អ៊ីរ៉ាក់ ៖ ពួកឧទ្ទាមជីហាតប្រកាសបង្កើតរដ្ឋអ៊ីស្លាម
ចុះផ្សាយនៅថ្ងៃ៖
គ្មានព្រំដែនរវាងស៊ីរី និងអ៊ីរ៉ាក់ទៀតទេ ! គឺមានតែដែនដីអ៊ីស្លាម ដែលបង្រួបបង្រួមអ៊ីស្លាមទាំងអស់នៅលើពិភពលោកក្រោមទង់តែមួយ គឺរដ្ឋអ៊ីស្លាម ! តាមរយៈសារសំឡេងផ្សព្វផ្សាយតាមប្រព័ន្ធអ៊ីនធឺណែត ពួកឧទ្ទាមអ៊ីស្លាមជ្រុលនិយមជីហាត “រដ្ឋអ៊ីស្លាមអ៊ីរ៉ាក់និងឡឺវ៉ង់" (EIIL) បានប្រកាសនៅល្ងាចមិញ បង្កើតរបបនយោបាយអ៊ីស្លាម កាលីហ្វា និងបានអំពាវនាវឱ្យអ្នកគោរពសាសនាអ៊ីស្លាមទាំងអស់ ដើរតាមមេបញ្ជាការ ថ្មី Abou Baker al Baghdadi បងធំទីមួយនៃចលនា EIIL ដែលតាំងខ្លួនជាព្រះចៅកាលីហ្វា តំណាងរបស់មហាម៉េត មកដឹកនាំពិភពអ៊ីស្លាម។
ពួកជីហាតនៃរដ្ឋអ៊ីស្លាមអ៊ីរ៉ាក់និងឡឺវ៉ង់ ដែលកំពុងធ្វើការតស៊ូប្រយុទ្ធនៅក្នុងទឹកដីស៊ីរី និងអ៊ីរ៉ាក់ បានប្រកាសនៅយប់មិញ បង្កើតរបបនយោបាយអ៊ីស្លាម កាលីហ្វា ដែលបានបាត់បង់តាំងពីយូរយារមកហើយ ឱ្យរស់ឡើងវិញ និងបានប្តូរឈ្មោះអង្គការរបស់ខ្លួនទៅជារដ្ឋអ៊ីស្លាម។
រដ្ឋកាលីហ្វា នៅឯណា?
កាលីហ្វា នឹងលាតសន្ធឹងពីក្រុងអាឡេប ភាគខាងជើងប្រទេសស៊ីរី ទៅដល់ភាគខាងកើតអ៊ីរ៉ាក់ ត្រង់តំបន់Diyala ដោយឆ្លងកាត់គ្របយកភាគខាងលិច និងនិរតីអ៊ីរ៉ាក់ ពោលគឺដែនដីដែលពួកឧទ្ទាមជីហាតស៊ីរីនិងឡឺវ៉ង់ បានវាយដណ្តើមបានពីរដ្ឋាភិបាលអ៊ីរ៉ាក់ក្នុងរយៈពេលពីរសប្តាហ៍ចុងក្រោយនេះ និងតំបន់ដែលពួកគេគ្រប់គ្រងនៅស៊ីរី ឬនិយាយបែបផ្សែងគឺសម្រាប់រដ្ឋអ៊ីស្លាម លែងមានហើយព្រំដែនខ័ណ្ឌចែកស៊ីរី និងអ៊ីរ៉ាក់។
នៅក្នុងសារផ្សព្វផ្សាយ កាលីហ្វា ជាក្តីស្រមៃរបស់គ្រប់បណ្តាជនអ៊ីស្លាម និងជាបំណងប្រាថ្នារបស់ពួកជីហាត។ ជាមួយនឹងការប្រកាសបង្កើតរដ្ឋអ៊ីស្លាមកាលីហ្វានេះ ពួកជីហាតបានប្រកូកប្រកាសហៅក្រុមអ្នកអ៊ីស្លាមទាំងអស់ មិនថានៅក្នុងតំបន់ដើមបូព៌ា នៅអាស៊ី នៅអឺរ៉ុបទេឱ្យចូលរូបរួមគ្នា ធ្វើសង្គ្រាមប្រឆាំងនឹងសត្រូវ ដែលគ្មាននរណា ក្រៅពី លទ្ធិប្រជាធិបតេយ្យ ការមិនប្រកាន់ជឿលើសាសនា ជាតិនិយម និងសម្រាមរបស់បស្ខឹមលោកផ្សេងៗទៀត។ នេះបើយើងភាសាដូចដែលអ្នកនាំពាក្យបានប្រើនៅល្ងាចមិញ។
នរណាជាមេដឹកនាំរដ្ឋអ៊ីស្លាមថ្មី ?
ដែនដី ដែននយោបាយកាលីហ្វានឹងត្រូវគ្រប់គ្រងដឹកនាំដោយ មេឧទ្ទាមរដ្ឋអ៊ីស្លាមអ៊ីរ៉ាក់និងឡឺវ៉ង់ (ក្រុមឧទ្ទាមអ៊ីស្លាមជ្រុលនិយមជីហាត EIIL) ឈ្មោះ អាប៊ូ បាក្រ៍ អាល់ បាក់ដាឌី កាលីហ្វ ដែលចាប់ពីពេលនេះតទៅ សម្រាប់ក្រសែភ្នែកសកម្មជនអ៊ីស្លាម គឺព្រះចៅអ៊ីស្លាមជាតំណាងព្យាការីមហាម៉េត) ក្នុងលំហាត់ដឹកនាំប្រទេសដឹកនាំ នយោបាយ ឬនិយាយឱ្យខ្លី គឺមេដឹកនាំអ៊ីស្លាមសម្រាប់ពិភពលោកទាំងមូល។ ជាមនុស្សបង្កប់ដោយភាពចម្លែក កើតនៅឆ្នាំ១៩៧១ បើតាមប្រភពវ៉ាស៊ីនតោន ធ្លាប់ប្រកាសថាស្លាប់ម្តងនៅឆ្នាំ២០០៥ មុននឹងលេចមុខជាថ្មី ក្នុងបណ្តាញអាល់កៃដា នៅឆ្នាំ២០១០។ ជាមេបញ្ជាការប្រកបដោយតាក់តិច និងចុះផ្ទាល់ក្នុងសមរភូមិតែម្តងមិនដូចមេជីហាតមុនៗទេ។
កាលីហ្វា ជាអ្វី ? របបនេះធ្លាប់មានប្រវត្តិពីមុនមកយ៉ាងដូចម្តេចខ្លះ ?
មេដឹកនាំកាលីហ្វា អាចហៅថា ព្រះចៅអ៊ីស្លាម ឬកាលីហ្វ (calife) ត្រូវបានតែងតាំងឡើង ក្រោយមរណភាពរបស់ព្យាការី មាហូម៉េត។ ព្រះចៅអ៊ីស្លាម កាលីហ្វ ចំនួនបួននាក់ដំបូងត្រូវបានតែងតាំងឡើយ ស្នងតំណែងបន្តពីព្យាការីមាហូមេត និងល្បី មានអំណាចខ្ទរខ្ទារខ្លាំង ក្នុងចន្លោះពីឆ្នាំ៦៦១ ដល់ឆ្នាំ១៥១៧ មុនត្រូវរលាយរលត់បាត់ទៅជាមួយនឹងដួលរលំនៃចក្រភពអូតូម៉ង់ នៅឆ្នាំ១៩២៤។
ការប្រកាសបង្កើតរបបកាលីហ្វាឡើងវិញ ពីសំណាក់ពួកឧទ្ទាមអ៊ីស្លាមជ្រុលនិយមជីហាតអ៊ីរ៉ាក់និងឡឺវ៉ង់ EIIL គឺដូចជាកំពុងចង់សើរើបន្ទាត់ព្រំដែនឡើងវិញ។ បន្ទាត់ព្រំដែនក្នុងតំបន់បច្ចុប្បន្ននេះ ត្រូវបានគូសវាសឡើយ ក្រោយការរលំរលាយចក្រភពអូតូម៉ង់ ដោយបានគូសចែកផ្តាចអ៊ីរ៉ាក់ពីស៊ីរី ជាឧទាហរណ៍ជាក់ស្តែងមួយ។ គំនូសខ័ណ្ឌចែកព្រំដែនប្រទេស ជាស្នាដៃរបស់មហាអំណាចអឺរ៉ុប តែពេលនេះ រដ្ឋអ៊ីស្លាម ចង់ប្រកាសមិនទទួលស្គាល់ និងថាមិនអាចយកជាការបាន។
អ្វីខ្លះជាផលវិបាកនៃការប្រកាសបង្កើតរដ្ឋកាលីហ្វ ?
នេះគឺជាការគំរាមកំហែងជ្រុលនិយមប្រកបដោយគ្រោះថ្នាក់ ! យើងអាចនិយាយបានថា ការប្រកាសបង្កើតរដ្ឋអ៊ីស្លាម គឺជាការអបអរនឹងជ័យជំនះយោធា កាលពីពីរសប្តាហ៍មុន ដែលពួកឧទ្ទាមអ៊ីស្លាមជ្រុលនិយមអ៊ីរ៉ាក់និងឡឺវ៉ង់ ធ្វើបានសម្រេចយ៉ាងលឿនដូចរន្ទះ។ ជាមួយនឹងការដណ្តើមបានក្រុងសំខាន់ៗនៅអ៊ីរ៉ាក់ និងកម្លាំងទប់ទល់បាននៅស៊ីរី ក្រុមEIIL ឬរដ្ឋអ៊ីស្លាម ចង់បង្ហាញឥទ្ធិពលរបស់ខ្លួន និង ចង់ឱ្យក្រុមជីហាតផ្សេងទៀត ដូចជាអាល់កៃដា មកចូលជាក្រុមតែមួយ។ ព្រោះក្រុមនេះមានហេតុផលបីយ៉ាង ៖ ពន្លាតដែនដីគ្រប់គ្រង អំណាចយោធា និងហិរញ្ញវត្ថុ ហើយនៅលើវិស័យមនោគមន៍វិជ្ជា គឺបង្កើតរដ្ឋជានិមិត្តរូប កាលីហ្វា។ របបនយោបាយដែលមានគោលការណ៍ស្តារច្បាប់Charia ច្បាប់អ៊ីស្លាមនិយម។
បើតាមអ្នកស្រាវជ្រាវខ្លះ ការប្រកាសរបបកាលីហ្វា គឺជាការអភិវឌ្ឍន៍យ៉ាងសំខាន់ក្នុងរង្វង់ពួកអ៊ីស្លាមជ្រុលនិយមជីហាតអន្តរជាតិ ចាប់ពីថ្ងៃមហាភេរវកម្ម ១១កញ្ញា ២០០១មក។ គ្រប់បណ្តាញ ឬក្រុមអ៊ីស្លាមជ្រុលនិយមស្និទ្ធិនឹងអាល់កៃដា និងចលនាជីហាតឯករាជ្យផ្សេងៗ ត្រូវធ្វើការសម្រេចចិត្ត ជ្រើសរើសការគាំទ្ររដ្ឋអ៊ីស្លាម ឬត្រូវប្រឆាំ។ នេះអាចចាត់ទុកថាពួកជីហាតកំពុងបើកសករាជថ្មីថ្នាក់អន្តរជាតិ តែក៏អាចជាបញ្ហាដ៏គ្រោះថ្នាក់មួយសម្រាប់ចលនាអាល់កៃដា និងភាពជាមេដឹកនាំក្នុងចលនានេះដែរ។ នេះជាបញ្ហាមួយ បញ្ហាមួយទៀត អ្នកវិភាគយល់ឃើញថា ការប្រកាសបង្កើតរដ្ឋអ៊ីស្លាមកាលីហ្វានេះ គឺប្រៀបដូចជាការផ្សាយពាណិជ្ជកម្ម ទាក់ទាញយុទ្ធជនអ៊ីស្លាមពីគ្រប់ទិសទីនៅលើពិភពលោកមកចូលរួម តាំងពីម៉ារ៉ុក ឥណ្ឌូណេស៊ី ឬអឺរ៉ុបទេ ឱ្យមកការពារពិភពអ៊ីស្លាម។ ពិភពដែលកំពុងរងគ្រោះ គឺការវាយបករបស់កងទ័ពអ៊ីរ៉ាក់ ពីការទម្លាក់គ្រាប់បែករបស់កងកម្លាំងយោធាស៊ីរី។ គឺពិតជាទិចនិកអំពាវនាវរកកម្លាំងប្រយុទ្ធ តស៊ូប្រឆាំងនឹងសត្រូវរបស់អ៊ីស្លាម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ