លោក ការឡូស ហ្គោន ថាបានរៀបចំគម្រោងការតែ«ម្នាក់ឯងគត់» ដើម្បីគេចខ្លួន
សំណុំរឿងលោក ការឡូស ហ្គោន អតីតអគ្គនាយកក្រុមហ៊ុនរថយន្តរឺណូ-នីសាន់ ដែលបានរត់ភៀសខ្លួនទៅដល់ប្រទេសលីបង់, អ្វីថ្មីដែលគេដឹង គឺថា មានភស្តុតាងវីដេអូកាមេរ៉ា នៅផ្ទះរបស់គាត់ក្នុងតូក្យូ ដែលបញ្ជាក់ថា លោក ការឡូស ហ្គោន បានបើកឡានចេញពីគេហដ្ឋានតែម្នាក់ឯង។ រូបភាពនេះ គឺវីដេអូចុងក្រោយបំផុត ដែលមានរូបលោក ការឡូស ហ្គោន នៅតូក្យូ។ ពីប្រទេសលីបង់ លោក ការឡូស ហ្គោន បានបញ្ជាក់ពីថ្ងៃព្រហស្បតិ៍ ទី២មករា ថាលោកបានរៀបចំគម្រោងការតែ«ម្នាក់ឯងគត់» ដើម្បីរត់ចាកចេញពីប្រទេសជប៉ុន។ ការអះអាងបញ្ជាក់របស់លោកយ៉ាងដូច្នេះ គឺបន្ទាប់ពីសារព័ត៌មានអន្តរជាតិជុំទិញ នាំគ្នាទម្លាក់ការសង្ស័យទៅលើភរិយារបស់លោក ថាជាអ្នកនៅពីក្រោយគ្រោងការជម្លៀសខ្លួនរបស់ស្វាមី និងជាអ្នកចេញលុយកាក់សម្រាប់រៀបចំគ្រោងការនេះ។
ចុះផ្សាយនៅថ្ងៃ៖ កែប្រែថ្ងៃទី៖
នៅតូក្យូ ប៉ូលីសជប៉ុនបានចូលទៅឆែកឆែរផ្ទះរបស់លោក ការឡូស ហ្គោន។ ហើយនៅតួកគី វិញ ប៉ូលីសតួកគី បានកោះហៅអ្នកបើកបរយន្តហោះចំនួន៤នាក់ ទៅសួរនាំ ដើម្បីឈ្វេងយល់ពីដំណើរភៀសខ្លួនរបស់លោក ហ្គោន។ នៅពេលនេះ គេយល់ជាបឋមថា លោក ការឡូស ហ្គោន បានចេញពីផ្ទះនៅតូក្យូ នាយប់ជ្រៅថ្ងៃអាទិត្យ ទី២៩ធ្នូ ដោយឡើងជិះយន្តហោះឯកជនមួយ នៅព្រលានយន្តអន្តរជាតិ Kansai ក្បែរក្រុង Osaka គឺភាគខាងលិចតូក្យូ ដើម្បីតម្រង់ឆ្ពោះទៅកាន់ទីក្រុង អ៊ីស្តង់ប៊ូល។ ហើយនៅព្រឹកថ្ងៃច័ន្ទ លោកបន្តជិះយន្តហោះឯកជន ពីអាកាសយានដ្ឋានអាតាតួក (Ataturk ) ដើម្បីទៅជាន់ដីនៃរដ្ឋធានីបៃរូត (Beyrouth) ប្រទេសលីបង់។
ជាការរម្លឹក លោក ការឡូស ហ្គោន អាយុ៦៥ឆ្នាំ ជាអតីតអគ្គនាយកក្រុមហ៊ុនរថយន្តរឺណូ-នីសាន់ ហើយកាន់សញ្ជាតិបារាំង លីបង់ និង ប្រេស៊ីល។ លោកត្រូវតុលាការតូក្យូ ចោទប្រកាន់លើសំណុំរឿងជាច្រើនទាក់ទងនឹងរឿងពុករលួយ គេចពន្ធដារ ហើយត្រូវប៉ូលីសជប៉ុន ចាប់ខ្លួន អស់ចំនួន១៣០ថ្ងៃ។
នៅពេលគេចខ្លួនរួច លោក ការឡូស ហ្គោន ប្រកាសថា «លោកមិនមែនគេចពីតុលាការទេ តែគេចពីប្រព័ន្ធអយុត្តិធម៌របស់ជប៉ុន»។ ជុំវិញរឿងនេះ ការឡូស ហ្គោន ថានឹងធ្វើសន្និសីទកាសែតលម្អិតបន្ថែម នៅសប្តាហ៍ក្រោយនេះ ពីប្រទេសលីបង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ