កូតឌីវ័រ៖ វិបត្តិក្រោយការបោះឆ្នោតប្រធានាធិបតី
មេដឹកនាំប្រឆាំង គឺលោក អាឡាសាន វាត់តារ៉ា (Alassane Ouattara) ទទួលបានសំឡេង ៥៤,១%។ ចំណែកលោកឡូរ៉ង់ បាក់បូ (Laurent Gbagbo) ប្រធានាធិបតីផុតអាណត្តិទទួលបាន ៤៥,៩%។ នេះគឺជាលទ្ធផលប្រកាសដោយគណៈកម្មាធិការបោះឆ្នោតឯករាជ្យ (CEI) កាលពីថ្ងៃព្រហស្បតិ៍ ២ ធ្នូ ២០១០។ ក៏ប៉ុន្តែ ក្រុមប្រឹក្សាធម្មនុញ្ញបានប្រកាសច្រានចោលលទ្ធផលនេះវិញ។ តាមរូបភាពខាងក្រៅ វាគឺជាបញ្ហាច្បាប់ ក៏ប៉ុន្តែ តាមភាពពិតជាក់ស្តែង នេះគឺជាសមរភូមិនយោបាយ។
ចុះផ្សាយនៅថ្ងៃ៖
ការពន្យល់របស់សេង ឌីណា
លទ្ធផលប្រកាសដោយគណៈកម្មាធិការបោះឆ្នោតឯករាជ្យ មិនមានសុពលភាពនោះទេ ពីព្រោះ គណៈកម្មាធិការបានខកខានមិនប្រកាសលទ្ធផលតាមរយៈពេលកំណត់ដោយច្បាប់។ នេះគឺជាហេតុផល ដែលបានលើកឡើងដោយក្រុមប្រឹក្សាធម្មនុញ្ញ។
ក្រុមអ្នកច្បាប់ និងគណបក្សប្រឆាំងបានអះអាងថា ថ្វីដ្បិតតែច្បាប់បានកំណត់ឲ្យប្រកាសលទ្ធផលបោះឆ្នោត ៣ថ្ងៃ ក្រោយការបោះឆ្នោត ក៏ប៉ុន្តែ វាមិនមែនជារយៈពេលកំណត់ ដែលត្រូវតែគោរពតាមដោយខានមិនបាននោះទេ។ ការប្រកាសលទ្ធផលក្រោយរយៈកាលកំណត់នេះ មិនបណ្តាលឲ្យលទ្ធផលបោះឆ្នោតបាត់បង់សុពលភាពនោះទេ។
ទោះជាយ៉ាងណា ទាំងនេះគ្រាន់តែជាទឡ្ហីករណ៍ផ្នែកច្បាប់ប៉ុណ្ណោះ។ ក៏ប៉ុន្តែ តាមការពិតជាក់ស្តែង សមរភូមិនៅពេលនេះ គឺជាសមរភូមិនយោបាយច្រើនជាងច្បាប់។
គណៈកម្មាធិការបោះឆ្នោតឯករាជ្យមានសមាជិកមកពីគ្រប់និន្នាការនយោបាយ។ ចំណែកក្រុមប្រឹក្សាធម្មនុញ្ញវិញ គឺដឹកនាំដោយមនុស្សស្និទ្ធនឹងលោកឡូរ៉ង់ បាក់បូ។ គណៈកម្មាធិការបោះឆ្នោតបានអះអាងថា គេគ្រោងប្រកាសលទ្ធផលបោះឆ្នោត តាំងពីថ្ងៃអង្គារម៉្លេះ ពោលគឺ ២ថ្ងៃក្រោយការបោះឆ្នោត ក៏ប៉ុន្តែ មិនអាចធ្វើទៅបាន ដោយមានការរារាំងពីសំណាក់ក្រុមអ្នកគាំទ្រលោកឡូរ៉ង់ បាក់បូ។ គណបក្សរបស់លោកឡូរ៉ង់ បាក់បូ បានទាមទារឲ្យលុបលទ្ធផលបោះឆ្នោតនេះចោល។
ក៏ប៉ុន្តែ តំណាងអង្គការសហប្រជាជាតិប្រចាំកូតឌីវ័របានទទួលស្គាល់ថា ការបោះឆ្នោតនៅកូតឌីវ័របានប្រព្រឹត្តទៅដោយសេរី និងយុត្តិធម៌ ដែលគួរទទួលយកបាន។ បារាំង និងអាមេរិកក៏បានទទួលស្គាល់បែបនេះដែរ។ អ្នកនាំពាក្យសេតវិមានថែមទាំងបានថ្លែងអបអរសាទរជ័យជំនះរបស់ លោកអាឡាសាន វាត់តារ៉ា ទៀតផង។
នៅថ្ងៃសុក្រនេះ កងទ័ពកូតឌីវ័របានប្រកាសបិទព្រំដែនទាំងអស់ ទាំងផ្លូវគោក ផ្លូវទឹក និងផ្លូវអាកាស។ បណ្តាញផ្សព្វផ្សាយព័ត៌មានអន្តរជាតិក៏ត្រូវបានបិទផងដែរ។ បម្រាមគោចរណ៍ស្ថិតនៅជាធរមានតាំងពីថ្ងៃអាទិត្យ។ សហគមន៍អន្តរជាតិកំពុងបារម្ភអំពើហិង្សាផ្ទុះឡើងរវាងអ្នកគាំទ្រ បេក្ខជនប្រធានាធិបតីទាំងពីរ ហើយកូតឌីវ័រអាចនឹងធ្លាក់ចូលក្នុងសង្រ្គាមស៊ីវិលជាថ្មីម្តងទៀត។
កាលពីថ្ងៃព្រហស្បតិ៍ ក្រុមប្រឹក្សាសន្តិសុខអ.ស.ប.បានព្រមានថានឹង “ចាត់វិធានការសមស្រប” (មានន័យថា ដាក់ទណ្ឌកម្ម) ចំពោះអ្នកណាដែលរារាំងដំណើរការបោះឆ្នោតនៅពេលនេះ។
គួរបញ្ជាក់ថា នៅពេលនេះ អ.ស.ប.មានកងរក្សាសន្តិសុខមួកខៀវចំនួន ៩០០០នាក់ ប្រចាំនៅក្នុងប្រទេសកូតឌីវ័រ។ បារាំងក៏មានទាហានចំនួន ៩០០នាក់កំពុងឈរជើងនៅទីនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ