង យកអង់ទីក័រប្រភេទនេះ បញ្ចូលទៅក្នុងខ្លួនអ្នកជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ