ជប៉ុនកំពុងពិចារណាចង់ផ្លាស់ប្តូរជំហរពីការសុំទោសរឿងទាសករផ្លូវភេទសម័យសង្រ្គាម
រដ្ឋាភិបាលជប៉ុនកំពុងធ្វើការពិចារណា ក្នុងការផ្លាស់ប្តូរជំហរ អំពីការសុំទោសរឿងទាសករផ្លូវភេទ ក្នុងសម័យសង្រ្គាម។ នេះបើយោងតាមការអះអាងរបស់មន្រ្តីរដ្ឋាភិបាលជាន់ខ្ពស់ជប៉ុន នៅថ្ងៃចន្ទ។ នេះអាចជាជំហានមួយថ្មីទៀត នៃនយោបាយជាតិនិយមរបស់លោកស្ហ៊ីនហ្សូ អាបេ ហើយដែលអាចនឹងធ្វើឲ្យទំនាក់ទំនង រវាងជប៉ុន និងប្រទេសជាតិខាង កាន់តែធ្លាក់ក្នុងសភាពតានតឹងខ្លាំងឡើងថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ទាសករផ្លូវភេទ គឺជាបញ្ហាដ៏ចម្រូងចម្រាសមួយ រវាងជប៉ុន និងប្រទេសជិតខាង ជាពិសេស កូរ៉េខាងត្បូង។ អ្នកប្រវត្តិសាស្រ្តសំខាន់ៗជាច្រើនយល់ថា នៅក្នុងសម័យសង្រ្គាមលោក មានស្រ្តីប្រមាណជា ២០ម៉ឺននាក់ ភាគច្រើនមកពីកូរ៉េ ក៏ប៉ុន្តែ ក៏មានផងដែរមកពីចិន ឥណ្ឌូណេស៊ី ហ្វីលីពីន និងតៃវ៉ាន់ ត្រូវបានជប៉ុនចាប់បង្ខំឲ្យធ្វើជាទាសករបម្រើផ្លូវភេទដល់ទាហាន។
កាលពីឆ្នាំ១៩៩៣ រដ្ឋាភិបាលជប៉ុនធ្លាប់បានចេញថ្លែងការណ៍មួយទទួលស្គាល់ថា រដ្ឋាភិបាលជប៉ុនពិតជាបានពាក់ព័ន្ធក្នុងរឿងទាសករផ្លូវភេទនេះមែន ហើយព្រមទាំងបានថ្លែងសុំទោសជាផ្លូវការដល់ជនរងគ្រោះផងដែរ។
ក៏ប៉ុន្តែ នៅថ្ងៃចន្ទនេះ លោកយ៉ូស្ហ៊ីហ៊ីដេ ស៊ូហ្កា (Yushihide Suga) រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុន បានឲ្យដឹងថា ជប៉ុនកំពុងតែសើរើមើលសំណុំរឿងនេះឡើងវិញ ដើម្បីសម្រេចថា តើគួរធ្វើការកែប្រែការសុំទោស កាលពីពេលកន្លងមកដែរឬទេ?
គួរបញ្ជាក់ថា អ្នកនយោបាយអភិរក្សនិយមជប៉ុន តែងតែប្រកាន់នូវជំហរថា ស្រ្តីបម្រើផ្លូវភេទដល់ទាហានជប៉ុន ក្នុងសម័យសង្រ្គាម គឺសុទ្ធសឹងជាស្រ្តីរកស៊ីផ្លូវភេទធម្មតា ហើយថា ទាំងរដ្ឋាភិបាល និងទាំងមន្រ្តីកងទ័ពជប៉ុន មិនមានជាប់ពាក់ព័ន្ធនឹងការចាប់បង្ខំស្រ្តីឲ្យធ្វើជាទាសករផ្លូវភេទនោះទេ។ ការបដិសេធរបស់អ្នកនយោបាយអភិរក្សនិយមជប៉ុននេះហើយ ដែលជាផ្នែកមួយ ធ្វើឲ្យប្រជាជន និងរដ្ឋាភិបាលកូរ៉េខាងត្បូងយល់ថា ការសុំទោសរបស់ជប៉ុនកន្លងមកមិនត្រូវបានធ្វើឡើងដោយសុទ្ធចិត្ត។
មន្រ្តីជាន់ខ្ពស់រដ្ឋាភិបាលជប៉ុនវិញ អះអាងថា គេមិនឃើញមានភស្តុតាងអ្វីពិតប្រាកដ ដែលអាចបញ្ជាក់ពីការជាប់ពាក់ព័ន្ធរបស់រដ្ឋាភិបាលជប៉ុន ក្នុងរឿងទាសករផ្លូវភេទនេះទេ។ ក៏ប៉ុន្តែ បើទោះជាយ៉ាងនេះក៏ដោយ រដ្ឋាភិបាលជប៉ុនបានសុខចិត្តសុំទោសជាផ្លូវការ ចំពោះរឿងនេះ ក្នុងគោលដៅផ្សះផ្សាទំនាក់ទំនងជាមួយកូរ៉េខាងត្បូងឡើងវិញ។ ក៏ប៉ុន្តែ ដោយមើលឃើញថា កូរ៉េខាងត្បូងមិនឲ្យតម្លៃដល់សុឆន្ទៈរបស់ជប៉ុន ដូច្នេះ ជប៉ុនត្រូវតែធ្វើការសើរើ អំពីជំហររបស់ខ្លួនឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ