កិច្ចប្រជុំអន្តរជាតិស្តីពីការទប់ស្កាត់ការកើនកំដៅនៃភពផែនដី
តើនៅថ្ងៃពុធនេះ តំណាងប្រទេស១៩៥ បានជួបប្រជុំគ្នា នៅទីក្រុងBonn ប្រទេសអាល្លឺម៉ង់ ក្រោមអធិបតីភាពរបស់អង្គការសហប្រជាជាតិ ដើម្បីវាយតម្លៃថា តើប្រទេសនិមួយៗអាចធ្វើអ្វីបានខ្លះ ក្នុងការទប់ស្កាត់ការកើនសីតុណ្ហភាពនៃភពផែនដី។ កិច្ចប្រជុំអន្តរជាតិនេះនឹងធ្វើរហូតដល់ថ្ងៃ១៥មិថុនា ស្ថិតក្នុងក្របខណ្ឌនៃកិច្ចពិភាក្សា ធ្វើយ៉ាងណាសម្រេចអោយបានកិច្ចព្រមព្រៀងអន្តរជាតិមួយ នៅចុងឆ្នាំ២០១៥ ដើម្បីអនុវត្តសកម្មភាពកាត់បន្ថយឧស្ម័នផ្ទះកញ្ចក់ ចាប់ពីឆ្នាំ២០២០ទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
កិច្ចប្រជុំអន្តរជាតិស្តីពីអាកាសធាតុនៅក្រុងបន ប្រទេសអាល្លឺម៉ង់ដែលបើកធ្វើនៅថ្ងៃពុធម្សិលមិញ មានទិសដៅវាយតម្លៃ ពីវិធានាការទប់ស្កាត់ការកើនកំដៅសីតុណ្ហភាពក្នុងភពផែនដី ដែលប្រទេសនិមួយៗអាចធ្វើចាប់ពីពេលនេះ រហូតដល់ឆ្នាំ២០២០។ កាលពីថ្ងៃចន្ទ ប្រធានាធិបតីអាមេរិកបានប្រកាសពីបទដ្ឋានថ្មីៗរបស់អាមេរិក ចំពោះបណ្តារោងចក្រអគ្គិសនី ដែលគ្រប់គ្រងឧស្ម័នផ្ទះកញ្ចក់១ភាគ៣ នៅសហរដ្ឋអាមេរិក។ ប្រៀបនឹងឆ្នាំ២០០៥ អាមេរិកចង់បន្ថយឧស្ម័នកាបូនិក អោយបាន៣០ភាគរយ ពីពេលនេះរហូតដល់ឆ្នាំ២០៣០។ គួររំលឹកថា ឧស្ម័នផ្ទះកញ្ចក់ ចេញមកពីឧស្សហកម្មធ្យូងថ្ម គឺជាប្រភពចំបងនៃការកើនសីតុណ្ហភាពភពផែនដី។
កន្លងមក អ្នកជំនាញអាកាសធាតុធ្លាប់រំពឹងថា ការកើនកំដៅសីតុណ្ហភាពនេះ អាចធ្វើអោយពិភពលោកប្រឈមនឹងអសន្តិសុខផ្នែកចំណីអាហារ គ្រោះធម្មជាតិ ហើយអាចធ្វើអោយមានសង្គ្រាមកើតឡើងទៀតផង។
នៅចុងឆ្នាំ២០១៥ ក្រុងប៉ារីសនឹងរៀបចំកិច្ចប្រជុំអន្តរជាតិ ស្តីពីអាកាសធាតុ មានទិសដៅសម្រេចអោយបានកិច្ចព្រមព្រៀង តំរូវអោយគ្រប់ប្រទេសកាត់បន្ថយឧស្ម័នផ្ទះកញ្ចក់ ហើយការអនុវត្តន៍កិច្ចព្រមព្រៀងនេះ នឹងចាប់ធ្វើនៅឆ្នាំ២០២០។ ការអនុវត្តន៍សម្រាប់ឆ្នាំ២០២០ មានទិសដៅអោយភពផែនដីឡើងកំដៅបានត្រឹមតែ២អង្សា ប្រៀបនឹងការរំពឹងទុកបច្ចុប្បន្ន ដែលថា ការកើនឡើងនៃឧស្ម័នផ្ទះកញ្ចក់ អាចនាំអោយផែនដីឡើងកំដៅរហូតដល់៤អង្សា។
ក្នុងកិច្ចប្រជុំនៅក្រុងបន ថ្ងៃពុធនេះ សហភាពអឺរ៉ុប បានទទូចអោយគ្រប់ប្រទេស មានមហិច្ឆតាខ្ពស់ ចាត់វិធានការ អោយបានច្រើនថែមទៀត នៅមុនឆ្នាំ២០២០។
សហភាពអឺរ៉ុបរំពឹងថា នឹងធ្វើសកម្មភាពបានប្រសើរជាងទិសដៅឆ្នាំ២០២០។ សហភាពអឺរ៉ុបគិតថា ប្រៀបនឹងឆ្នាំ១៩៩០ អឺរ៉ុបអាចកាត់បន្ថយឧស្ម័នផ្ទះកញ្ចក់បាន២៤ភាគរយ។ ការរំពឹងទុកនេះ ខ្ពស់ជាងទិសដៅឆ្នាំ២០២០ ដែលសហភាពអឺរ៉ុបសន្យាកាត់បន្ថយឧស្ម័នផ្ទះកញ្ចក់បានត្រឹម២០ភាគរយនោះ។
ក្នុងកិច្ចពិភាក្សានៅអាល្លឺម៉ង់ពេលនេះ គ្រប់ប្រទេសត្រូវជជែកគ្នាថា តើវិធានការដែលអាចធ្វើ ទប់ស្កាត់ការកើនកំដៅសីតុណ្ហភាពនោះ អាចឆ្លើយតបតាមទិសដៅសេដ្ឋកិច្ចបានទេ? ហើយបណ្តាប្រទេសឧស្សាហកម្មធំៗ ត្រូវចាត់វិធានការហិរញ្ញវត្ថុបែបណាដែរ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ