លោកស្រីគ្លីនតុនទៅបំពេញទស្សនកិច្ចនៅឥណ្ឌា
បន្ទាប់ពីទស្សនកិច្ចនៅចិន និងបង់ក្លាដែស លោកហ៊ីឡារី គ្លីនតុន រដ្ឋមន្រ្តីក្រសួងការបរទេសអាមេរិក បានទៅដល់ប្រទេសឥណ្ឌា នៅថ្ងៃអាទិត្យនេះ ក្នុងដំណើរទស្សនកិច្ចរយៈពេល ៣ថ្ងៃ។ គោលដៅចម្បងនៃដំណើរទស្សនកិច្ចនេះ គឺដើម្បីពង្រឹងទំនាក់ទំនងអាមេរិក-ឥណ្ឌា ក្នុងពេលដែលប្រទេសទាំងពីរកំពុងប្រឈមមុខនឹងបញ្ហាចម្រូងចម្រាសជុំវិញទណ្ឌកម្មលើប្រេងកាតអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ទំនាក់ទំនងអាមេរិក-ឥណ្ឌាស្ថិតក្នុងភាពចម្រូងចម្រាស ក្រោយពីរដ្ឋាភិបាលឥណ្ឌាបដិសេធមិនព្រមអនុវត្តទណ្ឌកម្មរបស់សហរដ្ឋអាមេរិក លើវិស័យប្រេងកាតរបស់អ៊ីរ៉ង់។
គួររំឭកឡើងវិញថា ដើម្បីដាក់ទណ្ឌកម្មលើអ៊ីរ៉ង់ជុំវិញសំណុំរឿងនុយក្លេអ៊ែរ សហរដ្ឋអាមេរិកបានសម្រេចហាមឃាត់ការទិញប្រេងពីអ៊ីរ៉ង់។ អាមេរិកក៏បានព្រមានផងដែរថា នឹងដាក់ទណ្ឌកម្មលើធនាគាររបស់ប្រទេសណាដែលនៅបន្តទិញប្រេងពីអ៊ីរ៉ង់។ អាមេរិកបានសម្រេចលើកលែងទណ្ឌកម្មនេះ ដល់ប្រទេសជប៉ុន និងប្រទេសមួយចំនួនផ្សេងទៀត នៅសហភាពអឺរ៉ុប ក្រោយពីប្រទេសទាំងនេះបានកាត់បន្ថយការនាំប្រេងពីអ៊ីរ៉ង់។
ឥណ្ឌាវិញ ដែលជាប្រទេសកំពុងត្រូវការថាមពលច្រើន ដើម្បីបំពេញតាមតម្រូវការនៃកំណើនសកម្មភាពសេដ្ឋកិច្ច មានការពឹងផ្អែកខ្លាំងលើការទិញប្រេងពីអ៊ីរ៉ង់។ ដូច្នេះហើយបានជាឥណ្ឌាមិនចង់អនុវត្តទណ្ឌកម្មរបស់អាមេរិក។ ប៉ុន្តែ បើមិនកាត់បន្ថយការទិញប្រេងពីអ៊ីរ៉ង់ទេ ប្រព័ន្ធធនាគាររបស់ឥណ្ឌានឹងត្រូវប្រឈមមុខនឹងទណ្ឌកម្មរបស់អាមេរិក ដែលអាចនឹងបង្កឧបសគ្គដល់ការទូទាត់ថ្លៃប្រេង ដែលបច្ចុប្បន្នត្រូវទូទាត់ជាលុយដុល្លារអាមេរិក។
ឥណ្ឌារំពឹងថានឹងអាចចរចាជាមួយលោកស្រីគ្លីនតុន ដើម្បីបញ្ចៀសទណ្ឌកម្មរបស់អាមេរិក។ ចំណែកលោកស្រីគ្លីនតុនវិញ ក៏ចង់ដោះស្រាយបញ្ហាចម្រូងចម្រាសនេះដែរ ដើម្បីពង្រឹងទំនាក់ទំនងជាដៃគូរវាង អាមេរិក និងឥណ្ឌា។
ប្រទេសទាំងពីរនេះធ្លាប់ឆ្លងកាត់នូវទំនាក់ទំនងជូរចត់ ក្នុងអំឡុងសង្រ្គាមត្រជាក់ ដោយសារតែឥណ្ឌាមានទំនាក់ទំនងជិតស្និទ្ធជាមួយសហភាពសូវៀត។ ក្រោយពីសង្រ្គាមត្រជាក់បានបញ្ចប់ អាមេរិកបានចាប់ផ្តើមព្យាយាមផ្សះផ្សារទំនាក់ទំនងជាមួយឥណ្ឌាឡើងវិញ នៅចុងទសវត្សរ៍ទី៩០ ក្នុងពេលដែលលោកប៊ីល គ្លីនតុនធ្វើជាប្រធានាធិបតី។
បច្ចុប្បន្ន អាមេរិករំពឹងចង់បានឥណ្ឌាមកធ្វើជាដៃគូយុទ្ធសាស្រ្ត ទាំងក្នុងវិស័យសេដ្ឋកិច្ច និងភូមិសាស្រ្តនយោបាយ។ ក៏ប៉ុន្តែ ជាទូទៅ ភាពរកាំរកូសក្នុងទំនាក់ទំនងអាមេរិក-ឥណ្ឌាតែងតែកើតមាន ជាពិសេស ចាប់តាំងពីអាមេរិកបានពង្រឹងកិច្ចសហប្រតិបត្តិការជាមួយប៉ាគីស្ថាន ក្នុងការប្រយុទ្ធប្រឆាំងនឹងភេរវកម្ម។ ប៉ាគីស្ថាន គឺជាគូសត្រូវដ៏ធំមួយរបស់ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ