ជាជាងទិញពីអាមេរិក ឥណ្ឌាសម្រេចបញ្ជាទិញមីស៊ីលពីអ៊ីស្រាអែល
ទីក្រុងញូវដេលី បានបង្ហាញឲ្យដឹងនៅថ្ងៃអាទិត្យទី ២៦ តុលាថា ខ្លួននឹងទិញមីស៊ីលបាញ់រថក្រោះ ជាច្រើនពាន់ដើមពីប្រទេសអ៊ីស្រាអែល។ នៅក្នុងយុទ្ធសាស្រ្តធ្វើទំនើបកម្មសព្វាវុធឲ្យកងទ័ពរបស់ខ្លួន ឥណ្ឌាបានសម្រេចជ្រើសរើសអ៊ីស្រាអែលជាអ្នកផ្គត់ផ្គង់ ដោយបោះចោលសំណើលក់មីស៊ីលរបស់អាមេរិក។
ចុះផ្សាយនៅថ្ងៃ៖
ស្តាប់ - ០១:៥៥
រដ្ឋាភិបាលជាតិនិយម របស់លោកនាយករដ្ឋមន្រ្តីឥណ្ឌា ណារិនដ្រា មូឌីបានសម្រេចទិញមីស៊ីល ៨២៥៦ ដើម និងជើងទ្រសម្រាប់បាញ់មីស៊ីលចំនួន ៣២១ ពីប្រទេសអ៊ីស្រាអែល។ សេចក្តីសម្រេចបានធ្វើឡើងនៅក្នុងកិច្ចប្រជុំមួយ កាលពីយប់ថ្ងៃសៅរ៍ម្សិលមិញ ក្រោមអធិបតីរបស់រដ្ឋមន្រ្តីការពារជាតិឥណ្ឌា។
ឥណ្ឌាដែលទិញ នាំអាវុធចូលច្រើនជាងគេ នៅក្នុងពិភពលោក។ ឥណ្ឌា ដែលមានជម្លោះព្រំដែនជាប់ជាប្រចាំជាមួយប្រទេសជិតខាង ដូចជាចិន និងប៉ាគីស្ថានបានចាប់ផ្តើមនយោបាយធ្វើទំនើបកម្មសព្វាវុធរបស់កងទ័ព ដែលភាគច្រើន មានអាយុតាំងពីសម័យសហភាពសូវៀត។ ប៉ុន្តែ ដោយសារតែអំពើពុករលួយកើតមានច្រើនពេក រដ្ឋាភិបាលឥណ្ឌាបានផ្អាកកិច្ចព្រមព្រៀងទិញអាវុធមួយរយៈ មុននឹងចាប់ផ្តើមជាថ្មី នៅក្នុងរដ្ឋាភិបាលថ្មីរបស់លោកនាយករដ្ឋមន្រ្តីមូឌី។
យោងតាមមន្រ្តីយោធាឥណ្ឌាម្នាក់ដែលសុំមិនបញ្ចេញឈ្មោះ ប៉ុន្តែ ដកស្រង់សំដីដោយទីភ្នាក់ងារបារាំងAFP ក្រុមប្រឹក្សាយោធាបានសម្រេច ថវិកាប្រមាណ ៨០០ពាន់លានរូពី សម្រាប់កម្មវិធីបំពាក់អាវុធឲ្យកងទ័ពឥណ្ឌា។ នៅក្នុងនោះ គេបានសម្រេចផងដែរ ថា នឹងទិញមីស៊ីលបាញ់រថក្រោះពីប្រទេសអ៊ីស្រាអែល។ តាមប្រភពមួយទៀត ពីកងទ័ពឥណ្ឌា នៅក្នុងកិច្ចព្រមព្រៀងជាមួយអាមេរិក ស្តីពីសហប្រតិបត្តិការរវាងឥណ្ឌា និងអាមេរិក ទីក្រុងវ៉ាស៊ីនតោនធ្លាប់បានស្នើឲ្យឥណ្ឌាទិញមីស៊ីលអាមេរិក ឈ្មោះ Javelin ។ ប៉ុន្តែ ឥណ្ឌាបានសម្រេចជ្រើសរើសមីស៊ីលអ៊ីស្រាអែលវិញ ដោយយោងទៅលើហេតុផលបច្ចេកទេស ព្រោះថា កាលពីឆ្នាំទៅ ឥណ្ឌាបានទទួលជោគជ័យក្នុងការសាកល្បងមីស៊ីលអ៊ីស្រាអែល។
នៅក្នុងកិច្ចប្រជុំកាលពីល្ងាចថ្ងៃសៅរ៍ម្សិលមិញ កងទ័ពឥណ្ឌា បានសម្រេចផងដែរថា នឹងចំណាយថវិកាប្រមាណ ៨ពាន់លានដុល្លារ ដើម្បី សាងសង់នាវាមុជទឹកនៅក្នុងស្រុក ដោយមានការចូលរួមពីក្រុមហ៊ុនវិនិយោគបរទេស ដែលនៅក្នុងនោះ មានតាំងពីបារាំង រុស្ស៊ី អេស្ប៉ាញ និងអាល្លឺម៉ង់។ នេះបើយោងតាមការចុះផ្សាយរបស់កាសែតឥណ្ឌាHindustan Times។
ជាមួយនឹងទិសដៅជំរុញការសាងសង់ ផលិតសព្វាវុធ ក្នុងស្រុក រដ្ឋាភិបាលឥណ្ឌាបានកាត់បន្ថយ ជិតពាក់កណ្តាល សិទ្ធិវិនិយោគ របស់ក្រុមហ៊ុនបរទេសនៅក្នុងឧស្សាហកម្មផលិតសព្វាវុធរបស់ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ