កិច្ចព្រមព្រៀងនុយក្លេអ៊ែរអ៊ីរ៉ង់ នឹងអាចប្រសូតនៅថ្ងៃសុក្រនេះ នៅទីក្រុងហ្សឺណែវ ?
ចុះផ្សាយនៅថ្ងៃ៖
កិច្ចពិភាក្សាស្តីអំពីសំណុំរឿងនុយក្លេអ៊ែរអ៊ីរ៉ង់កំពុងបន្តធ្វើទៅទីក្រុងហ្សឺណែវប្រទេសស្វីស រហូតដល់យប់នេះ។ ដឹកនាំដោយសហភាពអឺរ៉ុប និងចូលរួមដោយតំណាងភាគី អ៊ីរ៉ង់ ក្រុមប្រទេសមហាអំណាចទាំងប្រាំ សហរដ្ឋអាមេរិក អង់គ្លេស រុស្ស៊ី ចិន បារាំង បូកនឹងអាល្លឺម៉ង់ ជំនួបប្រជុំលើកនេះ ប្រព្រឹត្ត ក្នុងបរិយាកាសដ៏ធូរស្រាល និងក្នុងក្តីសង្ឃឹមយ៉ាងមុតមាំ ថាកិច្ចព្រមព្រៀងមួយនឹងអាចរកឃើញរវាងអ៊ីរ៉ង់និងក្រុមបស្ចឹមលោក។ រដ្ឋមន្ត្រីការបរទេសបារាំង និងអាមេរិក បានកែប្រែកាលវិភាគ ដោយងាកទៅចូលរួមក្នុងជំនួបនេះដែរ ផ្តល់សង្ឃឹមកាន់តែខ្លាំងដល់គ្រប់ភាគី។ ប៉ុន្តែមិនទាំងអីផង រដ្ឋាភិបាលអ៊ីស្រាអែល បានប្រកាសច្រានចោលកិច្ចព្រមព្រៀងស្រមោលនោះរួចជាស្រេចទៅហើយ។
តើនឹងអាចមានកិច្ចព្រមព្រៀងនុយក្លេអ៊ែរអ៊ីរ៉ង់ ក្នុងកិច្ចប្រជុំលើកនេះ ?
កិច្ចប្រជុំលើកនេះ ក៏ដូចជាកាលពីខែតុលា ភាសានិយាយជាមួយអ៊ីរ៉ង់ មានលក្ខណៈខុសពីមុន។ ចំពោះករណីពិភាក្សាលើកនេះ ដែលដឹកនាំការប្រជុំដោយ សហភាពអឺរ៉ុប ជាការជជែកបន្តពីអ្វីដែលបានស្នើឡើងដោយអ៊ីរ៉ង់ក្នុងជំនួបប្រជុំកាលពីខែមុន។ សំណើដែលមិនត្រូវបានបង្ហាញជាសាធារណៈទេ គ្រាន់តែដឹងក្នុងន័យថា អ៊ីរ៉ង់ព្រមបង្កក ការធ្វើចម្រើនធាតុអ៊ុយរ៉ាញ៉ូម ដ៏ចម្រូងចម្រាស មួយភាគ ជាថ្នូរនឹងការបន្ធូរបន្ថយ សម្រាលទណ្ឌកម្មសេដ្ឋកិច្ចខ្លះពីអ៊ីរ៉ង់។ អ្នកនាំពាក្យរបស់ លោកស្រីប្រមុខការទូតសហភាពអឺរ៉ុប បានប្រកាសនៅល្ងាចមិញ ថាការប្រជុំមានការជឿនលឿនទៅមុខច្រើន។ ជាងនេះទៅទៀត រដ្ឋមន្ត្រីការបរទេសអ៊ីរ៉ង់ ដែលកំពុងស្ថិតនៅក្រុងហ្សឺណែវនោះ បានព្រលយសម្តីប្រកបដោយសុទិដ្ឋិនិយមថា អាចនឹងមានកិច្ចព្រមព្រៀង នៅមុនពេលបិទបញ្ចប់ជំនួបប្រជុំថ្ងៃនេះ។
ម្យ៉ាងវិញ នៅថ្ងៃនេះ ខុសពីការគ្រោងទុក រដ្ឋមន្ត្រីការបរទេសបារាំង លោក Laurent Fabius បានសម្រេចចិត្ត នៅនាទីចុងក្រោយ ទៅចូលរួមប្រជុំនៅហ្សឺណែវដែរ។ លោកបានបង្ហើបឱ្យដឹងថា កំពុងមានការត្រៀមអត្ថបទស្តីពីកិច្ចព្រមព្រៀង។ ឯលោក ចន ឃែរី រដ្ឋមន្ត្រីការបរទេសអាមេរិក ដែលកំពុងបំពេញទស្សនកិច្ចមួយជុំ នៅតំបន់ដើមបូព៌ា ក៏បានប្តូរផ្លាស់កាលវិភាគខ្លះ ដោយធ្វើដំណើរមកស្វីសដែរ ហើយបានប្រកាស ដោយផ្ទាល់អំពីជំនួបប្រជុំត្រីភាគី នៅល្ងាចនេះតែម្តង ជាមួយសមភាគីអ៊ីរ៉ង់ និងសហភាពអឺរ៉ុប លោកស្រី អាស្តុន កាទ្រីន។ ដោយយោលទៅលើព្រឹត្តិការណ៍ទាំងអស់នេះហើយ ទើបគ្រប់គ្នា មើលឃើញ និងហ៊ានសន្និដ្ឋាន ថា កិច្ចប្រជុំលើកនេះ ពិតជានឹងទទួលបានលទ្ធផលវិជ្ជមាន អាចទម្លាយវិបត្តិនុយក្លេអ៊ែរអ៊ីរ៉ង់ ចេញពីភាពទ័លច្រក។
ហេតុអ្វី ជាត្រូវចរចា ហើយចរចាទៀត ?!
សម្រាប់អ៊ីរ៉ង់ គឺខុសពីមុន ! តាំងពីខែសីហា២០១៣មក អ៊ីរ៉ង់មានប្រធានាធិបតីថ្មី ទន់ភ្លន់ជាងមុន ចេះនិយាយភាសាការទូតទៀត។ លោកប្រធានាធិបតីអ៊ីរ៉ង់ ហាសាន់ រ៉ូហានី ធ្លាប់ធ្វើអន្តរការីដឹកនាំការចរចាម្តង កាលពីឆ្នាំ២០០៣ ដែលកាលណោះបានសម្រេចព្រមព្រៀងគ្នាម្តងហើយ តែត្រូវជាប់គាំងទៅវិញ ក្រោយពេលលោកមាមូត អាមាឌីនិចាត ឡើងជាប្រធានាធិបតី នៅឆ្នាំ២០០៥។ នេះម្យ៉ាង ហើយម្យ៉ាងទៀត បើនិយាយអំពីវិស័យសេដ្ឋកិច្ចវិញ អ៊ីរ៉ង់ធ្លាក់ដុនដាបខ្លាំងណាស់ ព្រោះជាប់ទណ្ឌកម្មសេដ្ឋកិច្ចនិងហិរញ្ញវត្ថុ។ ជោគវាសនាប្រទេសអាចនឹងរងគ្រោះប្រសិនបើស្ថានភាពសេដ្ឋកិច្ចផ្ទៃក្នុងអាក្រក់ទៅអាក្រក់ទៅដូច្នេះ។ សូម្បីតែអគ្គមគ្គុទេសក៍ ខាមេណី ដ៏មានអំណាចបំផុតនៅអ៊ីរ៉ង់ ក៏បានគាំទ្រឱ្យមានកិច្ចចរចានុយក្លេអ៊ែរនេះ ដើម្បីឱ្យបស្ចឹមលោកលើកទណ្ឌកម្មចេញ ទាំងស្រុង ឬមួយភាគ។ នៅអ៊ីរ៉ង់ ក្រុមដែលទម្ងន់ខ្លាំងក្នុងការដាក់សម្ពាធលើរដ្ឋាភិបាល គឺក្រុមឆ្មាំបដិវត្តដែល មានទាំងអំណាចយោធា និងអំណាចសេដ្ឋកិច្ច និងការពារយ៉ាងងុបងុលកម្មវិធីនុយក្លេអ៊ែរ ក្រុមនេះរស់និងរីករាយនឹងធ្វើសង្គ្រាមជាមួយបស្ចឹមលោក ដូច្នេះប្រសិនបើរដ្ឋាភិបាលលោក រ៉ូហានី ដែលជាអ្នកមិនប្រកាន់តឹង មិនអាចរកលទ្ធផលអ្វីជូនជាតិនៅពេលនេះទេ នោះប្រាកដពួកប្រកាន់ជ្រុល មានប្រៀបឡើងវិញហើយ។
សម្រាប់ក្រុមបស្ចឹមលោកវិញ ក៏ត្រូវការចរចានុយក្លេអ៊ែរនេះដែរ ព្រោះមិនចង់ឱ្យមានការរីកសាយភាយនុយក្លេអ៊ែរ ស្របតាមសន្ធិសញ្ញាអន្តរជាតិ ផង និងមិនចង់ឱ្យអ៊ីរ៉ង់សម្រេចផលិតគ្រប់បែកបរមាណូបាន។ បើអ៊ីរ៉ង់ធ្វើបាននោះនឹង នាំចិត្តឱ្យក្រុមប្រទេសជិតខាងចង់មានអាវុធប្រល័យលោកដែរ។ ចំណុចសំខាន់មួយទៀត គឺប្រសិនបើការចរចាពិតជាសម្រេចបានដល់កិច្ចព្រមព្រៀងមែន មានន័យស្មើនឹង អាមេរិក ខិតជិតអ៊ីរ៉ង់ លែងជាសត្រូវស៊ីសាច់ហុតឈាមគ្នាពេក ឯតំបន់ដើមបូព៌ាក៏នឹងភាពធូរស្រាលដែរ។
►សូមអាន ៖ ស្វែងយល់ពីវិបត្តិនុយក្លេអ៊ែរអ៊ីរ៉ង់
អ៊ីស្រាអែលបដិសេធកិច្ចព្រមព្រៀងទាំងមិនទាន់ចេញជារូបរាង
អ៊ីស្រាអែលបដិសេធមិនចង់ឃើញកិច្ចព្រមព្រៀងរវាងបស្ចឹមលោក និងអ៊ីរ៉ង់ ក៏ព្រោះតែដឹងថា អ៊ីរ៉ង់ចរចាចង់បានការបន្ធូរបន្ថយទ័ណ្ឌកម្មសេដ្ឋកិច្ច និងហិរញ្ញវត្ថុប៉ុណ្ណោះ គ្មានទេចេតនាពិត បញ្ឈប់ការអភិវឌ្ឍអាវុធនុយក្លេអ៊ែរ។ សហរដ្ឋអាមេរិក យល់អំពីចំណុចព្រួយបារម្ភរបស់អ៊ីស្រាអែល ជាសម្ព័ន្ធមិត្ត ច្បាស់ណាស់។ ហេតុដូច្នេះហើយបានជាលោកប្រមុខការទូត ចន ឃែរី មុននឹងធ្វើដំណើរទៅហ្សឺណែវ បានឆ្លៀតចុះជួបប្រមុខដឹកនាំអ៊ីស្រាអែល នៅព្រឹកមិញម្តងទៀត ទោះបីទើបជួបគ្នាកាលពីថ្ងៃពុធម្សិលម្ង៉ៃក៏ដោយ ដើម្បី លួងលោមរំងាប់កំហឹងអ៊ីស្រាអែល។ សម្រាប់ លោក ប្រធានាធិបតី បារ៉ាក់អូបាម៉ា ការធ្វើសម្បទា គឺជាការចាំបាច់ក្នុងដំណាក់កាលចរចានេះ តែអាមេរិកព្រមបន្ធូរបន្ថយទណ្ឌកម្មស្រាលៗ និងអាចបកមកដាក់ប្រឆាំងនឹងអ៊ីរ៉ង់វិញបានគ្រប់វេលា។
ប៉ុន្តែ កំហឹងរបស់អ៊ីស្រាអែល ពិសេសរបស់លោកនាយករដ្ឋមន្ត្រី នេតាន់យាហ៊ូ គ្មានអ្វីគួរឱ្យព្រួយបារម្ភខ្លាំងទេ ព្រោះ សូម្បីតែក្នុងរង្វង់ថា្នក់ដឹកនំាអ៊ីស្រាអែលគ្នាឯងក៏មិនបានឯកភាព លើយុទ្ធសាស្រ្តវាយបករបស់រដ្ឋាភិបាល រាប់ទាំងលោកប្រធានាធិបតីស៊ីមន ប៉េរ៉េស ផង។ រីឯប្រធានគណបក្សប្រឆំាងវិញបានអំពាវនាវឲ្យរដ្ឋាភិបាលលោកនេតានយ៉ាហ៊ូ រក្សាផលប្រយោជន៍អ៊ីស្រាអែល និងអាមេរិក កុំឱ្យមានលក្ខណៈផ្ទុយគ្នាឲ្យសោះ៕
►សូមអាន ៖ អ៊ីស្រាអែលកំពុងបារម្ភពីយុទ្ធសាស្ត្រអ៊ីរ៉ង់ចំពោះសហគមន៍អន្តរជាតិ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ