អ្នកសារព័ត៌មានបារាំង២រូបជាប់ឃុំនៅឥណ្ឌូណេស៊ី ជាប់សង្ស័យថាឃោសនាប្រឆាំងរដ្ឋអំណាចក្រុងJakarta
អ្នកសារព័ត៌មានបារាំង២រូប ដែលជាប់ឃុំនៅឥណ្ឌូណេស៊ីមួយសប្តាហ៍មកនេះ ជាប់សង្ស័យពីបទធ្វើការឃោសនាប្រឆាំងរដ្ឋាភិបាលឥណ្ឌូណេស៊ី។ នេះបើយោងតាមការប្រកាសរបស់ប៉ូលិសឥណ្ឌូណេស៊ី ថ្ងៃពុធនេះ។ នៅថ្ងៃព្រហស្បតិ៍និងថ្ងៃសុក្រនេះ មន្ត្រីស្ថានទូតបារាំងនៅឥណ្ឌូណេស៊ី ត្រូវចុះទៅមើលស្ថានភាពអ្នកសារព័ត៌មានទាំង២រូប នៅពន្ធនាគារ។ អាជ្ញាធរបារាំងកំពុងតែរកដំណោះស្រាយជាមួយអាជ្ញាធរឥណ្ឌូណេស៊ី។
ចុះផ្សាយនៅថ្ងៃ៖
ស្តាប់ - ០១:៥០
គួររំលឹកថា អ្នកសារព័ត៌មានបារាំងទាំង២រូប គឺលោកតូម៉ា ដង់ឌ័រ និងលោកស្រី វ៉ាឡង់ទីន បួរ៉ា ជាអ្នកបំរើការអោយទូរទស្សន៍រួមគ្នារវាងបារាំងនិងអាល្លឺម៉ង់ ឈ្មោះថា Arte។ អ្នកទាំង២ បានប្រើវីសាទេសចរ ធ្វើដំណើរមកឥណ្ឌូណេស៊ី ដើម្បីធ្វើបទយកការណ៍អោយទូរទស្សន៍Arte។ អាជ្ញាធរឥណ្ឌូណេស៊ីបានចាប់ខ្លួនអ្នកសារព័៍ត៌មានបារាំងទាំង២នេះ កាលពីថ្ងៃ៦សីហា ក្នុងពេលពួកគេកំពុងបំពេញការងារយកព័ត៌មាន ទាក់ទងនឹងក្រុមឧទ្ទាមផ្តាច់ទឹកដីនិយម ក្នុងខេត្តប៉ាពូអាស៊ី។ អាជ្ញាធរចោទប្រកាន់ផ្លូវការថា ពួកគេទាំង២រំលោភលើច្បាប់អន្តោប្រវេសន៍ ព្រោះពួកគេប្រហែលជាធ្វើការខុសច្បាប់។
នៅថ្ងៃពុធនេះ ប៉ូលិសក្នុងស្រុកបានប្រាប់ថា ក្រៅពីបទចោទប្រកាន់នេះ អ្នកសារព័ត៌មានបារាំងទាំង២ក៏ជាប់សង្ស័យដែរថា បានជួយអោយមនុស្សនានាធ្វើសកម្មភាពក្បត់ជាតិឥណ្ឌូណេស៊ី។ ទោះយ៉ាងនេះក្តី យោងតាមប៉ូលិសក្នុងស្រុក ការស៊ើបអង្កេតលើអ្នកសារ ព័ត៌មានបារាំង នៅបន្តធ្វើនៅឡើយ មិនទាន់ឈានដល់ដំណាក់កាលអង្កេតចុងក្រោយទេ។ ពេលនេះ អ្នកសារព័ត៌មានបារាំងទាំង២ កំពុងជាប់ឃុំនៅក្រុងចាយ៉ាពូរ៉ា ក្នុងខេត្តប៉ាពូអាស៊ី។ គេពុំទាន់ដឹងថា តើពួកគេត្រូវជាប់ឃុំយូរប៉ុណ្ណាទៀតទេ។ អាជ្ញាធរបារាំងកំពុងទាក់ទងអាជ្ញាធរឥណ្ឌូណេស៊ី រកដំណោះស្រាយ។
មុនត្រូវបានចាប់ខ្លួន លោកតូម៉ា ដង់ឌ័រ និងលោកស្រី វ៉ាឡង់ទីន បួរ៉ា បានជួបជាមួយពួកឧទ្ទាមមកពីបណ្តាភ្នំភាគកណ្តាលខេត្តប៉ាពូអាស៊ី ក្នុងសង្កាត់មួយឈ្មោះថា ឡាន់នី ចាយ៉ា។ នៅសង្កាត់នេះ ធ្លាប់មានពួកឧទ្ទាមផ្តាច់ទឹកដី៥នាក់ ស្លាប់ក្នុងការប្រយុទ្ធជាសមួយយោធា។ មុននេះដែរ ប៉ូលិស២នាក់ត្រូវបានស្លាប់ ក្រោយបានជាប់អន្ទាក់របស់ពួកឧទ្ទាម។
ក្រុមឧទ្ទាមផ្តាច់ទឹកដីនិយម មានដើមកំណើតមកពីតំបន់កោះមេឡាណេស៊ី ជាតំបន់សំបូរធនធានធម្មជាតិ។ ច្រើនឆ្នាំមកនេះ ក្រុមឧទ្ទាមតស៊ូប្រឆាំងនឹងរដ្ឋាភិបាលឥណ្ឌូណេស៊ី។ ពួកគេចោទកងទ័ពឥណ្ឌូណេស៊ីថា រំលោភសិទ្ធិមនុស្ស ប្រឆាំងជនស៊ីវិលក្នុងខេត្តប៉ាពូអាស៊ី ហើយប្រព្រឹត្តអំពើពុករលួយក្នុងប្រតិបត្តិការជីករ៉ៃ និងកាប់ឈើខុសច្បាប់ ខណៈប្រជាជនទីនោះ មានជីវភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ