លោកហោ ណាំហុង ស្នើសមត្ថកិច្ចចាប់ខ្លួនលោកសម រង្ស៊ី មកអនុវត្តទោស
លោកហោ ណាំហុង រដ្ឋមន្រ្តីក្រសួងការបរទេសកម្ពុជា បានស្នើដល់អាជ្ញាធរមានសមត្ថកិច្ចចាប់ខ្លួនលោកសម រង្ស៊ី ប្រធានគណបក្សសង្រ្គោះជាតិមកអនុវត្តទោសក្នុងពន្ធនាគារ បន្ទាប់ពីចាញ់ក្តីលោកក្នុងសំណុំរឿងបរិហាកេរ្ត៍ជាសាធារណៈ និង ញុះញង់ឲ្យមានការរើសអើង។ ការស្នើរបស់ប្រមុខការទូតកម្ពុជានៅពេលនេះ គឺធ្វើឡើងស្របពេលដែលលោកសម រង្ស៊ី កំពុងស្ថិតក្រៅប្រទេសដោយមិនទាន់ត្រូវបានចាប់ខ្លួនមកអនុវត្តទោសនៅឡើយ។
ចុះផ្សាយនៅថ្ងៃ៖
ស្តាប់ - ០២:២៦
“ដោយមេធាវីរបស់ខ្ញុំ បានស្នើសុំកាលពីថ្ងៃទី ១៣ វិច្ឆិកា ឆ្នាំ ២០១៥ ឲ្យតុលាការអនុវត្តសាលដីកាស្ថាពរ លេខ១៧ ក្រ៥.ប ចុះថ្ងៃទី ១២ មីនា ឆ្នាំ ២០១៣ របស់សាលាឧទ្ធរណ៍ ខ្ញុំសុំអោយអាជ្ញាធរមានសមត្ថកិច្ចអនុវត្តសាលដីកាខាងលើនេះ ចាប់ខ្លួនទណ្ឌិត សម រង្ស៊ី ដើម្បីស្របតាមច្បាប់នៃនីតិរដ្ឋកម្ពុជា”។ នេះ គឺជាប្រកាសស្នើសុំទៅសមត្ថកិច្ចកម្ពុជារបស់លោកហោ ណាំហុង នៅលើទំព័រហ្វេសប៊ុករបស់លោកកាលពីយប់ថ្ងៃសុក្រ។
សំណើរបស់ប្រមុខការទូតកម្ពុជានៅពេលនេះ គឺបានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោកសម រង្ស៊ី ប្រមុខគណបក្សប្រឆាំងកម្ពុជា បានបរិយាយលើទំព័រហ្វេសប៊ុកផ្លូវការរបស់លោកកាលពីរសៀលថ្ងៃទី២០ វិច្ឆិកា ដោយបដិសេធសុំទោសលោកហោ ណាំហុង ដើម្បីទទួលបានការឈប់ចោទប្រកាន់ពីបទបរិហាកេរ្តិ៍។ មិនតែប៉ុណ្ណោះ ប្រធានគណបក្សសង្រ្គោះជាតិ បានលើកឡើងថា លោកហោ ណាំហុង ទេ ដែលត្រូវសូមទោសដួងវិញ្ញាណក្ខន្ធ និងក្រុមគ្រួសារជនរងគ្រោះដែលត្រូវបានពួកខ្មែរក្រហមសម្លាប់ បន្ទាប់ពីយកចេញពីគុកបឹងត្របែកនៅចុងទស្សវត្សរ៍ឆ្នាំ ១៩៧០ ដោយសារតែលោក ហោ ណាំហុង បានចូលដៃជាមួយពួកខ្មែរក្រហម ហើយបានមួលបង្កាច់ជនស្លូតត្រង់ ដើម្បីយកចិត្តពួកខ្មែរក្រហម ដើម្បីបានរួចខ្លួនចំពោះរូបលោក និងក្រុមគ្រួសារ។
ជាមួយគ្នានេះ លោកសម រង្ស៊ី ក៏បានដកស្រង់ឯកសារផ្ទៃក្នុងរបស់ស្ថានទូតសហរដ្ឋអាមេរិកប្រចាំប្រទេសកម្ពុជា មកបញ្ជាក់បន្ថែមថា ហោ ណាំហុង បានវិលត្រឡប់មកប្រទេសកម្ពុជាវិញ បន្ទាប់ពីពួកខ្មែរក្រហមឡើងកាន់អំណាច តែលោកបានរួចផុតពីការស្លាប់ ពីព្រោះលោកធ្លាប់បានរៀនសូត្រជាមួយ លោក អៀង សារី។ លោកហោ ណាំហុង បានក្លាយទៅជាមេជំរំ (គុក) បឹងត្របែក ហើយលោកព្រមទាំងភរិយា បានសហការជាមួយពួកខ្មែរក្រហមក្នុងការសម្លាប់មនុស្សជាច្រើនដែលជាប់ឃុំឃាំងនៅទីនោះ។
នៅក្នុងសំណេរលើហ្វេសប៊ុករបស់ខ្លួនកាលពីយប់ថ្ងៃសុក្រនោះ លោកហោ ណាំហុង មិនបានឆ្លើយតបបែបណានោះទេ ចំពោះការចោទប្រកាន់របស់លោកសម រង្ស៊ី នេះ ក្រៅតែពីលើកឡើងពីដំណើរការប្តឹងផ្តល់រវាងរូបលោក និង លោកសម រង្ស៊ី នៅឯតុលាការក្នុងស្រុកបារាំងតែប៉ុណ្ណោះ។ សាលាដំបូងផ្នែករដ្ឋប្បវេណី និង សាលាឧទ្ធរណ៍ក្រុងប៉ារីស សុទ្ធតែបានសម្រេចថា លោកសម រង្ស៊ី បានបរិហារ៍កេរ្តិ៍លើលោកហោ ណាំហុង។ ចំណែកតុលាការកំពូលបារាំងវិញ ក៏បានវិនិច្ឆ័យដូចគ្នានេះដែរ ប៉ុន្តែបានចាត់ទុកថា លោក សម រង្ស៊ី ត្រូវទទួលបានការអភ័យទោសដោយសុទ្ធចិត្ត និងត្រូវបានលើកលែងទោសទាំងអស់។
សូមបញ្ជាក់ថា ពាក់ព័ន្ធនឹងសំណុំរឿងនេះ តុលាការក្រុងភ្នំពេញ កាលពីថ្ងៃទី១៣ វិច្ឆិកា បានចេញដីកាចាប់ខ្លួនលោកសម រង្ស៊ី មកអនុវត្តទោសនៅក្នុងពន្ធនាគាររយៈពេលពីរឆ្នាំ និង ពិន័យជាទឹកប្រាក់ចំនួន៨លានរៀល ក្រោមបទចោទប្រកាន់បទបរិហារកេរ្តិ៍ជាសាធារណៈ និងញុះញង់ឲ្យមានការរើសអើងទៅលើ លោកហោ ណាំហុង អំពីតួនាទីរបស់លោកនៅក្នុងរបបខ្មែរក្រហម។ ក្រោយពីតុលាការចេញដីកា ក្រសួងមហាផ្ទៃកម្ពុជាក៏បានរៀបចំគណៈកម្មការពិសេសមួយ ដើម្បីតាមចាប់ខ្លួនលោកសម រង្ស៊ី ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ