បណ្តាកោះមហាសមុទ្រប៉ាស៊ីហ្វិករងអាសន្ន ដោយការកើនកម្ពស់ទឹកសមុទ្រ អំពាវនាវរកជំនួយ
នៅថ្ងៃពុធនិងថ្ងៃព្រហស្បតិ៍នេះ រដ្ឋនានាស្ថិតតាមបណ្តាកោះតំបន់អូសេអានី នៅមហាសមុទ្រប៉ាស៊ីហ្វិក បានប្រជុំគ្នានៅកោះកូរ៉ Koror ក្នុងរដ្ឋMicronésie បានពិភាក្សាគ្នា ក្នុងវេទិកាកោះប៉ាស៊ីហ្វិក លើកទី៤៥ ដើម្បីរកវិធានការការពារកោះទាំងនេះ ប្រឈមនឹងការកើនកម្ពស់ទឹកសមុទ្រ។កម្ពស់ទឹកសមុទ្រអាចនឹងធ្វើអោយលិចលង់កោះនានា ពន្លិចរដ្ឋទាំងឡាយ ក្នុងតំបន់អូសេអានី អោយបាត់ស្រមោលពីផែនទី ក្នុងពេលអនាគត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ក្នុងវេទិកាកោះប៉ាស៊ីហ្វិក លើកទី៤៥ នៅមីក្រូណេស៊ី រដ្ឋទាំង១៦នៃតំបន់អូសេអានី បាន អំពាវនាវប្រទេសឧស្សាហកម្មនានា អោយចូលរួមដោះស្រាយបញ្ហាកើនកំពស់ទឹកសមុទ្រ ដែលកំពុងគំរាមពន្លិចបណ្តាកោះនៅមហាសមុទ្រប៉ាស៊ីហ្វិក កាន់តែខ្លាំងឡើង ពីមួយឆ្នាំទៅមួយឆ្នាំ។ ជាក់ស្តែង ក្នុងរដ្ឋវ៉ាន័រទូ Vanuatu អាជ្ញាធរបានជម្លៀសភូមិមួយរួចទៅហើយ ហើយអាកាសយានដ្ឋានទៀតសោត លែងប្រើការបានទៀត ដោយសារតែកំពស់ទឹកសមុទ្រចេះតែឡើងខ្ពស់។ លើសពីនេះ រដ្ឋវ៉ាន័រទូ ក៏រងព្យុះធំៗញឹកញាប់ដែរ។
ងាកទៅប្រជុំកោះ ប៉ាឡាវ Palaos វិញ តែក្នុង២ឆ្នាំប៉ុណ្ណោះ កោះPalaos បានរងគ្រោះដោយព្យុះសង្ឃរាធំៗដល់ទៅ២ដង។ កោះប៉ាឡាវ មិនដែលរងគ្រោះបែបនេះទេ ក្នុង២០ឆ្នាំកន្លងមក។ រដ្ឋណូរុ Nauru កំពុងចង់សាងសង់ឆ្នេរដែលលិចបាត់ និងធ្វើទំនប់ការពារខ្លួនឡើងវិញ។ យោងតាមប្រធានកោះប៉ាឡាវ ហេតុការណ៍ទាំងនេះ គឺមិនមែនបណ្តាលមកពីការកើនកំពស់ទឹកសមុទ្រតែ មួយមុខទេ វាក៏បណ្តាលមកពី ការកើនកំដៅសីតុណ្ហភាពនៃភពផែនដីដែរ។ ហើយប្រទេសដែលទទួលខុសត្រូវនោះ គឺបណ្តាប្រទេសឧស្សាហកម្ម ប្រទេសអភិវឌ្ឍន៍ទាំងនោះឯង ព្រោះថា ប្រជាជននៅតាមប្រទេសអភិវឌ្ឍន៍ជាអ្នកចូលរួមបង្កការកើនកំដៅសីតុណ្ហភាពផែនដី។ បណ្តារដ្ឋស្ថិតតាមកោះប៉ាស៊ីហ្វិក ក្នុងតំបន់អូសេអានី បានអំពាវនាវអោយប្រទេសឧស្សាហកម្ម ខិតខំគិតគូរដល់បរិស្ថាន និងចូលរួមជួយការពារ រកវិធានការប្រឈមនឹងការគំរាមកំហែងនៃបាតុភូតធម្មជាតិទាំងនេះ។
បណ្តារដ្ឋតំបន់អូសេអានី ភ័យខ្លាចថា ដោយសារការកើនឡើងកំពស់ទឹកសមុទ្រ អាជ្ញាធរត្រូវជម្លៀសប្រជាជនចេញពីតំបន់ ដូច្នេះ ដីធ្លី ធនធានវប្បធម៌ដែលមានតាំងពីប្រវត្តិសាស្ត្រយូរលង់មក អាចនឹងរងការបាត់បង់។ លើសពីនេះទៀត ប្រជាជនតំបន់កោះ មិនចង់ចាកចេញពីដីដូនតារបស់ខ្លួននោះទេ ពួកគេសុខចិត្តស្លាប់នៅប្រទេសកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ