ប៉ាគីស្ថាន និងឥណ្ឌាខឹងគ្នាកាន់តែខ្លាំងឡើងវិញក្នុងរឿងកាស្មៀរ
ប៉ាគីស្ថានបញ្ចេញការព្រមានថ្មីចំពោះឥណ្ឌា។ លើកនេះ ការព្រមានចេញពីមាត់អគ្គមេការកងទ័ព ដែលសន្យាតបតទៅនឹងការឈ្លានពានទាំងឡាយមកលើប្រទេសខ្លួន។ ក្នុងរឿងកាស្មៀរ ទំនាក់ទំនងរវាងប្រទេសជិតខាងគ្នាទាំងពីរ ប្រែជាជូរចត់ឡើងវិញ តែប៉ុន្មានខែ ក្រោយការបោះឆ្នោតតែងតាំងនាយករដ្ឋមន្ត្រីឥណ្ឌា ណារិនដ្រា ម៉ូឌី (Narendra Modi) ដែលជាសញ្ញានៃភាពធូរស្រាលពីដំបូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
«យើងចង់បានសន្តិភាពក្នុងតំបន់» ប៉ុន្តែ«រាល់អំពើឈ្លានពានណាមួយនឹងត្រូវតបតទៅវិញយ៉ាងស័ក្តិសម»។ តែមួយដង្ហើមប៉ុណ្ណោះ ដែលអគ្គមេបញ្ជាការកងទ័ពប៉ាគីស្ថាន រ៉ាហ៊ីល សារីហ្វ (Raheel Sharif) ថ្លែងដូច្នេះ កាលពីថ្ងៃសៅរ៍ នៅចំពោះមុខទាហានរើសថ្មី។ ការគំរាមនេះគឺសំដៅឥណ្ឌា ដែលជាសត្រូវប្រវត្តិសាស្ត្រជាប់ព្រំដែនគ្នា។
ភាពតានតឹងរវាងប្រទេសទាំងពីរបានកើនឡើងខ្លាំង ក្នុងប៉ុន្មានសប្តាហ៍ចុងក្រោយនេះ។ ការបាញ់គ្នាលាន់រន្ថាន់ តាមព្រំដែនតំបន់កាស្មៀរ។ តំបន់នេះហើយ ដែលប្រទេសទាំងពីរឈ្លោះដណ្តើមគ្នា និងដែលបានបង្កសង្គ្រាមពីរដងកន្លងទៅ។ ប្រជាជនប្រហែល២០នាក់ត្រូវបានគេសម្លាប់ ចាប់តាំងពីដើមខែនេះ ហើយរាប់ពាន់នាក់ផ្សេងទៀតបានភៀសខ្លួនចេញពីភូមិស្រុករបស់ខ្លួន៖ ព្រឹត្តិការណ៍មិនធ្លាប់មាន ក្រោយពីមានកិច្ចព្រមព្រៀងឈប់បាញ់គ្នានៅឆ្នាំ២០០៣។
សម្ដីអគ្គមេបញ្ជាការកងទ័ពប៉ាគីស្ថាន ជារំពងសំឡេងរបស់រដ្ឋាភិបាល ដែលបានកើតឡើងតាំងពីប៉ុន្មានសប្តាហ៍មកហើយ។ នេះជាការប្តូរភាសានិយាយ បើធៀបទៅនឹងប៉ុន្មានខែក្រោយការបោះឆ្នោតជ្រើសតាំងនាយករដ្ឋមន្ត្រីឥណ្ឌា ណារិនដ្រា ម៉ូឌី (Narendra Modi) កាលពីនិទាឃរដូវមុន។ អំឡុងពេលនោះ មេដឹកនាំនៃប្រទេសទាំងពីរដូចជាចង់រាប់រកគ្នា ច្រើនជាងធ្វើសង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ