រដ្ឋាភិបាល បក្សប្រឆាំង និងសង្គមស៊ីវិលប្រារព្ធទិវាសិទ្ធិមនុស្សអន្តរជាតិក្រោមប្រធានបទផ្សេងៗគ្នាក្នុងរាជធានី ភ្នំពេញ
សាលារាជធានីភ្នំពេញ គណបក្សប្រឆាំង និងក្រុមអង្គការសង្គមស៊ីវិល នឹងប្រារព្ធទិវាសិទ្ធិមនុស្សអន្តរជាតិ នៅទីតាំង៤កន្លែងផ្សេងគ្នា ក្នុងទីក្រុងភ្នំពេញ នៅថ្ងៃ១០ធ្នូខាងមុខនេះ។ ទីតាំងទាំង៤កន្លែងនោះ សម្រាប់សង្គមស៊ីវិលធំៗ ជិត ២០០ ស្ថាប័ន នឹងប្រារព្ធទិវានេះនៅបរិវេណវត្តភ្នំ ហើយសម្រាប់រដ្ឋាភិបាលធ្វើវេទិការអបអរពិធីនេះ នៅកោះពេជ្រ ខណៈដែលសាលារាជធានីភ្នំពេញធ្វើនៅស្តាតអូឡាំពិក និងគណបក្សប្រឆាំងរៀបចំធ្វើនៅទីលានប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៥៦
បើមិនមានការប្រែប្រួល ទិវាសិទ្ធិមនុស្សអន្តរជាតិ១០ធ្នូ ឆ្នាំ២០១៣នេះ ដែលគេនឹងប្រារព្ធធ្វើឡើង នឹងមានភាពរស់រវើក និងអធឹកអធមជាងបណ្តាឆ្នាំកន្លងទៅ នៅក្នុងទីក្រុងភ្នំពេញ។
លោក សួន ប៊ុនស័ក្តិប្រធានក្រុមលេខាធិការគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិកម្ពុជា ដែលបានចូលរួមប្រជុំ ជាមួយអាជ្ញាធរក្រុង បានបញ្ជាក់ថា បន្ទាប់ពីកិច្ចប្រជុំដ៏តានតឹងរយៈពេល ៣ ម៉ោង កាលពីរសៀលថ្ងៃទី៥ធ្នូម្សិលមិញរួចមក សាលារាជធានីភ្នំពេញ បានអនុញ្ញាតឲ្យសម្ព័ន្ធអង្គការសង្គមស៊ីវិលធំៗជិត ២០០ ស្ថាប័ន ប្រារព្ធពិធីសាទរទិវាសិទ្ធិមនុស្សអន្តរជាតិ ថ្ងៃ១០ធ្នូ នៅបរិវេណវត្តភ្នំ។ លោកបន្តថា នៅពិធីជួបជុំនោះអាជ្ញាធរ មិនអនុញ្ញាតឲ្យសង្គមស៊ីវិល ដើរហែរក្បួនសិទ្ធិមនុស្ស ដូចរៀងរាល់ឆ្នាំឡើយ។ បើតាមលោក ប៊ុនស័ក្តិ សម្រាប់សង្គមស៊ីវិលដែលប្រារព្ធទិវាសិទ្ធិមនុស្សឆ្នាំនេះ គឺក្រោមប្រធានបទ “យើងទាំងអស់គ្នាធ្វើការដើម្បីលើកកម្ពស់ និងការពារយុត្តិធម៌។
ចំណែក លោក ហូរ វ៉ាន់ តំណាងរាស្ត្រគណបក្សសង្គ្រោះជាតិមណ្ឌលភ្នំពេញ បានថ្លែងថា សាលារាជធានីភ្នំពេញបានអនុញ្ញាតផ្តល់ទីលានប្រជាធិបតេយ្យឲ្យគណបក្សសង្គ្រោះជាតិរៀបចំអបអរទិវាសិទ្ធិមនុស្សអន្តរជាតិ១០ធ្នូ។ លោកថ្លែងថា នឹងមានមនុស្សចូលរួមប្រមាណ១៥០០០នាក់ នៅទីលានប្រជាធិបតេយ្យ ក្នុងគោលដៅទាមទារឲ្យមានការគោរពសិទ្ធិមនុស្សពិតប្រាកដនៅកម្ពុជា។ ហើយបន្ទាប់មកនឹងមានការហែរក្បួនដោយមានការកំណត់ចំនួនមនុស្ស ដើរឆ្ពោះទៅរដ្ឋសភាដើម្បីដាក់ញ្ញត្តិ។
ដោយឡែកនៅឆ្នាំនេះ អាជ្ញាធររាជធានីភ្នំពេញ ក៏នឹងប្រារព្ធទិវាសិទ្ធិមនុស្សអន្តរជាតិ ថ្ងៃ១០ធ្នូ ជាលើកដំបូង ក្នុងអាណត្តិរបស់លោក ប៉ា សុជាតិវង្ស។
លោក ឡុង ឌីម៉ង់ អ្នកនាំពាក្យសាសារាជភ្នំពេញបានថ្លែងថា សាលារាជធានីភ្នំពេញដោយមានការចូលរួមសហការជាមួយអង្គការ-សមាគមន៏ជាង៤០ នឹងប្រារព្ធទិវាសិទ្ធិមនុស្សអន្តរជាតិ១០ធ្នូ នៅពហុកីឡាដ្ឋានជាតិអូឡាំពិក ក្រោមប្រធានបទ“ការពង្រឹងសិទ្ធិលំនៅដ្ឋាន ជាចម្បង" ដោយមានអ្នកចូលរួមប្រមាណជាង៥០០នាក់។ លោកបន្តថា សម្រាប់ទិវានេះ រដ្ឋាភិបាលក៏បានរៀបចំធ្វើផងដែរនៅមជ្ឈមណ្ឌលកោះពេជ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ