លោកវ៉ា គឹមហុង៖ "ការបើកច្រកព្រំដែនអន្តរជាតិស្ទឹងបត់អាចនឹងសម្រេចក្នុងកិច្ចប្រជុំ JBC លើកនេះ"
ចុះផ្សាយនៅថ្ងៃ៖
ស្តាប់ - ១០:០២
ប្រតិភូជាន់ខ្ពស់នៃគណៈកម្មការចម្រុះខណ្ឌសីមាព្រំដែនគោករបស់កម្ពុជាទើបបានចាកចេញពីកម្ពុជា នៅល្ងាចថ្ងៃអាទិត្យ១២កុម្ភៈនេះ ដើម្បីចូលរួមប្រជុំជាមួយភាគីថៃ ស្តីពីការបន្តវាស់វែងព្រំដែន ការស្វែងរកបង្គោលព្រំដែនចាស់ជាដើម។ នេះគឺជាកិច្ចប្រជុំគណៈកម្មការចម្រុះព្រំដែនលើកដំបូង ក្រោយពីប្រទេសថៃមានរដ្ឋាភិបាលថ្មី និងក្រោយពីគណៈកម្មការនេះបានខកខានមិនបានប្រជុំជាង២ឆ្នាំមកហើយ។ នៅក្នុងបទសម្ភាសន៍តាមទូរស័ព្ទជាមួយលាង ដឺលុច អ្នកឆ្លើយឆ្លងព័ត៌មានរបស់វិទ្យុបារាំងអន្តរជាតិ នៅមុនចេញដំណើរ លោកវ៉ា គឹមហុង ទេសរដ្ឋមន្ត្រី និងជាប្រធានដឹកនាំគណៈប្រតិភូនេះ បានអះអាងថា លោកមានសុទិដ្ឋិនិយមចំពោះកិច្ចប្រជុំនេះ ក្នុងការចចារបន្ត ដើម្បីឯកភាពគ្នាលើបង្គោលព្រំដែនមួយចំនួន និងបន្តស្វែងរកបង្គោលព្រំដែនចាស់ថែមទៀត។ លោកវ៉ា គឹមហុងបញ្ជាក់ថា ភាគីទាំងពីរអាចសម្រេចក្នុងការបើកច្រកព្រំដែនអន្តរជាតិស្ទឹងបត់ក្នុងខេត្តឧត្តរមានជ័យ ដើម្បីសម្រួលដល់ការដឹកទំនិញឆ្លងដែន ដោយទុកព្រំដែនប៉ោយប៉ែតជាព្រំដែនសម្រាប់ទេសចរឆ្លងកាត់តែប៉ុណ្ណោះ។
