វិបត្តិអាកាសធាតុ គំរាមអាយុជីវិត និងការរីកធំធាត់របស់កុមារចំនួន១ពាន់លាននាក់
ផលប៉ះពាល់បង្កឡើងដោយបម្រែបម្រួលអាកាសធាតុ បាននិងកំពុងគំរាមអាយុជីវិតកុមារ ចំនួនយ៉ាងហោច១ពាន់លាននាក់ នៅទូទាំងពិភពលោក។ នេះបើផ្អែកតាមរបាយការណ៍ប្រចាំឆ្នាំ របស់អង្គការ KidsRights ដែលមានមូលដ្ឋាននៅប្រទេសហូឡង់។ លក្ខខណ្ឌរស់នៅ ព្រមទាំងសុខុមាលភាពរបស់កុមារ មិនបានប្រសើរឡើងទេ ក្នុងរវាង១០ឆ្នាំចុងក្រោយនេះ ហើយជាងនេះទៀត វិបត្តិបង្កឡើងដោយជំងឺឆ្លងកូវីដ១៩ បានធ្វើឲ្យកុមារអាយុក្រោម៥ឆ្នាំ ស្លាប់ជិត៣សែននាក់ នៅតាមប្រទេសក្រីក្រ ដោយសារបញ្ហាកង្វះអាហារូបត្ថម្ភ និងគ្មានការថែទាំសុខភាព។
ចុះផ្សាយនៅថ្ងៃ៖
ស្តាប់ - ០២:៤២
ជារៀងរាល់ឆ្នាំ អង្គការ KidsRights ចេញរបាយការណ៍ចាត់ថ្នាក់ប្រទេសចំនួន១៨៥ប្រទេស ស្តីអំពីការគោរពសន្ធិសញ្ញាអន្តរជាតិស្តីពីសិទ្ធិកុមារ និងដោយយោងទៅតាមតួលេខរួម របស់អង្គការសហប្រជាជាតិ។ សម្រាប់របាយការណ៍ប្រចាំឆ្នាំ២០២២នេះ អង្គការ KidsRights បានទាញសញ្ញាអាសន្ន អំពីការធ្លាក់ចុះខ្លាំង នូវលក្ខខណ្ឌបំនិនជីវិត ព្រមទាំងសុខុមាលភាពរបស់កុមារនៅទូទាំងពិភពលោក។ វិបត្តិជំងឺឆ្លងកូវីដ១៩ បានជះឥទ្ធិពលអាក្រក់ ធ្វើឲ្យកុមារខ្វះចំណីអាហារ គ្មានការថែទាំសុខភាពត្រឹមត្រូវ ហើយបានបណ្តាលឲ្យកុមារអាយុក្រោម៥ឆ្នាំ ចំនួន២៨៦០០០នាក់ បានស្លាប់។
លោក Marc Dullaert ប្រធាននិងជាស្ថាបនិកអង្គការ KidsRights បានលើកឡើងថា របាយការណ៍ឆ្នាំ២០២២ បានឆ្លុះឲ្យឃើញនូវ គ្រោះថ្នាក់ប្រឈមធ្ងន់ធ្ងរណាស់ សម្រាប់កុមារជំនាន់នេះ និងទៅជំនាន់ក្រោយៗទៀត។ វិបត្តិអាកាសធាតុ កំពុងតែប៉ះពាល់យ៉ាងខ្លាំង ដល់សុខុមាលភាព ការរីកធំធាត់ទាំងរាងកាយ និងប្រាជ្ញាស្មារតីរបស់កុមារ។ ១០ឆ្នាំកន្លងមកនេះ លក្ខខណ្ឌជីវិតរបស់កុមារ មិនបានប្រសើរឡើងទាល់តែសោះ។ ជាងនេះទៀត កុមារដែលត្រូវបង្ខំឲ្យធ្វើការ បានកើនដល់ ១៦០លាននាក់ ពោលគឺកើនចំនួន៨,៤លាននាក់ ក្នុងរវាង៤ឆ្នាំចុងក្រោយនេះ។
ចំណាត់ថ្នាក់ល្អជាងគេក្នុងឆ្នាំ២០២២ ក្នុងការគោរពសិទ្ធិកុមារ គឺមានប្រទេសអ៊ីសឡង់ ស៊ុយអែត ហ្វាំងឡង់ និងហូឡង់ ខណៈសាធារណរដ្ឋអាហ្វ្រិកកណ្តាល សេរ៉ាឡេអូន អាហ្វហ្កានីស្ថាន និងឆាដ ស្ថិតនៅលេខរៀងចុងគេបង្អស់។ ជាមួយគ្នានេះ របាយការណ៍បានលើកសរសើរផងដែរ អំពីប្រទេសមួយចំនួនដែលបានប្រឹងប្រែងយកចិត្តទុកដាក់ដល់សុខុមាលភាពរបស់កុមារ ដូចជាប្រទេសអង់ហ្គោឡា ដែលបានកាត់បន្ថយករណីមរណភាពកុមារអាយុក្រោម៥ឆ្នាំ បានដល់ទៅពាក់កណ្តាល ប្រទេសបង់ក្លាដែស កាត់បន្ថយបានជិតពាក់កណ្តាល បញ្ហាកុមារអាយុក្រោម៥ឆ្នាំមិនគ្រប់គីឡូ ចំណែកប្រទេសបូលីវី បានកាត់បន្ថយជិតពាក់កណ្តាលដែរ នូវករណីគ្រោះថ្នាក់ការងាររបស់កុមារ។
ដោយឡែកប្រទេសមួយចំនួន ត្រូវបានរបាយការណ៍ស្តីបន្ទោស ជាក់ស្តែងប្រទេស នីហ្សេរីយ៉ា ដែលស្ថិតនៅលេខរៀងទី១៧៥ ហើយដែលមានករណីស្ត្រីស្លាប់ក្នុងពេលសម្រាលកូន ក្នុងកម្រិតខ្ពស់ខ្លាំងបំផុត។ រីឯប្រទេសម៉ុងតេណេហ្រ្កូ ស្ថិតនៅលេខរៀងទី៤៩ មានកម្រិតចាក់វ៉ាក់សាំងឲ្យដល់កុមារទាបខ្លាំង។ ប្រទេសស្វ៊ីស ដែលឆ្នាំមុនស្ថិតនៅលេខរៀងទី២ បានធ្លាប់មកនៅលេខរៀងទី៣១ ដោយសារតែការអនុវត្តគោលការណ៍គ្រិះ “នៃឧត្តមប្រយោជន៍របស់កុមារ” នៅមិនទាន់គ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ