លោកនាយករដ្ឋមន្ត្រីហ៊ុន សែន សាទរចំពោះការចូលរួមបោះឆ្នោតរបស់បក្សប្រឆាំង
ភ្លាមៗក្រោយពីគណបក្សសង្គ្រោះជាតិបញ្ជូនបញ្ជីឈ្មោះបេក្ខជនតំណាងរាស្ត្ររបស់ខ្លួនទៅ គ.ជ.ប ដើម្បីចូលរួមការបោះឆ្នោត លោកនាយករដ្ឋមន្ត្រី ហ៊ុន សែន និងជាបេក្ខជននាយករដ្ឋមន្ត្រីរបស់គណបក្សប្រជាជនកម្ពុជាបានថ្លែងស្វាគមន៍ការចូលរួមប្រកួតរបស់គណបក្សប្រឆាំង។ ប៉ុន្តែ ទន្ទឹមនឹងនោះ លោកក៏បានថ្លែងចំអកដល់«ជម្លោះផ្ទៃក្នុង»ក្នុងគណបក្សប្រឆាំងទាក់ទងនឹងការដាក់បេក្ខជនឲ្យឈរឈ្មោះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោកនាយករដ្ឋមន្ត្រី ហ៊ុន សែន បានថ្លែងសាទរនៅព្រឹកថ្ងៃសៅរ៍នេះចំពោះការចូលរួមប្រកួតក្នុងការបោះឆ្នោតរបស់គណបក្សប្រឆាំង។ ក្នុងដំណើរចុះទៅខេត្តកំពង់ឆ្នាំងដើម្បីចូលរួមពិធីកាត់ឫសសីមាក្នុងវត្តមួយក្នុងស្រុករលាប្អៀ បេក្ខជននាយករដ្ឋមន្ត្រីរបស់គណបក្សប្រជាជនកម្ពុជាបានប្រកាសស្វាគមន៍ដល់គូប្រកួត សម្រាប់ការបោះឆ្នោតនៅថ្ងៃទី២៨កក្កដាខាងមុខ។
ការប្រកាសបែបនេះបានធ្វើឡើងមួយថ្ងៃបន្ទាប់ពីគណបក្សប្រឆាំងបានបញ្ជូនបញ្ជីឈ្មោះបេក្ខជនរបស់ខ្លួនទៅគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃសុក្រម្សិលមិញ។ លោកនាយករដ្ឋមន្ត្រីអះអាងថាមុននេះគណបក្សប្រឆាំងបានគំរាមថានឹងមិនចូលរួមការបោះឆ្នោតទេ ប៉ុន្តែ ឥឡូវនេះ ពួកគេបានចុះឈ្មោះចូលរួមបោះឆ្នោតហើយ។
ទន្ទឹមនឹងការស្វាគមន៍ ប្រមុខរដ្ឋាភិបាលបក្សកាន់អំណាចក៏បានលើកឡើងអំពីជម្លោះបែកបាក់ផ្ទៃក្នុងនៃគណបក្សសង្គ្រោះជាតិជុំវិញការឈរឈ្មោះជាបេក្ខជនតំណាងរាស្ត្រផងដែរ។ ប៉ុន្តែ គណបក្សប្រឆាំងតែងចាត់ទុកការថ្លែងបែបនេះថាជាយុទ្ធសាស្ត្រក្នុងការបំបែកគណបក្សរបស់ខ្លួនតែប៉ុណ្ណោះ។
គណបក្សសង្គ្រោះជាតិ ដែលជាការរួមបញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្ស ទើបតែបានបញ្ជូនបញ្ជីឈ្មោះបេក្ខជនតំណាងរាស្ត្ររបស់ខ្លួនទៅកាន់ គ.ជ.ប កាលពីរសៀលថ្ងៃសុក្រម្សិលមិញ ដើម្បីចូលរួមប្រកួតជាមួយគណបក្សដែលកាន់អំណាចជាង៣ទសវត្សរ៍។ ប៉ុន្តែ ក្នុងបញ្ជីឈ្មោះបេក្ខជនពេញសិទ្ធិនិងបម្រុងទាំង២៦៤ នាក់នោះគ្មានឈ្មោះលោក សម រង្ស៊ី ដែលជាប្រធានគណបក្សសង្គ្រោះជាតិ និងជាបេក្ខជននាយករដ្ឋមន្ត្រីរបស់គណបក្សនេះទេ។ មូលហេតុគឺដោយសារតែលោកសម រង្ស៊ី កំពុងជាប់ទោសរឿងព្រំដែនដែលច្បាប់មិនអនុញ្ញាតឲ្យឈរឈ្មោះបោះឆ្នោត។
គណបក្សសង្គ្រោះជាតិគឺជាគណបក្សទី៦ដែលបានចុះឈ្មោះចូលរួមក្នុងការបោះឆ្នោតជ្រើសរើសតំណាងរាស្ត្រអាណត្តិទី៥នេះ។ ការចុះឈ្មោះគណបក្សនយោបាយនឹងឈានដល់ទីបញ្ចប់នៅថ្ងៃចន្ទទី១៣ឧសភាដើមសប្តាហ៍ក្រោយនេះហើយ បន្ទាប់ពីបានចាប់ផ្តើមកាលពីថ្ងៃទី២៩មេសា។
សម្រាប់គណបក្សសង្គ្រោះជាតិ ការចូលរួមក្នុងការបោះឆ្នោតនេះបានធ្វើឡើងដោយមិនអស់ចិត្ត ពីព្រោះការទាមទាររបស់ខ្លួនឲ្យប្តូរសមាសភាព គ.ជ.ប ឲ្យពិនិត្យបញ្ជីឈ្មោះអ្នកបោះឆ្នោតឡើងវិញ និងឲ្យលោកសម រង្ស៊ី បានចូលរួមការបោះឆ្នោត មិនបានទទួលលទ្ធផលឡើយ។ ការប្រកាសស្វាគមន៍របស់លោកនាយករដ្ឋមន្ត្រី ហ៊ុន សែន ចំពោះបក្សប្រឆាំងបានធ្វើឡើងខណៈដែលគូប្រជែងដ៏សំខាន់ម្នាក់របស់លោកអវត្តមានពីទីលានប្រកួត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ