លោកហោ ណាំហុងចេញទៅឥណ្ឌូនេស៊ីជាមួយក្តីសង្ឃឹមខ្លាំង
ប្រមុខការទូតខ្មែរ លោកឧបនាយករដ្ឋមន្ត្រីហោ ណាំហុង បានដឹកនាំគណៈប្រតិភូចេញទៅប្រទេសឥណ្ឌូនេស៊ីហើយ នៅព្រឹកថ្ងៃចន្ទនេះ ដើម្បីរកដំណោះស្រាយកិច្ចព្រមព្រៀងឈប់បាញ់ជាមួយប្រទេសថៃ នៅចំពោះមុខប្រធានអាស៊ាន។ លោកហោ ណាំហុង បានថ្លែងប្រាប់អ្នកសារព័ត៌មាន មុនឡើងយន្តហោះថា លោកមានក្តីសង្ឃឹមច្រើនលើការសម្រេចចិត្តរបស់អាស៊ាន។
ចុះផ្សាយនៅថ្ងៃ៖
សេចក្តីរាយការណ៍របស់លាង ដឺលុច ពីភ្នំពេញ
រដ្ឋមន្ត្រីក្រសួងការបរទេសកម្ពុជា លោកហោ ណាំហុង បានចាកចេញទៅទីក្រុងហ្សាការតា ប្រទេសឥណ្ឌូនេស៊ីហើយ កាលពីព្រឹកថ្ងៃចន្ទទី២១កុម្ភៈនេះ ដើម្បីទៅចូលរួមដោះស្រាយទំនាស់យោធា តាមបណ្តោយព្រំដែនកម្ពុជា-ថៃ តាមការអញ្ជើញរបស់រដ្ឋមន្ត្រីការបរទេសឥណ្ឌូនេស៊ី ដែលជាប្រធានអាស៊ាន។ កម្ពុជា តាមរយៈលោកនាយករដ្ឋមន្ត្រីហ៊ុន សែន បានស្នើសេចក្តីព្រាងនៃកិច្ចព្រមព្រៀងឈប់បាញ់រួចហើយ សម្រាប់ការពិភាក្សាដោះស្រាយបទឈប់បាញ់រវាងទីក្រុងភ្នំពេញ និងបាងកក។
ប្រមុខការទូតខ្មែរបានចាកចេញជាមួយប្រតិភូយោធាជាន់ខ្ពស់ទៀតផង ដែលក្នុងគណៈប្រតិភូនោះ មានសុទ្ធតែសមាសភាពដែលពាក់ព័ន្ធកិច្ចការព្រំដែន ដែល ក្នុងនោះក៏មានលោកឧត្តមសេនីយ៍ទោហ៊ុន ម៉ាណែត មេបញ្ជាការរងកងទ័ពជើងគោកផងដែរ ដែលចុងក្រោយនេះ បានក្លាយទៅជាតួអង្គចរចាផ្នែកយោធាក្នុងទំនាស់ព្រំដែន។
នៅក្នុងសន្និសីទកាសែត ដែលត្រូវបានរៀបចំនៅអាកាសយានដ្ឋានអន្តរជាតិភ្នំពេញ មុនការចាកចេញដំណើរនោះ លោកប្រមុខការទូតកម្ពុជាបានទទួលព័ត៌មានល្អមួយចំនួន ដែលធ្វើអោយលោកមានគំនិតសុទិដ្ឋិនិយម សម្រាប់ការប្រជុំនៅប្រទេសឥណ្ឌូនេស៊ី។ ទីមួយ គឺការថ្លែងរបស់រដ្ឋមន្ត្រីការបរទេសថៃ កាស៊ីត ភិរម្យ ដែលថា ប្រទេសថៃយល់ព្រមអោយមានអ្នកសង្កេតការណ៍ពីប្រទេសឥណ្ឌូនេស៊ីសម្រាប់ភាគីខ្លួន។ វត្តមានអ្នកសង្កេតការណ៍នៅព្រំដែន គឺជាបំណងរបស់កម្ពុជា។ ទីពីរ មានការប្រកាសគាំទ្រពីសភាអឺរ៉ុបអោយមានការគោរពសាលក្រមតុលាការក្រុងឡាអេ។
ប្រមុខការទូតកម្ពុជាមានជំនឿយ៉ាងខ្លាំងទៅលើស្ថាប័នអាស៊ាន។ លោកហោ ណាំហុង បានបញ្ជាក់ថា បើទោះណាជាអាស៊ានមិនមែនជាស្ថាប័នតុលាការក៏ដោយ ប៉ុន្តែអាស៊ានគឺជាអង្គការមានទម្ងន់ខាងនយោបាយ និងសេដ្ឋកិច្ច។ ការសម្រេចរបស់អាស៊ានមានទម្ងន់ផ្នែកនយោបាយលើឆាកអន្តរជាតិ។
ទោះយ៉ាងណាក៏ដោយ សម្រាប់លោកហោ ណាំហុង កម្ពុជាបានត្រៀមខ្លួនរួចហើយ ក្នុងការប្តឹងទៅតុលាការយុត្តិធម៌អន្តរជាតិ ដើម្បីស្នើអោយបកស្រាយសាលក្រម ឆ្នាំ១៩៦២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ