កិច្ចសហប្រតិបត្តិការ ដ៏មានមហិច្ឆតា និងកាន់តែធំ រវាងអាមេរិក និងឥណ្ឌា
បន្ទាប់ពីទស្សនកិច្ចបីថ្ងៃនៅក្នុងទីក្រុងញូវយ៉ក នាយករដ្ឋមន្រ្តីឥណ្ឌាលោក នរិន្ទ្រ ម៉ូឌី ត្រូវបានទទួលការស្វាគមន៍យ៉ាងកក់ក្តៅពីលោក បារ៉ាក់ អូបាម៉ា នៅសេតវិមាននៅថ្ងៃអង្គារនេះ។ ប្រមុខរដ្ឋទាំងពីរ បានបង្ហាញបំណងរួមក្នុងការសម្រេចបាននូវកិច្ចសហប្រតិបត្តិការ ដ៏មានមហិច្ឆតា និងកាន់តែធំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នាយករដ្ឋមន្រ្តីឥណ្ឌា ម៉ូឌី បានជួបលោកប្រធានាធិបតីអាមេរិក អូបាម៉ា កាលពីយប់ថ្ងៃចន្ទម្តងហើយ នៅឯសេតវិមាន នៅក្នុងអាហារពេលល្ងាច ដោយមានការចូលរួមពីថ្នាក់ដឹកនាំ ចំនួនប្រហែលម្ភៃនាក់ ដែលក្នុងនោះរួមមានវត្តមានផងដែររបស់ លោក រដ្ឋលេខាធិការ ចន ឃែរី និង រដ្ឋមន្រ្តីក្រសួងការបរទេស ឥណ្ឌា ស៊ូស្មា ស្វារាច៍។
ក្នុងសេចក្តីប្រកាសរួមដែលត្រូវបានបោះពុម្ពផ្សាយក្នុងកាសែតវ៉ាស៊ីនតោនបុស្តិ៍ កាលពីព្រឹកថ្ងៃអង្គារ បន្ទាប់ពីជំនួបនេះ ប្រមុខរដ្ឋទាំងពីរ បានបង្ហាញបំណងរួម ក្នុងការរឹតចំណងដែលមានស្រាប់ និងពង្រីកសហប្រតិបត្តិការលើវិស័យសំខាន់ៗដូចជា វិស័យយោធា វិស័យស្រាវជ្រាវវិទ្យាសាស្រ្ត ការរុករកក្នុងលំហអាកាស កិច្ចសហប្រតិបត្តិការក្នុងការធ្វើពាណិជ្ជកម្ម វិនិយោគ និងបច្ចេកវិទ្យា និងការចូលរួម ធ្វើសុខដុមកម្មជាមួយនឹងរបៀបវារៈអភិវឌ្ឍន៍របស់ប្រទេសឥណ្ឌា ខណៈពេលដែលសហរដ្ឋអាមេរិក ជាក្បាលម៉ាស៊ីននៃកំណើនសេដ្ឋកិច្ចពិភពលោក។ ក្នុងសេចក្តីប្រកាសរួមដដែលនោះ ប្រមុខរដ្ឋទាំងពីរ ក៏បានគូសបញ្ជាក់ពីកម្មវត្ថុនៃកិច្ចពិភាក្សានៅថ្ងៃអង្គារនេះ ថានឹងផ្តោតទៅលើរបៀប ក្នុងការធ្វើយ៉ាងណា ដើម្បីអាចបង្កើនផលិតកម្ម និងពង្រីកការផលិតថាមពលកកើតឡើងវិញ ក្នុងតំលៃសមរម្យ ដើម្បីធានាឲ្យបានពីចីរភាពនៃបរិស្ថានរួមទៅថ្ងៃអនាគត។ ថែមលើនេះ គឺការពិភាក្សា លើរបៀបដែលពាណិជ្ជករ អ្នកវិទ្យាសាស្រ្ត និងរដ្ឋាភិបាលនៃប្រទេសទាំងពីរអាចសហការគ្នាដើម្បីកែលម្អគុណភាព អាចជឿជាក់បាន និងការមានសេវាជាមូលដ្ឋាន ជាពិសេសសម្រាប់ប្រជាពលរដ្ឋក្រីក្របំផុតក្នុងក្របខ័ណ្ឌនៃយុទ្ធនាការ អនាម័យរបស់ឥណ្ឌា។
កិច្ចសហប្រតិបត្តិការនេះ គឺផ្អែកលើគោលការណ៍ ដែលថាឥណ្ឌា និងអាមេរិក មានគោលការណ៍ដូចគ្នា និង ផលប្រយោជន៍ទៅវិញទៅមក។ ហើយការខិតខំប្រឹងប្រែងរួម និងកិច្ចសហការនេះនឹងអាចចូលរួមកំណត់ ពីការលើកស្ទួយសន្តិសុខ និងសន្តិភាពអន្តរជាតិ នាពេលអនាគត។
ទាំងនេះគឺជាអ្វីដែលមានក្នុងសេចក្តីប្រកាសរួមរបស់លោក ម៉ូឌី និង លោកអូបាម៉ា ដែលត្រូវបានបោះផ្សាយ ក្នុងកាសែតវ៉ាស៊ីនតោនបុស្តិ៍កាលពីព្រឹកថ្ងៃអង្គារ។ សេចក្តីពិស្តារ និងការបញ្ជាក់បន្ថែម នឹងធ្វើឡើងដោយប្រមុខរដ្ឋទាំងពីរនៅសេតវិមាន បន្ទាប់ពីកិច្ចពិភាក្សានៅថ្ងៃអង្គារនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ